សាលាកុមារសុវណ្ណភូមិ ខេត្ដសៀមរាប បានបំផុសគំនិតកុមារតូច នៅតាមសាលារៀន ឱ្យធ្វើសកម្មភាពសម្អាតបន្ទប់រៀន សាលារៀន និងបរិស្ថានជំរុញវិញខ្លួន ដើម្បីជម្រុញអោយពួកគាត់ចេះស្រលាញ់ភាពស្អាត និងមានអនាម័យ នៅតាមសាលា ក៏ដូចនៅតាមទីសាធារណ:។
កញ្ញា សួរ សីលា នាយិកាសាលារៀនកុមារសុវណ្ណភូមិសាខាផ្សារញ៉ែ ខេត្ដសៀមរាប បានឱ្យដឹងថា កាលពីថ្ងៃទី០៥ ខែសីហា ឆ្នាំ២០២៣នេះថា រៀងរាល់ខែ សាលាបានបណ្តុះទម្លាប់សម្អាតជាប្រចាំសម្រាប់ប្អូនៗសិស្សានុសិស្ស ជាមួយពាក្យថា សាលារៀនស្អាត – សិស្ស មានសុខភាពល្អ បណ្ដុះទម្លាប់ក្លាយជាកូនល្អ និងជាពលរដ្ឋល្អសម្រាប់សង្គមជាតិ។កញ្ញា នាយិកា បន្ដថា ការអប់រំកុមារតូចឱ្យស្រលាញ់ភាពស្អាតនាពេលនេះ គឺស្របពេលសាលាត្រូវបានអនុវត្តប្រារព្ធទិវាសាលារៀនស្អាត ហៅថា ហ្វាយអេសដេ( 5 S Day) ដោយជ្រើសរើសថ្ងៃទី៥ ជារៀងរាល់ខែ សម្រាប់ប្រារព្ធកម្មវិធីនេះ គោលបំណង ដើម្បីជម្រុញអោយមានការចូលរួមរបស់សិស្សានុសិស្ស ក្នុងការធ្វើសកម្មភាពសម្អាតថ្នាក់រៀន ទីធ្លាសាលារៀន បរិស្ថានជំវិញវិញខ្លួនរបស់ពួកគាត់ ជាពិសេស ចង់អោយពួកគាត់ចេះស្រលាញ់ភាពស្រស់ស្អាត និងមានអនាម័យជានិច្ច មិនថានៅសាលារៀន នៅផ្ទះ ឬនៅទីសាធារណ:ឡើយ។ជាមួយគ្នានោះ សាលារៀនសុវណ្ណភូមិ មិនត្រឹមតែការធ្វើសកម្មភាពនៅតាមសាលារៀនប៉ុណ្ណោះទេ ថែមទាំងបានធ្វើសកម្មភាពសំអាតបរិស្ថាននៅតាមទីសាធារណ:ផងដែរ។
បើតាមកញ្ញា សួរ សីលា បានបញ្ជាក់ថា សាលាកុមារសុវណ្ណភូមិ បានអនុវត្តប្រារព្ធទិវាសាលារៀនស្អាត( 5S Day ) ចាប់តាំងពីសាលាកុមារសុវណ្ណភូមិគ្រប់ទីដែលបើកដំណើរការមកម្លេះ។ ការបណ្តុះទម្លាប់សម្អាតជាប្រចាំសម្រាប់ប្អូនៗសិស្សានុសិស្ស ជាមួយពាក្យថា សាលារៀនស្អាត សិស្សមានសុខភាពល្អ។ ដោយសារសាលាកុមារសុវណ្ណភូមិ ផ្តោតសំខាន់ទៅលើក្មេងតូចចាប់ពី២ឆ្នាំឡើងទៅ ដូច្នេះហើយការបណ្តុះមូលដ្ឋានគ្រឹះកុមារអោយបានត្រឹមត្រូវ គឺជារឿងសំខាន់ខ្លាំងណាស់ សម្រាប់ការអប់រំ។សាលាកុមារសុវណ្ណភូមិ ជាសាលាមុនតេស្តសេរីទំនើបថ្មីមួយ នៅកម្ពុជាដែលមាន បេសកម្ម ចក្ខុវិស័យ គុណតម្លៃច្បាស់លាស់សម្រាប់កុមារតូចៗ នៅក្នុងការថែទាំ និងការសិក្សា អប់រំស្របតាម សម័យឌីជីថល៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
