កាលពីព្រឹក ថ្ងៃទី១១ ខែមេសា ឆ្នាំ២០១៩នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ផ្ដល់ឧបករណ៍គ្រប់គ្រងសំឡេង ( Mixer ) ដល់មន្ទីរព័ត៌មានខេត្តសៀមរាប នៅទីស្តីការក្រសួងព័ត៌មាន ដើម្បីលើកកម្ពស់លើប្រព័ន្ធផ្សព្វផ្សាយរបស់ជាតិ ។
ក្នុងឱកាសនោះ លោក លីវ សុខុន ប្រធានមន្ទីរព័ត៌មានខេត្តសៀមរាប បានសម្ដែងនូវសេចក្ដីថ្លែងអំណរគុណចំពោះឯកឧត្តមរដ្ឋមន្ត្រី ដែលជានិច្ចកាលឯកឧត្តម តែងតែបានយកចិត្តទុកដាក់ចំពោះសុខទុក្ខមន្ត្រីរាជការក្រោមឱវាទនៃក្រសួងព័ត៌មាន ទាំងនៅថ្នាក់ជាតិ ក៏ដូចជានៅតាមបណ្តាមន្ទីរនៅរាជធានីភ្នំពេញ និង ខេត្ត ជាពិសេស ឯកឧត្តមតែងតែបានដាស់តឿន ក្រើនរំលឹក និង លើកទឹកចិត្តដល់មន្ត្រីរាជការទាំងអស់ ឲ្យបំពេញភារកិច្ចតាមតួនាទីរបស់ខ្លួន ដើម្បីលើកកម្ពស់ប្រព័ន្ធផ្សព្វផ្សាយរបស់ជាតិ ស្របតាមគោលនយោបាយ និងគោលការណ៍របស់រាជរដ្ឋាភិបាល ។
ជាមួយគ្នានេះដែរ លោក លីវ សុខុន បានជូនពរដល់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និង លោកជំទាវ ព្រមទាំងបុត្រី ក្នុងឱកាសដ៏បវរសួស្តី សិរីមង្គល និងវិបុលសុខ មហាប្រសើរ ក្នុងពិធីចូលឆ្នាំថ្មី ប្រពៃណីជាតិខ្មែរ ឆ្នាំកុរ ឯកស័ក ពុទ្ធសករាជ ២៥៦៣ខាងមុខនេះ សូមបួងសួងដល់គុណព្រះរតនត្រ័យ កែវទាំងបី វត្ថុស័ក្តិសិទ្ធទាំងឡាយលើលោក ឬទ្ធីតេជះបារមី ព្រះឥន្ទ ព្រះព្រហ្ម ទេវតាឆ្នាំថ្មីព្រះនាមទុង្សាទេវី ថែរក្សាទឹកដី នៃព្រះរាជាណាចក្រកម្ពុជា និងសូមព្រះអង្គជួយបីបាច់ថែរក្សាប្រទានពរជ័យ សិរីសួស្តី ជ័យមង្គល គ្រប់ប្រការជូន ឯកឧត្តម និងលោកជំទាវ ព្រមទាំង បុត្រី សូមមានជន្មាយុយឺនយូរ និងសុខភាពល្អបរិបូរណ៍ ដើម្បីដឹកនាំនាវាកម្ពុជា និងប្រជាពលរដ្ឋ ឆ្ពោះទៅកាន់វឌ្ឍនភាព ក្នុងសុខសន្តិភាព ស្ថិរភាពរឹងមាំតរៀងទៅ ៕
