សិស្ស និស្សិតប្រមាណជិត ១០០នាក់ នៅសាកលវិទ្យាល័យអង្គរ ខេត្ដសៀមរាប បានទទួលការបណ្ដុះបណ្ដាលផ្នែកកសាងសមត្ថភាពសម្រាប់ការអភិវឌ្ឍន៍ទេសចរណ៍ប្រកបដោយនិរន្ដរភាព ក្នុងយុគ្គសម័យសន្ដិភាព និងការអភិវឌ្ឍន៍។ វគ្គបណ្ដុះបណ្ដាល ស្ដីពីក្នុងដំណើរឆ្ពោះទៅរកការស់នៅប្រកបដោយសុខសន្ដិភាពក្នុងសហគមន៍អាស៊ី ដែលធ្វើឡើងកាលពីរសៀលថ្ងៃទី០៥ ខែសីហា ឆ្នាំ២០២៣ នៅសាកលវិទ្យាលអង្គរ ក្រុងសៀមរាប ក្រោមជំនួយមូលនិធិអ៊ឺរ៉ាស៊ី ដែលមានមូលដ្ឋាននៅប្រទេសជប៉ុន។
លោកសាស្រ្តាចារ្យបណ្ឌិត CHUNG JOON KON អនុប្រធានមូលនិធិអ៊ឺរ៉ាស៊ី និងជាអ្នកជំនាញនយោបាយ និងសេដ្ឋកិច្ចនៃប្រទេសជប៉ុន បានឱ្យដឹងថាមូលនិធិនេះ បានបង្កើតឡើងនៅឆ្នាំ២០១០ ដែលមានគោលបំណងធ្វើយ៉ាងណាអប់រំឱ្យពិភពលោកគ្មានជម្លោះទាស់ទែងគ្នា ពោលគឺធ្វើឱ្យពិភពលោកទាំងមូលឆ្ពោះទៅរកសុខសន្ដិភាព និងការអភិវឌ្ឍន៍។ ជាក់ស្ដែងការផ្ដល់មូលនិធិជូនសាកលវិទ្យាល័យអង្គរ សម្រាប់បណ្ដុះបណ្ដាលកសាងសមត្ថភាពការអភិវឌ្ឍន៍ទេសចរណ៍នាពេលនេះ គឺចង់ឱ្យសិស្ស និស្សិតមានចំណេះដឹងពីទំនាក់ទំនងល្អជាមួយអ្នកទេសចរ ព្រោះលោកយល់ថា ប្រទេសកម្ពុជា មានសុខសន្ដិភាព មានការអភិវឌ្ឍន៍ ជាពិសេសខេត្ដសៀមរាប ជាតំបន់ទេសចរណ៍ដែលមានភ្ញៀវទេសចនៅលើពិភពលោកមកទស្សនាប្រាសាទអង្គរវត្ដជារៀងរាល់ថ្ងៃ ទើបផ្ដល់មូលនិធិនេះ ដើម្បីបណ្ដុះបណ្ដាល និស្សិតឱ្យគាត់បានយល់ច្បាស់ពីការអភិវឌ្ឍណ៍ទេសចរណ៍ប្រកបដោយនិរន្ដរភាព នាយុគ្គសម័យសន្ដិភាព។ លោក បន្តថា បើប្រទេសជាតិគ្មានសន្ដិភាពទេ គឺគ្មានភ្ញៀវទេចរទៅកំសាន្ដនោះឡើយ។
ជាមួយគ្នានោះការបណ្ដុះបណ្ដាលនាពេលនេះ លោកចង់ឱ្យពួកគាត់ ទៅថ្ងៃអនាគតមានការអត់ធ្មត់មិនមានជម្លោះនឹងគ្នា ក្នុងការប្រគួតប្រជែងវិស័យទេសចរណ៍ជាលក្ខណ:មហិច្ចិតាលោភលន់ គឺត្រូវការប្រគួតប្រជែងបែបសន្ដិភាព។ លោកបន្ដទៀតថា លោកបានបណ្ដុះបណ្ដាលឱ្យនិស្សិតមានចំណេះបែបនេះបានចំនួនជាង ៥៥០សាកលវិទ្យាល័យហើយនៅលើពិភពលោក។
លោកបណ្ឌិត ញិល រដ្ឋា សាកលវិទ្យាធិការ នៃសាកលវិទ្យាល័យអង្គរ មានប្រសាសន៍ថា សម្រាប់មូលនិធិនេះបានជួយដល់សាកលវិទ្យាល័យនេះឲ្យសម្រេចនូវគោលបំណងរបស់ខ្លួន គឺផ្តល់នូវជំនាញចំណេះដឹងជាមូលដ្ឋាន(ជំនាញទន់) ជូនដល់សិក្ខាម សិស្ស និស្សិតនៅសាកលវិទ្យាល័យ ដើម្បីប្រតិបត្តិនៅកន្លែងការងារប្រកបដោយប្រសិទ្ធភាព។ ដោយឡែកបានរួមចំណែកជាមួយរាជរដ្ឋាភិបាល ដើម្បីកសាងការពារសន្តិភាព និងការអភិវឌ្ឍន៍ប្រកបដោយនិរន្តរភាពនៅទូទាំងប្រទេស ក៏ដូចជាសលកលោកផងដែរ។ លោកក៏បានថ្លែងអំណរគុណដល់រាជរដ្ឋាភិបាល និង ម្ចាស់មូលនិធិអ៊ីរ៉ាស៊ី ដល់សាកលវិទ្យាល័យ ដែលនឹងជួយឱ្យសិស្ស និស្សិតបានយល់ច្បាស់ ការរក្សាបាននូវសុខសន្ដិភាព និងការអភិវឌ្ឍន៍ សម្រាប់នាពេលអនាគតផងដែរ។
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
