ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់នៅថ្ងៃទី១៤-១៦ ខែមេសា ឆ្នាំ២០១៩ ខាងមុខ នេះ លោក លីវ សុខុន ប្រធានមន្ទីរព័ត៌មានខេត្ត ព្រមទាំងថ្នាក់ដឹកនាំ មន្ត្រីរាជការ និង មន្ត្រីចូលនិវត្តន៍ក្នុងក្របខណ្ឌរបស់មន្ទីរ បានរៀបចំពិធីសូត្រមន្ត ចម្រើនព្រះបរិត្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំកុរ ឯកស័ក ព.ស.២៥៦៣ ដែលពិធីនេះរៀបចំឡើង នៅមន្ទីរព័ត៌មានខេត្តសៀមរាប ។
ពិធីនេះ បានប្រព្រឹត្តទៅតាមទំនៀមទម្លាប់ ប្រពៃណីព្រះពុទ្ធសាសនា ដោយបានប្រារព្ធពិធីនមសិកា ព្រះរតនត្រ័យសមាទានសីល និងបង្សុកូល ដើម្បីជាកិច្ចឧទ្ទិសកុសល ទៅដល់បុព្វការីជន ដែលបានចែកឋានទៅកាន់លោកខាងមុខ ហើយសូមឲ្យបានឋិតក្នុងឋានបរមសុខកុំបីឃ្លៀងឃ្លាតឡើយ និង ព្រះសង្ឃបានប្រោះព្រំប្រសិទ្ធពរជ័យមង្គល បួងសួងដល់គុណបុណ្យព្រះរតនត្រ័យកែវទាំងបី វត្ថុសក្តិសិទ្ធទាំងឡាយក្នុងលោក និងទេវតាថែរក្សាទឹកដីព្រះរាជាណាចក្រកម្ពុជា និងសូមទេវតាឆ្នាំថ្មីឆ្នាំកុរ ព្រះនាម ទុង្សាទេវី សូមតាមជួយអភិបាលប្រោះព្រំ សាធុការពរជ័យគ្រប់ប្រការ ជូនដល់ជនរួមជាតិ សូមបានសមប្រកបដោយ ព្រះពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ ជានិច្ចនិរន្តរ៍ កុំបីឃ្លៀងឃ្លាតឡើយ៕
ព័ត៌មានជាតិ ថ្មីៗ
