កាលពីព្រឹកថ្ងៃទី០២ ខែសីហា ឆ្នាំ២០២៣នេះ ស្នាក់ការឧទ្យានុរក្ស ផ្ទះស្នាក់កេសរកូល នៃឧទ្យានជាតិព្រះជ័យវរ្ម័ន-នរោត្តម គូលែន ស្ថិតក្នុងភូមិសាស្ត្រភូមិខ្វាវឃុំត្បែង ស្រុកបន្ទាយស្រី ខេត្តសៀមរាប ត្រូវបានប្រារព្ធពិធីកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការ ក្រោមអធីបតីភាព ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដោយមានការចូលរួមពីសំណាក់ថ្នាក់ដឹកនាំពីក្រសួងបរិស្ថាន ក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ រដ្ឋបាលថ្នាក់ក្រោមជាតិ មន្ទីរ និងអង្គភាពពាក់ព័ន្ធ ដៃគូអភិវឌ្ឍន៍ពាក់ព័ន្ធ វិស័យឯកជន មន្ត្រីឧទ្យានុរក្ស អាជ្ញាធរមូលដ្ឋាន និងតំណាងសហគមន៍មូលដ្ឋានសរុបប្រមាណ ៦០០នាក់។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន មានប្រសាសន៍ថា ការសាងសង់អគារនេះឡើងក្នុងគោលបំណង លើកកម្ពស់សុខមាលភាព និងសេចក្តីថ្លៃថ្នូររបស់មន្ត្រីឧទ្យានុរក្សក្នុងនាមជាឆ្មាំការពារព្រៃ ផ្តល់នូវបរិយាកាសការងារដ៍ល្អជូនមន្រ្តីឧទ្យានុរក្ស ដែលជាភ្នាក់ងារអនុវត្តច្បាប់ទាំងនេះក្នុងដំណើរការប្រចាំថ្ងៃ ជាមណ្ឌលផ្តល់ និងផ្លាស់ប្តូរព័ត៌មាន ទីតាំងសម្រាប់រៀបចំកិច្ចប្រជុំនិងផ្តល់ការបណ្តុះបណ្តាលនានា និងធ្វើជាទីកន្លែងប្រកបដោយសុវត្ថិភាពសម្រាប់រក្សាទុកសម្ភារៈជាមធ្យោបាយបទល្មើសដែលបានរឹបអូស សំដៅពង្រឹងនិងបង្កើនប្រសិទ្ធិភាពនៃការគ្រប់គ្រង កិច្ចការពារ និងអភិរក្សធនធានធម្មជាតិ និងជីវៈចម្រុះ លើកកម្ពស់ការសិក្សាស្រាវជ្រាវ ការថែរក្សា និងអភិរក្សធនធានពិន្ធុ ការបម្រើឱ្យទេសចរណ៍ផ្សារភ្ជាប់នឹងទឹកដី និងការលើកកម្ពស់សេដ្ឋកិច្ចមូលដ្ឋាន។
ឯកឧត្តម សាយ សំអាល់ បានចាត់ទុកសមិទ្ឋផលដែលកើតមានឡើងនៅពេលនេះគឺសម្រាប់បំរើឱ្យសហគមន៍ ទាំងអស់គ្នា និងជាការផ្តល់ប្រយោជន៍ដល់ប្រជាជនកម្ពុជាទាំងមូល ហើយការសម្រេចជ្រើសរើសយកទីតាំងក្បែរភ្នំគូលែនសម្រាប់បង្កើតអគារទីស្នាក់ការក៏ដូចជាផ្ទះស្នាក់នេះ ក៏ព្រោះតែភ្នំគូលែនជាមរតកធនធានធម្មជាតិជីវចម្រុះ ជាមរតកដូនតាយើង និងជាមរតកសេដ្ឋកិច្ច ជាគុណប្រយោជន៍ដ៏មានអំណោយផលសម្រាប់ទាញយកគុណប្រយោជន៍ បំរើឱ្យជីវភាពរស់នៅរបស់បងប្អូនក្នុងសហគមន៍បានកាន់តែល្អប្រសើរឡើង ជារួម អាគារទីស្នាក់ការនេះ នឹងផ្តល់ការគាំទ្រយ៉ាងសំខាន់ សម្រាប់ការងារពង្រឹងការអនុវត្តច្បាប់ ការអភិរក្សធនធានជីវៈចម្រុះ និងរួមចំណែកយ៉ាងសំខាន់ដើម្បីធ្វើឱ្យគម្រោងសម្រេចបាននូវគោលបណង ធ្វើឱ្យប្រសើរដល់ការគ្រប់គ្រងតំបន់ការពារធម្មជាតិ ជំរុញឱកាសសម្រាប់ការអភិវឌ្ឍទេសចរណ៍ធម្មជាតិ និងបង្កើនច្រវ៉ាក់តម្លៃអនុផលព្រៃឈើ។
ឯកឧត្តម រដ្ឋមន្ត្រី ជឿជាក់ថា៖មិនយូរប៉ុន្មាននៅតំបន់ក្បែរមជ្ឈមណ្ឌលកេសរកូល នៃឧទ្យានជាតិព្រះជ័យវរ្ម័ន-នរោត្តម ភ្នំគូលែននឹងក្លាយជាទីវាល ហាត់ប្រាណ លំហែកាយបែបធម្មជាតិ ដើម្បីស្រូបខ្យល់អាកាសបរិសុទ្ឋ នាពេលរសៀល ឬនៅថ្ងៃសម្រាកចុងសប្តាហ៍ ដោយសារតំបន់នេះបាន បង្កើតឱ្យមានជាអាទិ៍ហាងកាហ្វេ ផ្សារលក់ផលិតផលធម្មជាតិ ផ្ទះស្នាក់ ការស្តារស្រះធម្មជាតិ ដែលវានឹងផ្តល់ភាពទាក់ទាញបន្ថែមទៀតដល់ភ្ញៀវទេសចរណ៍ជាតិ និងអន្តរជាតិ ក៏ដូចជាជួយលើកកម្ពសជីវភាពរស់នៅរបស់ប្រជាសហគមន៍មូលដ្ឋាន និងរួមចំណែកដល់ការអនុវត្តគោលនយោបាយទេសចរណ៍ផ្សារភ្ជាប់នឹងទឹកដី ។
គួររំលឹកថា ស្នាក់ការឧទ្យានុរក្សនេះបានសាងសង់ពី ខែសីហា ឆ្នាំ២០២២ និងរួចរាល់ជាស្ថាពរនៅ ខែឧសភាឆ្នាំ២០២៣ ចំណាយថវិកា អស់ចំនួន ១៦០.៦៨៥ ដុល្លារអាមេរិក គាំទ្រដោយក្រសួងបរិស្ថាន តាមរយៈ គម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» ។
ទីតាំងសាងសង់ ទីស្នាក់ការនេះ គឺជាចំណុចកណ្តាល ដែលអាចផ្តល់ភាពងាយស្រួលក្នុងការធ្វើដំណើរវាងស្រុកស្វាយលើ ស្រុកបន្ទាយស្រី និងទីរួមខេត្តសៀមរាប ជាពិសេស ដើម្បីសម្រួលដល់ការងារត្រួតពិនិត្យអ្នកធ្វើដំណើរឡើងចុះឧទ្យានជាតិ ព្រះជ័យវរ្ម័ន-នរោត្តម ភ្នំគូលែន ។ អគារមានចំនួន៣នៅជាប់គ្នា គឺអគារធំនៅចំកណ្តាល មានទំហំ១៦ម៉ែត្រគុណនឹង១៦ម៉ែត្រ កម្ពស់ ១ ជាន់ និងអគារតូចៗចំនួន២ អមសងខាង មានទំហំ១១ម៉ែត្រគុណនឹង៥,៥ ម៉ែត្រ កម្ពស់ ១ ជាន់ នៃអគារនីមួយៗ សង់លើផ្ទៃដីសរុប ទំហំ១០ ហិកតា ស្ថិតក្នុងភូមិសាស្ត្រជាប់ជើងភ្នំគូលែន ទល់មុខសួនកេសរកូល ៕
អត្ថបទ និងរូបភាព៖ លោក យូ វង្ស និង លោក ឈិត សាវី
កែសម្រួលអត្ថបទ ៖ លោក លីវ សាន្ត
