អាជ្ញាធរជាតិអប្សរា និងក្រុមហ៊ុនធានារ៉ាប់រងមែនូឡាយ បានសហការគ្នាដាំកូនឈើចម្រុះជិតមួយពាន់ដើម និងដាំស្មៅ ១,០០០ម៉ែត្រការ៉េ នៅតំបន់រមណីយដ្ឋានអង្គរ ដើម្បីអភិរក្សរមណីយដ្ឋានអង្គរ បេតិកភណ្ឌពិភពលោក ជាពិសេសលើកកម្ពស់សោភ័ណ្ឌភាពទេសភាពវប្បធម៌អង្គរ។ យុទ្ធនាការដាំស្មៅ និងដើមឈើនេះ ធ្វើងឡើង នៅថ្ងៃទី០៣ ខែសីហាឆ្នាំ២០២៣នេះ ស្ថិតនៅអតីតលំនៅឋានប្រជាពលរដ្ឋស្ម័គ្រចិត្ដទៅរស់នៅភូមិធម្មជាតិរុនតាឯកស្រុកបន្ទាយស្រី និងភូមិអភិវឌ្ឍន៍ថ្មីពាក់ស្នែង ស្រុកអង្គរធំ។
ឯកឧត្ដម ឡុង កុសល អគ្គនាយករងនៃអាជ្ញាធរជាតិអប្សរា មានប្រសាសន៍ថា រមណីយដ្ឋានអង្គរ មានតម្លៃមិនអាចកាត់ថ្លៃបាន ដែលភ្ញៀវទេសចរមកពីប្រទេសនានាលើសកលលោកតែងតែប្រាថ្នាចង់មកទស្សនា។ ដូច្នេះការងាររៀបចំសោភណ្ឌភាពនៅជុំវិញតំបន់អង្គរនេះ គឺជាករណីចាំបាច់ដែលត្រូវគិតគូរខ្ពស់ ដើម្បីឱ្យមានទេសភាពពណ៌បៃតងគ្រប់រដូវកាល។ ឯកឧត្តម បន្តថា តំបន់អតីតលំនៅឋានប្រជាពលរដ្ឋនេះ ត្រូវបានណែនាំឱ្យមានការដាំដើមឈើ និងស្មៅឡើងវិញ ដើម្បីរក្សាភាពស្រស់ស្អាត និងបង្កើនភាពបៃតងនៅជុំវិញតំបន់រមណីយដ្ឋានអង្គរ។ ការដាំដើមឈើ និងស្មៅ នៅទីនេះជាផ្នែកមួយតូចប៉ុណ្ណោះ ព្រោះថានៅមានផ្ទៃដីជាច្រើនទីតាំងទៀតដែលត្រូវដាំដុះឡើងវិញ ដែលការដាំនេះទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ដែលមានគោលបំណងកែលម្អដីទំនេរ ដែលប្រជាពលរដ្ឋបានប្រគល់ជូនរដ្ឋវិញឱ្យក្លាយជាតំបន់បៃតង មានដើមឈើ និងវាលស្មៅ សម្រាប់ជាទ្រនាប់ការពារដ៏សំខាន់ដល់ប្រាង្គប្រាសាទ និងជាប្រយោជនន៍ដល់មនុស្សជាតិទាំងមូល។ ឯកឧត្ដម បន្ថែមថា យុទ្ធនាការដាំដើមឈើ និងស្មៅ នៅទីនេះគឺជាការចូលរួមចំណែកថែរក្សាទេសភាពវប្បធម៌នៅតំបន់អង្គរ ឱ្យកាន់តែល្អប្រសើ ពោលប្រជាពលរដ្ឋបានស្ម័គ្រចិត្តផ្លាស់ប្តូរទីលំនៅចេញពីតំបន់អង្គរ ទៅកាន់ទីកន្លែងថ្មី ដែលរាជរដ្ឋាភិបាលបានគាំទ្រ និងផ្តល់ជូន។ទេសភាពវប្បធម៌នៅក្នុងតំបន់រមណីយដ្ឋានអង្គរ បច្ចុប្បន្នមានភាពស្រស់ស្អាត បៃតងគ្រប់រដូវកាល ក្រោមការយកចិត្តទុកដាក់ថែទាំ ពីសំណាក់អាជ្ញាធរជាតិអប្សរា ដូច្នេះយើងត្រូវបន្តចូលរួមក្នុងកិច្ចការនេះជាបន្តបន្ទាប់ទៀត។
បើតាមឯកឧត្ដម ឡុង កុសល បានបញ្ជាក់ថា ចាប់ពីឆ្នាំ២០០៤ ដល់បច្ចុប្បន្ននេះ អាជ្ញាធរជាតិអប្សរា បានដាំកូនឈើជាងពីរលានដើមនៅតំបន់រមណីដ្ឋានអង្គរ និងកូនឈើគ្រប់ប្រភេទរាប់ម៉ឺនដើមទៀត បានផ្ដល់ជូនប្រជាពលរដ្ឋ ព្រះសង្ឃគ្រប់បណ្ដារាជធានី ខេត្ដ ឱ្យទៅដាំនៅតំបន់ដែលពួកគាត់ចង់បាន។ ជាមួយគ្នានោះ អាជ្ញាធរជាតិអប្សរា នៅតែបន្ដសហការជាមួយដៃគូរឯកជន ក៏ដូចជាស្ថានប័នរដ្ឋចូលរួមដាំកូនឈើជាបន្ដបន្ទាប់ ដើម្បីធ្វើយ៉ាងណាឱ្យតំបន់រមណីយដ្ឋានអង្គរ ពោរពេញដោយទេសភាពវប្បធម៌គ្រប់រដូវកាល៕
អត្ថបទ និងរូបភាព: លោក បូ សាវី និងលោកយូ វង្ស កែសម្រួលដោយ លីវ សុខុន!!!
