នាព្រឹកថ្ងៃទី១០ ខែមេសា ឆ្នាំ២០១៩នេះ រដ្ឋបាលខេត្តសៀមរាប ក្រោមអធិបតីភាពឯកឧត្ដម ទៀ សីហា អភិបាលនៃគណៈអភិបាលខេត្ត និងលោកជំទាវ និង ឯកឧត្តម អ៊ឹង ហឿន ប្រធានក្រុមប្រឹក្សាខេត្ត រួមជាមួយឯកឧត្ដម លោកជំទាវ លោក លោកស្រី ជាសមាជិកក្រុមប្រឹក្សាខេត្ត , អភិបាលរងខេត្ត ថ្នាក់ដឹកនាំ និងមន្ត្រីរាជការ របស់អង្គភាពសាលាខេត្ត មន្ទីរ អង្គភាពនានាក្នុងខេត្ត បានរៀបចំពិធីសូត្រមន្ត និង រាប់បាត្រព្រះសង្ឃចំនួន៤១អង្គ ដើម្បីឧទ្ទិសកុសលផលបុណ្យ ជូនដល់វិញ្ញាណក្ខ័ន្ធមាតាបិតា ជីដូនជីតា ញ្ញាតិកាទាំងប្រាំពីរសណ្តាន បុព្វការីជន និង កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិមាតុភូមិ និង ប្រជាជនដែលបានស្លាប់ដោយភាពអយុត្តិធម៌ក្នុងរបបប្រល័យពូជសាសន៍ ប៉ុល ពត និង ដើម្បីបួងសួងឧទ្ទិសដល់ទេវតាឆ្នាំថ្មី ជួយប្រោះព្រំប្រសិទ្ធពរជ័យ បវរសួស្តី សិរីមង្គល វិបុលសុខគ្រប់ប្រការ ដល់គណៈអភិបាលខេត្ត ក្រុមប្រឹក្សាខេត្ត ថ្នាក់ដឹកនាំ មន្ត្រីរាជការ អ្នកមុខអ្នកការ មន្ទីរ ស្ថាប័ន អង្គភាពជុំវិញខេត្ត និង ប្រជាពលរដ្ឋទូទាំងខេត្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំកុរ ឯកស័ក ព.ស ២៥៦៣ ដែលនឹងត្រូវចូលមកដល់នៅវេលាម៉ោង១៥ និង១២នាទី នាថ្ងៃអាទិត្យ ទី១៤ ខែមេសា ឆ្នាំ២០១៩ ខាងមុខនេះ ។
គួររំលឹកថា ជារៀងរាល់ឆ្នាំ រដ្ឋបាលខេត្តសៀមរាប តែងតែបានរៀបចំពិធីសូត្រមន្ត និង រាប់បាត្រព្រះសង្ឃ ដើម្បីចម្រើនសិរីសួស្ដី ជ័យមង្គល ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
