ព្រះវិហារថ្មី រួមនឹងសមិទ្ធផលនានាមួយចំនួន ក្នុងវត្តជោរេនចេស្តា ហៅវត្តកណ្តាល ស្ថិតក្នុងភូមិបេង ឃុំជីក្រែង ស្រុកជីក្រែង ខេត្តសៀមរាប ដែលបានចាប់ផ្តើមសាងសង់តាំងពីឆ្នាំ២០១២ រហូតដល់ឆ្នាំ២០១៩ ដោយចំណាយថវិកាក្នុងការសាងសង់ចំនួន៥៧ម៉ឺន៨២៨ដុល្លារអាមេរិក ត្រូវបានប្រារព្ធពិធីសម្ពោធ និង កាត់ឫសសីមា ដាក់ឲ្យប្រើប្រាស់ជាផ្លូវការហើយ ដើម្បីថ្វាយប្រគេនព្រះសង្ឃ ពុទ្ធបរិស័ទ និង ប្រជាពលរដ្ឋគោរពបូជា ទៅតាមគន្លងប្រពៃណីសាសនា នាព្រឹកថ្ងៃទី២២ ខែមេសា ឆ្នាំ២០១៩នេះ ក្រោមវត្តមានឯកឧត្តមអ្នកឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប និង ជាតំណាងសម្តេចពិជ័យសេនា ទៀ បាញ់ ឧបនាយករដ្ឋមន្ទ្រី រដ្ឋមន្ត្រីក្រសួងការពារជាតិ និង លោក ពៅ ពិសិដ្ឋ អភិបាលរងខេត្ត ។
បើតាមរបាយការណ៍របស់គណៈកម្មការវត្ត បានឲ្យដឹងថា បន្ទាប់ពីក្រោយថ្ងៃរំដោះ៧មករាឆ្នាំ១៩៧៩មក នៅក្នុងឆ្នាំ១៩៨២ វត្តជោរេនចេស្តានេះ ត្រូវបានពុទ្ធបរិស័ទដង្ហែលោកគ្រូធម្មាចារ្យ វ៉ា អឿន យកទៅបំបួសក្នុងសំណាក់ព្រះគ្រូ កង ហេង ឧប្បសម្បទាក្នុងវត្តស្វាយខេត្តសៀមរាប ដើម្បីធ្វើជាព្រះគ្រូចៅអធិការវត្តនេះបន្តទៀត ហើយបច្ចុប្បន្ន ទីវត្តអារាមនេះ ត្រូវបានអាជ្ញាធរ និង ពុទ្ធបរិស័ទ ធ្វើការរៀបចំ ឡើងវិញ ដើម្បីជាទីកន្លែងទីសក្ការៈបូជារបស់ប្រជាពុទ្ធបរិស័ទ ។
មានប្រសាសន៍សំណេះសំណាលក្នុងឱកាសនោះ ឯកឧត្តមអ្នកឧកញ៉ាបណ្ឌិត សៀង ណាំ បានពាំនាំនូវការសាកសួរសុខទុក្ខ ពីសំណាក់សម្តេចតេជោ ហ៊ុន សែន , សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង សម្តេចពិជ័យសេនា ទៀ បាញ់ សម្រាប់បងប្អូនប្រជាពុទ្ធបរិស័ទនៅស្រុកជីក្រែង ដោយក្តីនឹករលឹក ព្រមទាំងបានសម្ដែងនូវការកោតសរសើរ ចំពោះបងប្អូនប្រជាពុទ្ធបរិស័ទ និង សប្បុរសជនទាំងអស់ ដែលជាកម្លាំងមហាសាមគ្គីមួយដ៏រឹងមាំ បានបរិច្ចាកនូវទ្រព្យធនផ្ទាល់ខ្លួន ដើម្បីលើកស្ទួយវិស័យព្រះពុទ្ធសាសនា ឲ្យមានការអភិវឌ្ឍរីកចម្រើន ទុកជាផលប្រយោជន៍រួមសម្រាប់ភិក្ខុសង្ឃ ប្រជាពុទ្ធបរិស័ទ ធ្វើបុណ្យធ្វើទានក្នុងផ្លូវព្រះពុទ្ធសាសនា ដែលជាសាសនារបស់រដ្ឋ ។
ឯកឧត្តមអ្នកឧកញ៉ាបណ្ឌិត សៀង ណាំ មានប្រសាសន៍ទៀតថា ក្រោមគោលនយោបាយឈ្នះៗ របស់សម្តេចតេជោ ហ៊ុន សែន ជាប្រមុខដឹកនាំប្រទេស បានធ្វើឲ្យប្រទេសជាតិមានសុខសន្តិភាព និង មានការអភិវឌ្ឍរីកចម្រើនលើគ្រប់វិស័យទាំងអាណាចក្រ និងពុទ្ធចក្រ និង ដោយកត្តាសន្តិភាពនេះហើយ បានធ្វើឲ្យយើងធានាបាននូវការសាងសង់ព្រះវិហារ ដ៏ស្កឹមស្កៃនៅចំពោះមុខនេះ ខណៈពីមួយឆ្នាំទៅមួយឆ្នាំ វិស័យព្រះពុទ្ធសាសនា បានកំពុងមានការអភិវឌ្ឍរីកចម្រើន ហើយត្រូវបានរាជរដ្ឋាភិបាលយកចិត្តទុកដាក់ និង លើកកម្ពស់សម្រាប់ប្រជាពលរដ្ឋខ្មែរយើងគោរពប្រតិបត្តិ ស្របទៅតាមទំនៀមទម្លាប់ប្រពៃណីជាតិតទៅថ្ងៃអនាគត ។
នៅក្នុងឱកាសនោះដែរ ឯកឧត្តមអ្នកឧកញ៉ា បណ្ឌិត សៀង ណាំ បាននាំយកថវិកាសម្តេចពិជ័យសេនា ទៀ បាញ់ ចំនួន៥.០០០ដុល្លារ , ថវិកាឯកឧត្តមផ្ទាល់និងលោកជំទាវ ចំនួន៥.០០០ដុល្លារ និងថវិកាគណៈអភិបាលខេត្តសៀមរាប ២លានរៀល និង ថវិកាសប្បុរសជនមួយចំនួនទៀត ប្រគេនជូនវត្តសម្រាប់ប្រើប្រាស់ទៅតាមតម្រូវការ ៕
អត្ថបទ និង រូបថត ៖ លោក ស៊ាន សុផាត និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
