ថ្លែងក្នុងឱកាសប្រារព្ធពិធីកាត់ឬសសីមាវត្ត ជោរេនចេស្តា ហៅវត្តកណ្តាល ស្ថិតនៅក្នុងភូមិបេង ឃុំជីក្រែង ស្រុកជីក្រែងកាលពីព្រឹកថ្ងៃទី២២ ខែមេសា ឆ្នាំ២០១៩នេះ លោក ពៅ ពិសិដ្ឋ អភិបាលរងខេត្តសៀមរាប បានអំពាវនាវឲ្យមន្ត្រីថ្នាក់ស្រុក យកចិត្តទុកដាក់ ស្វែងរកប្រភពទឹកស្អាត ដើម្បីជួយដល់ប្រជាពលរដ្ឋ សម្រាប់បម្រើតាមតម្រូវការ រួមទាំងការតាមដានសភាពការណ៍ខ្វះខាតទឹករបស់ប្រជាពលរដ្ឋ ខណៈអាកាសធាតុ កើនមានឡើងកំដៅខ្លាំងនៅពេលបច្ចុប្បន្ន ។
លោកពៅ ពិសិដ្ឋ បានលើកឡើងទៀតថា ការប្រែប្រួលអាកាសធាតុ បានធ្វើឲ្យប៉ះពាល់ជាសាកល ដូច្នេះការកើនឡើងកំដៅបែបនេះ មិនមែនមានតែប្រទេសកម្ពុជាយើងនោះទេ នៅប្រទេសមួយចំនួនក៏មានការឡើងកំដៅពី៣៨ទៅ៣៩អង្សាសេដែរ ដូចជានៅប្រទេសថៃ ប្រទេសកូរ៉េខាងត្បូង និងប្រទេសជប៉ុន ជាដើម ។
គួររំលឹកថា កាលពីថ្ងៃទី១៩ ខែមេសា ឆ្នាំ២០១៩កន្លងទៅនេះ លោក ពៅ ប៊ុនធឿន អភិបាលស្រុកជីក្រែង រួមសហការជាមួយម្ចាស់សេវាករទឹកស្អាត និង អាជ្ញាធរឃុំគោកធ្លកលើ បានចុះត្រួតពិនិត្យអំពីស្ថានភាពទឹកនៅទំនប់ម្កាក់ ដែលនឹងត្រូវធ្វើការបូមដាក់តាមរថយន្ត យកទៅផ្គត់ផ្គង់ ចែកចាយដល់បងប្អូនប្រជាពលរដ្ឋ ដែលខ្វះខាតទឹកប្រើប្រាស់នៅខែខាងមុខ ក្នុងឃុំចំនួន៥ រួមមានឃុំស្ពានត្នោត , ឃុំកំពង់ក្តី , ឃុំគោកធ្លកក្រោម , ឃុំជីក្រែង និងឃុំអន្លង់សំណរ ។
ក្នុងឱកាសនោះដែរលោក ពៅ ប៊ុនធឿន បានណែនាំដល់ លោកមេឃុំគោកធ្លកលើ រួមនឹងសមត្ថកិច្ចប៉ុស្តិ៍នគរបាលរដ្ឋបាល និង ប្រជាការពារ ត្រូវធ្វើការថែរក្សានូវប្រភពទឹកនេះ ឲ្យបានល្អ ហើយក៏មិនត្រូវអនុញ្ញាតឲ្យប្រជាពលរដ្ឋណាម្នាក់ មកធ្វើការនេសាទ ឬ បូមទឹកចាប់ត្រី ដែលធ្វើឲ្យទឹកខូច គុណភាព មិនអាចប្រើប្រាស់បាននោះ ៕
អត្ថបទ និង រូបថត : លោក ខេង ឧត្តម
កែសម្រួលអត្ថបទ : លោក លីវ សាន្ត
