នាសាលាខេត្តសៀមរាប ថ្ងៃទី០៧ ខែសីហា ឆ្នាំ២០២៣គណៈកម្មការរៀបចំការបោះឆ្នោតខេត្ត សហការនិងគាំទ្រពីរដ្ឋបាលខេត្ត បានរៀបចំអង្គសន្និបាតបូកសរុបការងារបោះឆ្នោតជ្រើសតាំងតំណាងរាស្ត្រណិតិកាលទី៧ ឆ្នាំ២០២៣ ក្រោមអធិបតីភាព លោក អ៊ឹង គឹមលាង អភិបាលរងខេត្ត លោកជំទាវ ស៊ិន ណម សមាជិកក្រុមប្រឹក្សាខេត្ត និងវត្តមានគណៈអភិបាលក្រុងស្រុកទាំង១២ ថ្នាក់ដឹកនាំអង្គភាពមន្ទីរ ពាក់ព័ន្ឋ កងកម្លាំងប្រដាប់អាវុធទាំង៣ប្រភេទ លោកលោកស្រីមេឃុំចៅសង្កាត់ ស្មៀនឃុំសង្កាត់ តំណាងគណបក្សនយោបាយ អង្គការសមាគមព្រមទាំងសមាជិកសមាជិកាគណៈកម្មការខេត្តរៀមចំការបោះឆ្នោត បានចូលរួមសរុបប្រមាណជាង២០០នាក់ ។
អង្គសន្និបាតនេះធ្វើឡើងដើម្បីវាយតម្លៃនិងឆ្លុះបញ្ចាំងឱ្យឃើញពីចំណុចខ្លាំង ចំណុចខ្សោយ និងបញ្ហាប្រឈមសម្រាប់ធ្វើការកែលម្អ និងទុកជាមេរៀនបទពិសោធនាពេលបោះឆ្នោតខាងមុខទៀតដោយសំណូមពរដល់អង្គសន្និបាតធ្វើការពិភក្សាឱ្យល្អិតល្អន់អំពីបទពិសោធនិងចំណុចគួរកែលម្អ តាមរយៈសកម្មភាពការងារដែលបានអនុវត្តកន្លងមក។
លោក នឹម វ៉ាន់សំ ប្រធានគណៈកម្មការខេត្តរៀបចំការបោះឆ្នោត មានប្រសាសន៍ថា៖ដំណើរការរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៧ឆ្នាំ២០២៣ ត្រូវបានរៀបចំដោយអនុលោមទៅតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ បទបញ្ជានិងនីតិវិធី ការណែនាំរបស់គ.ជ.ប និងប្រក្រតិទិនសម្រាប់ការបោះឆ្នោត។ជាទូទៅការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ត្រូវបានមតិជាតិនិងអន្តរជាតិវាយតម្លៃថាបានប្រព្រឹត្តិទៅក្នុងបរិយាកាសសន្តិភាព ស្ងប់ស្ងាត់ល្អ គ្មានអំពើហិង្សា ប្រកបដោយភាពរលូនតម្លាភាព សេរី ត្រឹមត្រូវ យុត្តិធម៌ ស្របតាមលទ្ឋិប្រជាធិបតេយ្យសេរីពហុបក្ស ហើយត្រូវបានរៀបចំកាន់តែប្រសើរឡើងទាំងលើទិដ្ឋភាពច្បាប់ និងលើទិដ្ឋភាពបច្ចេកទេស បើប្រៀបធៀបទៅនឹងការបោះឆ្នោតមុនៗ។
លោក នឹម វ៉ាន់សំ បន្តថា៖ជោគជ័យដែលសម្រេចបាននេះ គឺអាស្រ័យដោយមានការចូលរួមចំណេកប្រកបដោយស្មារតីទទួលខុសត្រូវខ្ពស់ពីស្ថាប័ននីតិបញ្ញត្តិ នីតិប្រតិបត្តិ និងអ្នកពាក់ព័ន្ឋដទៃទៀត ជាពិសេសប្រជាពលរដ្ឋមានឈ្មោះក្នុងបញ្ជីបោះឆ្នោតដែលបានអញ្ជើញទៅបោះឆ្នោតយ៉ាងច្រើនកុះករប្រកបដោយទឹកមុខរីរាយនិងគ្មានការភ័យខ្លាច។
ក្នុងនាមគណៈបញ្ជាការឯកភាពរដ្ឋបាលខេត្តសៀមរាប លោក អ៊ឹងគឹមលាង អភិបាលរងខេត្តបានវាយតម្លៃខ្ពស់ចំពោះគណៈកម្មការរៀបចំការបោះឆ្នោតខេត្តនិងបានកោតសរសើរដោយស្មោះចំពោះគ្រប់ភាគីពាក់ព័ន្ឋនិងបងប្អូនប្រជាពលរដ្ឋទាំងអស់ដែលបានចូលរួមអនុវត្តនិងគោរពច្បាប់បោះឆ្នោត គោរពបទបញ្ជា នីតិវិធី និងក្រមសីលធម៌សម្រាប់ការបោះឆ្នោតប្រកបដោយស្មារតីទទួលខុសត្រូវនិងភាពថ្លៃថ្នូរ ដែលធ្វើឱ្យការបោះឆ្នោតជ្រើសតាំងតំណាងរាស្ត្រនីតិកាលទី៧ឆ្នាំ២០២៣ ទទួលបានលទ្ឋផលល្អប្រសើរ ទាំងលើទិដ្ឋភាពច្បាប់ លើទិដ្ឋភាពបច្ចេកទេស ក្រោមបរិយាកាសសន្តិភាព ស្ថិរភាព សន្តិសុខ សណ្តាប់ធ្នាប់ របៀបរៀបរយ និងមានសុវត្ថិភាពយ៉ាងល្អប្រសើរដោយគ្មានការគំរាមកំហែង និងគ្មានអំពើហិង្សានោះឡើយ។
លោក អ៊ឹង គឹមលាង មានប្រសាសន៍ថា៖សមិទ្ឋផលដែលសម្រេចបានខាងលើនេះ អាស្រ័យដោយយើងទាំងអស់គ្នា ទាំងអជ្ញាធរគ្រប់លំដាប់ថ្នាក់ គណៈកម្មការរៀបចំការបោះឆ្នោត គណបក្សនយោបាយនិងភាគីពាក់ព័ន្ឋទាំងអស់បានខិតខំធ្វើការកែលម្អដំណើរការបោះឆ្នោតទាំងក្របខ័ណ្ឌច្បាប់ និងក្របខ័ណ្ឌបច្ចេកទេស ដោយឈរលើមូលដ្ឋាននៃការប្រមែប្រមូលអនុសាសន៍និងធាតុចូលគ្រប់មជ្ឈដ្ឋាន ដោយធ្វើការកែទម្រង់ ស្ថាប័នរៀបចំការបោះឆ្នោត ច្បាប់បោះឆ្នោត និងការរៀបចំបញ្ជីឆ្នោត។លោក បន្ថែមថា៖ឆ្លងតាមការបោះឆ្នោតដោយផ្ទាល់និងមិនផ្ទាល់តាមគោលការណ៍លទ្ឋិប្រជាធិបតេយ្យសេរីពហុបក្សទាំងនៅថ្នាក់ជាតិ និងថ្នាក់ក្រោមជាតិទាំង២១លើកកន្លងមកនេះ បានផ្តល់មេរៀនបទពិសោធជាច្រើនសម្រាប់យើងទាំងអស់គ្នា នោះគឺ សន្តិភាព លទ្ឋិប្រជាធិបតេយ្យ ការបោះឆ្នោតនិងការអភិវឌ្ឍសង្គម ជាដំណើរការដែលមានទំនាក់ទំនងផ្សារភ្ជាប់និងជះឥទ្ឋិពលឱ្យគ្នាទៅវិញទៅមក មិនអាចកាត់ផ្តាច់បានឡើយសម្រាប់សេចក្តីថ្លៃថ្នូរ ភាពរុងរឿង និងផលប្រយោជន៍ដ៏ឧត្តុង្គឧត្តម នៃប្រទេសជាតិនិងប្រជាជនយើង។
សូមបញ្ជាក់ថា៖លទ្ឋផលនៃការបោះឆ្នោតជ្រើសតាំងតំណាងរាស្ត្រនីតិកាលទី៧ឆ្នាំ២០២៣ សម្រាប់ខេត្តសៀមរាប មានគណបក្សនយោបាយក្នុងសន្លឹកឆ្នោតចំនួន១៤គណបក្ស ខេត្តនេះមានអាសនៈរដ្ឋសភាចំនួន៦អាសនៈ ហើយមានតែគណបក្សតែមួយប៉ុណ្ណោះទទួលបានអាសនៈរដ្ឋសភាទាំងអស់ក្នុងមណ្ឌលខេត្តសៀមរាប គឺគណបក្សប្រជាជនកម្ពុជា៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ