លំនៅដ្ឋានមួយខ្នង ដំបូលប្រក់ស័ង្កសី និងជញ្ជាំងបាំងស័ង្កសី ត្រូវបានភ្លើងឆាបឆេះទាំងស្រុង បើទោះបីជារថយន្តពន្លត់អគ្គីភ័យខិតខំជួយអន្តរាគមន៍យ៉ាងណាក្តី។
អគ្គីភ័យនេះបានកើតឡើង នៅវេលាម៉ោង១រសៀល ថ្ងៃទី១៧ ខែមេសា ឆ្នាំ២០១៩ ស្ថិតនៅភូមិតាវៀន សង្កាត់សាលាកំរើក ក្រុងសៀមរាប។
លោក ស តារា មេភូមិតាវៀន បានឲ្យដឹងថា ផ្ទះប្រជាពលរដ្ឋដែលអគ្គីភ័យឆាបឆេះនេះ មានចំនួនពីរគ្រួសាររស់នៅ គ្រួសារទី១ មានមេគ្រួសារឈ្មោះ រ៉េត ណុយ ភេទប្រុស អាយុ៣១ឆ្នាំ និងប្រពន្ធឈ្មោះ ណុក ណៃ អាយុ៣០ឆ្នាំ។ គ្រួសារទី២ មានមេគ្រួសារឈ្មោះ ឆម វណ្ឌី ភេទប្រុស អាយុ៣២ឆ្នាំ និងប្រពន្ធឈ្មោះឡាន ស្រីឡុង អាយុ២៧ឆ្នាំ ។
លោកមេភូមិបន្តថា គ្រោះអគ្គីភ័យនេះមិនបង្កឲ្យមនុស្សរងរបួសនោះទេ ប៉ុន្តែទ្រព្យសម្បត្តិដែលត្រូវឆេះបាត់បង់ទាំងពីរគ្រួសារអស់ប្រាក់ដុល្លារចំនួន៨០០០ដុល្លារ មាសចំនួន១២ជី និងប្រាក់ខ្មែរមួយចំនួនទៀត។
បើតាមការឲ្យដឹងពី លោកវរៈសេនីយ៏ឯក ណុប សារ៉ាក់ អធិការនគរបាលក្រុងសៀមរាប មូលហេតុដែលបណ្ដាលឲ្យកើតមានអគ្គីភ័យនេះ គឺដោយសារ ឆ្លងចរន្តចេញពីខ្សែអគ្គិសនី របស់ទូរទឹកកកក្នុងផ្ទះ ក្នុងប្រតិបត្តិការ ស្នងការដ្ឋាននគរបាលខេត្តសៀមរាប បានប្រើប្រាស់រថយន្តពន្លត់អគ្គិភ័យ ចំនួន២គ្រឿង និងទឹកអស់២រថយន្ត ដោយឡែកកងរាជអាវធហត្ថខេត្តសៀមរាប បានប្រើប្រាស់រថយន្តពន្លត់អគ្គិភ័យ ចំនួន២គ្រឿង និងទឹកអស់២រថយន្ត និងពន្លត់ឲ្យរលត់ជាស្ថាពរនៅវេលាប្រមាណ២រសៀលថ្ងៃដដែល។
អត្ថបទ និង រូបថត ៖ លោក ថាច់ ពិសុទ្ធ និង ខេង ឧត្តម
កែសម្រួលអត្ថបទ ៖ លោក សេង ផល្លី
