មូលនិធិគន្ធបុប្ផាកម្ពុជា ទទួលបានថវិកាពីគ្រឹះស្ថានអង្គរចំនួន ១,៥៧៥,៨០០ដុល្លារអាមេរិក ដើម្បីយកទៅប្រើប្រាស់ក្នុងការពិនិត្យ និងព្យាបាលជំងឺដល់កុមារ និងទារកដោយឥតគិតថ្លៃ នេះបើយោងតាមសេចក្ដីប្រកាសរបស់មូលនិធិគន្ធបុប្ផាកម្ពុជានៅថ្ងៃទី១៨ ខែមេសា ឆ្នាំ២០១៩នេះ។
ក្នុងសេចក្ដីប្រកាសដដែលនេះ បានបញ្ជាក់ថា ថវិកាជាមួយលានដុល្លារសហរដ្ឋអាមេរិចនេះ ត្រូវបានដកយកពីកម្រៃថ្លៃសំបុត្រ របស់ភ្ញៀវទេសចរអន្តរជាតិ ដែលបានចូលទស្សនាតំបន់រមណីយដ្ឋានអង្គរក្នុងត្រីមាសទី១ ឆ្នាំ២០១៩ ហើយថវិកានេះ មូលនិធិគន្ធបុប្ផាកម្ពុជា ទទួលបានកាលពីថ្ងៃទី០៥ ខែមេសា ឆ្នាំ២០១៩។
គួររំលឹកថា មូលនិធិគន្ធបុប្ផាកម្ពុជា ត្រូវបានបង្កើតឡើងកាលពីខែមេសា ឆ្នាំ២០១៨ ដោយមានសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជាស្ថាបនិក និងជាប្រធានកិត្តិយស ហើយទឹកប្រាក់ដែលមូលនិធិទទួលបានទាំងអស់ នឹងត្រូវទុកសម្រាប់ទ្រទ្រង់នូវកិច្ចដំណើរការប្រកបដោយចីរភាព ប្រសិទ្ធភាព និងគុណភាពរបស់មន្ទីរពេទ្យគន្ធបុប្ផាទាំង៥ទីតាំងនៅក្នុងប្រទេសកម្ពុជា ៕
អត្ថបទ និង រូបថត ៖ លោក បុង ឆវ័ន
កែសម្រួលអត្ថបទ ៖ លោក សេង ផល្លី
