បេះដូងបត់ជិត ៤លានបេះដូង ដែលបានដោតជាអក្សរខ្មែរ និងជារូបបេះដូង នៅបរិវេណប្រាសាទអង្គរវត្ដ ត្រូវបានដករៀបចំទុកវិញហើយ បន្ទាប់ពីបានបំបែកឯតទ្ទកម្មបេះដូងច្រើនជាងគេលើពិភពលោក ដោយ Guinness World Records នៃយុទ្ធនាការ Beyond The Games កាលពីថ្ងៃទី១១ ខែមេសា ឆ្នាំ២០២៣កន្លងមក។
លោក ធុន សីហា យុវជនស្ម័គ្រចិត្ដនៃក្រុមការងារ Beyond The Games បានឱ្យដឹងនៅថ្ងៃទី២៤ ខែមេសានេះថា បេះដូងដែលរៀបជាអក្សរខ្មែរ និងរូបបេះដូង បានដកប្រមូល រៀបចំទុកដាក់ហើយ នៅព្រឹកថ្ងៃទី២៤ ខែមេសា ឆ្នាំ២០២៣នេះ ប៉ុន្ដែបេះដូងជាទ្រង់ដែកត្រីកោណបានរុះរើកាលពីម្សិលមិញ ដើម្បីយកទៅដាក់បង្ហាញជាសួននៅរាជធានីភ្នំពេញបន្ដទៀត ដែលធ្វើឡើងនៅវិមានឈ្មះឈ្នះ នាថ្ងៃទី២៨ ខែមេសា ឆ្នាំ២០២៣ខាងមុខនេះ នៅក្នុងកម្មវិធី Beyond The Games ។ លោកបន្ដថា បេះដូងបត់ក្រដាស់នេះ បានរៀបចំនៅបរិវេណប្រាសាទអង្គរចាប់ពីថ្ងៃទី៧ ខែមេសា ហើយនៅថ្ងៃទី១១ ខែមេសា បានប្រកាសបំបែកកំណត់ត្រាពិភពលោក បេះដូងច្រើនជាងគេ ដោយ Guinness World Records នៃយុទ្ធនាការ Beyond The Games។ ក្រោយពីការរៀបចំជារូបអក្សរខ្មែរ និងរូបបេះដូងមានភ្ញៀវទេសចររាប់លាននាក់ទៅទស្សនា។
ជាមួយគ្នានោះដែរ មន្ដ្រីអាជ្ញាធរជាតិអប្សរាពីររូប ដែលជាក្រុមអ្នកមើលថែរក្សាបេះដូងបត់ បានឱ្យដឹងថា ក្រោយពីបេះដូងបត់បានបង្ហាញឱ្យពិភពលោកបានឃើញ នៅបរិវេណប្រាសាទអង្គរកន្លងមក បានទាក់ទាញអ្នកទេសចរជាតិអន្ដរជាតិយ៉ាងច្រើនកុះករទៅទស្សនា និងថតផ្ដិតយករូបភាពជាអនុស្សាវរីយ៍ ជាក់ស្ដែងក្រោយចូលឆ្នាំ មានអ្នកទេសចរជាតិនិងអន្ដរជាតិទៅទស្សនាជិតមួយម៉ឺននាក់ក្នុងមួយថ្ងៃ។មន្ដ្រីដដែលបានបន្ដថា បើទោះបីបេះដូងបត់នេះ បានដកចេញវិញក្ដី ក៍ប៉ុន្ដែទស្សនីយភាពបេះដូងច្រើនជាងគេលើពិភពលោកនេះ បានបង្ករភាពសប្បាយរីករាយ និងមានអនុស្សាវរីយ៍ដែលមិនអាចបំភ្លេចបាន។ ពួកគាត់រំពឹងថា ឆ្នាំក្រោយៗទៀត ក្រុមការងារបាយ័នឌឺហ្គេមនឹងមានកម្មវិធីល្អៗជាច្រើនទៀត ដើម្បីទាក់ទាញអ្នកទេសចរទៅកំសាន្ដនិងបង្កើតស្នាមញញឹមដល់កូនខ្មែរគ្រប់ៗរូប៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
