ថ្ងៃទី២៣ ខែមិថុនា ឆ្នាំ ២០២៣ នាសណ្ឋាគាររ៉ូយ៉ាល់អង្គរខេត្តសៀមរាប និយ័តករធានារ៉ាប់រងកម្ពុជា(ន.ធ.ក.) បានរៀបចំសិក្ខាសាលាស្តីពី “អត្ថប្រយោជន៍នៃការធានា-រ៉ាប់រងជាកាតព្វកិច្ច” ក្រោមអធិបតីភាពឯកឧត្តម រស់ សីលវ៉ា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួង ដើម្បីអនុវត្តប្រកាសអន្តរក្រសួងស្តីពីកាតព្វកិច្ចធានារ៉ាប់រង , ឯកឧត្តម ប៊ូ ច័ន្ទភីរូ អគ្គនាយក នៃ ន.ធ.ក. និងជាអនុប្រធានក្រុមការងារអន្តរក្រសួង និង លោក អ៊ឹង គឹមលាង អភិបាលរងខេត្តសៀមរាប ដោយមានការចូលរួមពីសំណាក់លោក លោកស្រីជាតំណាងសមាជិកក្រុមការងារអន្តរក្រសួង តំណាងមន្ទីរ ស្ថាប័នពាក់ព័ន្ធខេត្ត អាជ្ញាធរមានសមត្ថកិច្ច និងគ្រឹះស្ថានឯកជន។
អ៊ឹង គឹមលាង អភិបាលរងខេត្តសៀមរាប មានប្រសាសន៍ថា៖សិក្ខាសាលាផ្សព្វផ្សាយនេះ គឺពិតជាមានសារៈសំខាន់ណាស់ ជាពិសេសនៅក្នុងបរិការណ៍នៃការថមថយវិបត្តិកូវីដ-១៩ កន្លងទៅនេះ ក្នុងន័យរួមចំណែកដល់ការជំរុញនិងលើកកម្ពស់សេវាដឹកជញ្ជូនអ្នកដំណើរទេសចរណ៍ជាតិនិងអន្តរជាតិ មកកាន់ខេត្តសៀមរាប ខណៈដែលព្រះរាជាណាចក្រកម្ពុជា បានងើបឡើងវិញជាបណ្តើរៗលើគ្រប់វិស័យ ដែលនេះកើតឡើងពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់ និងចក្ខុវិស័យវែងឆ្ងាយរបស់ សម្ដេចតេជោ ហ៊ុនសែន ជានាយករដ្ឋមន្ត្រី ដែលបានដាក់ចេញនូវវិធានការសុខាភិបាលដ៏ម៉ត់ចត់និងទាន់ពេលវេលា ពិសេសការចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេស ដែលជាយុទ្ធសាស្រ្តគន្លឹះបង្កើតឱ្យមាននូវភាពសុំាក្នុងសហគមន៍ ដើម្បីជាមូលដ្ឋានសម្រាប់ស្តារ និងជំរុញការងើបឡើងវិញនៃសកម្មភាពសេដ្ឋកិច្ច និងសង្គមក្នុងស្រុក។
លោកអភិបាលរងខេត្តបន្ថែមថា៖បច្ចុប្បន្ននេះ ខេត្តសៀមរាបមានក្រុមហ៊ុនឯកជនចំនួន ៩ ដែលកំពុងបោះទីតាំង និងធ្វើប្រតិបត្តិការអាជីវកម្មផ្តល់សេវាធានារ៉ាប់រង ដោយផ្ទាល់នៅក្នុងខេត្ត ដូច្នេះក្នុងបរិបទនេះ សូមលើកទឹកចិត្ត និងសំណូមពរដល់ និយ័តករធានារ៉ាប់រងកម្ពុជា ជួយជំរុញឱ្យមានការវិនិយោគបើកសាខាក្រុមហ៊ុនធានារ៉ាប់រង ឬសាខាក្រុមហ៊ុនអន្តរការីធានារ៉ាប់រង នៅក្នុងខេត្តសៀមរាប ដើម្បីបង្កើតការងារជូនប្រជាពលរដ្ឋក្នុងមូលដ្ឋានដោយផ្ទាល់ និងនៅជ្រុងម្ខាងទៀត រួមចំណែកក្នុងការសម្រាលបន្ទុកផ្នែកហិរញ្ញវត្ថុ ក៏ដូចជាបង្កើតបានបរិយាកាសធុរកិច្ចឱ្យកាន់តែល្អប្រសើរ ក្នុងការចូលរួមចំណែកអភិវឌ្ឍសេដ្ឋកិច្ចខេត្តផងដែរ ។
ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ មានប្រសាសន៍ថា សិក្ខាសាលានេះ ជាយន្ដការផ្សព្វផ្សាយ និងអប់រំដល់សាធារណជនឱ្យបានជ្រួតជ្រាបពីការធានារ៉ាប់រងឱ្យកាន់តែទូលំទូលាយ ក្នុងគោលបំណងរួមចំណែកការពារផលប្រយោជន៍ សិទ្ធិ និងកាតព្វកិច្ចរបស់អ្នកប្រើប្រាស់ធានារ៉ាប់រង មន្ត្រីនៃក្រសួងស្ថាប័នដែលមានសមត្ថកិច្ចពាក់ព័ន្ធ វិស័យឯកជន និងសាធារណជន ដោយបានផ្តោតសំខាន់លើ មូលដ្ឋានគ្រឹះនៃការធានារ៉ាប់រង ប្រភេទនៃការធានារ៉ាប់រង អត្ថប្រយោជន៍នៃការធានារ៉ាប់រង តួនាទីនិងភារកិច្ចរបស់ ន.ធ.ក.និងជាពិសេសការធានារ៉ាប់រងជាកាតព្វកិច្ច ដូចមានចែងក្នុងច្បាប់ស្តីពីការធានារ៉ាប់រងឆ្នាំ២០១៤។
ឯកឧត្តមបន្តថា វិស័យធានារ៉ាប់រង បានរួមចំណែកនិងដើរតួរនាទីគួរឱ្យកត់សម្គាល់នៅក្នុងសេដ្ឋកិច្ចកម្ពុជា តែយ៉ាងណាក្តី បើធៀបទៅនឹងប្រទេសនៅក្នុងតំបន់ឃើញថា អត្រាវិភាគទានធានារ៉ាប់រងនិងដង់ស៊ីតេធានារ៉ាប់រងរបស់ម្ចាស់យានយន្ត ម្ចាស់ការដ្ឋាននៅមានកម្រិតទាប ហើយបច្ចុប្បន្ន បន្ទុកសង្គមកើតចេញពីគ្រោះថ្នាក់លើដងផ្លូវ គឺជាបញ្ហាប្រឈមមួយរបស់រាជរដ្ឋាភិបាល ដែលកើតមានជារៀងរាល់ថ្ងៃក្នុងអត្រាមួយខ្ពស់គួរឱ្យកត់សម្គាល់ ហើយបើផ្អែកតាមរបាយការណ៍ដែលទទួលបានក្នុងឆ្នាំ២០២២ មានតែយានយន្ដនិងទោចក្រយានយន្ដ ចំនួន ២៩៧ ២៨៣ គ្រឿងប៉ុណ្ណោះ ដែលមានការធានារ៉ាប់រង ក្នុងនោះយានយន្ដអាជីវកម្មចំនួន ២៥ ៦០៧ គ្រឿង។
ក្នុងឱកាសនោះដែរ ឯកឧត្តម បានទាមទារឱ្យមានការជំរុញបន្ថែមជាពិសេសបញ្ជ្រាបការយល់ដឹងអត្ថប្រយោជន៍នៃការធានារ៉ាប់រងឱ្យបានដល់ប្រជាពលរដ្ឋនិងបង្កើនទំនុកចិត្តទៅដល់សាធារណៈជនក្នុងការប្រើប្រាស់សេវាធានារ៉ាប់រងដែលមាននៅក្នុងប្រទេសកម្ពុជា ក្នុងគោលបំណងដោះស្រាយបញ្ហា និងដើម្បីជំរុញការអនុវត្តការធានារ៉ាប់រងជាកាតព្វកិច្ចទាំងនេះប្រកបដោយវឌ្ឍនភាពខ្លាំងក្លា រាជរដ្ឋាភិបាល ថ្មីៗនេះ បានធ្វើបច្ចុប្បន្នភាពសមាសភាពក្រុមការងារអន្តរក្រសួង ដែលជាសេនាធិការមានតួនាទីតាមដាននិងត្រួតពិនិត្យការអនុវត្តការធានារ៉ាប់រងជាកាតព្វកិច្ចទាំងនេះ និងសិក្សារៀបចំលិខិតបទដ្ឋានគតិយុត្តក្រោមច្បាប់៕
អត្ថបទនិងរូបភាព: លោក យូ វង្ស
កែសម្រួល៖ លោក លីវ សាន្ត
