ឯកឧត្តម ឡុង កុសល អ្នកនាំពាក្យនិងជាអគ្គនាយករងអាជ្ញាធរជាតិអប្សរា មានប្រសាសន៍ថា ៖ អាជ្ញាធរជាតិអប្សរាគាំទ្រនិងស្វាគមន៍ជានិច្ច ទាំងវិស័យរដ្ឋ វិស័យឯកជន និង គ្រប់ភាគីពាក់ព័ន្ឋទាំងអស់ ដែលមានបំណងចង់ដាំកូនឈើនៅតំបន់រមណីយដ្ឋានអង្គរ ព្រោះការដាំកូនឈើបង្ហាញនូវឆន្ទៈរួមចំណេកយ៉ាងសំខាន់ក្នុងការថែរក្សាសម្បត្តិមរតកវប្បធម៌មនុស្សជាតិ ហើយគ្រប់ជាតិសាសន៍មានតួនាទីនិងភារកិច្ចការពារនិងថែរក្សាសម្បត្តិមរតកវប្បធម៌របស់ជាតិសាសន៍ខ្លួន និយាយជារួមនិងនិយាយដោយឡែក ក្នុងនាមយើងជាកូនខ្មែរមានឈាមជ័រពីបុព្វបុរសកសាងអង្គរក៏ត្រូវមានចំណែកចូលរួមថែរក្សា ការពារនិងអភិរក្សសម្បត្តិវប្បធម៌របស់យើងដែរ។
ឯកឧត្តម ឡុង កុសល មានប្រសាសន៍បែបនេះ ក្នុងឱកាសដឹកនាំបុគ្គលិកក្រុមហ៊ុនធានារ៉ាប់រងមេនញូឡាយចំនួនប្រមាណជា៥០នាក់ ដាំកូនឈើនៅតំបន់អង្គរ កាលពីព្រឹកថ្ងៃទី០៣ ខែសីហា ឆ្នាំ២០២៣នេះ ។
ឯកឧត្តម បន្តថា ក្នុងនាមអាជ្ញាធរជាតិអប្សរា ឯកឧត្តមសូមគាំទ្រយ៉ាងពេញទំហឹងដើម្បីផ្តល់កូនឈើដោយឥតគិតថ្លៃ ជូនទៅដល់សាធារណៈជនទូទៅសម្រាប់យកទៅដាំក្នុងតំបន់អង្គរ ឬដាំក្នុងសាធារណៈ ខណៈដែលក្នុងមួយឆ្នាំៗមន្ត្រីជំនាញអាជ្ញាធរជាតិអប្សរាបានបណ្តុះកូនឈើរាប់សិបម៉ឺនដើម ដោយគិតពីឆ្នាំ២០០៤មកដល់បច្ចុប្បន្ននេះ បានដាំកូនឈើចំនួនជាង២លានដើម ក្នុងរមណីយដ្ឋានតំបន់អង្គរ និងរាប់ម៉ឺនដើមផ្សេងទៀត បានផ្តល់ជូនដល់បងប្អូនប្រជាពលរដ្ឋ ស្ថាប័នរដ្ឋនិងឯកជន យកទៅដាំតាមអង្គភាព ស្ថាប័ន និងទីសាធារណៈរបស់ពួកគាត់។
ឯកឧត្តម ឡុង កុសល បន្ថែមថា៖ការដាំដើមឈើនិងស្មៅនៅពេលនេះ ជាផ្នែកមួយតូចប៉ុណ្ណោះ ព្រោះថានៅមានផ្ទៃដីជាច្រើនទីតាំងទៀតដែលត្រូវដាំដុះឡើងវិញ ដែលការដាំនេះទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ដើម្បីបំពេញចន្លោះព្រៃឈើនៅតាមដងផ្លូវ និងចូលរួមចំណែកក្នុងកិច្ចការអភិរក្ស និងអភិវឌ្ឍន៍ប្រកបដោយចីរភាពរមណីយដ្ឋានអង្គរ និងក្នុងបំណងដាំស្តារឡើងវិញនូវព្រៃឈើរិចរិល និងកែលម្អដីទំនេរដែលប្រជាពលរដ្ឋស្ម័គ្រចិត្ដចាកចេញទៅរស់នៅភូមិធម្មជាតិរុនតាឯក និងតំបន់ពាក់ស្នែងនៃខេត្តសៀមរាប ហើយបានប្រគល់ជូនរដ្ឋវិញឱ្យក្លាយជាតំបន់បៃតងស្រស់ មានដើមឈើ និងវាលស្មៅ សម្រាប់ជាទ្រនាប់ការពារដ៏សំខាន់ដល់ប្រាង្គប្រាសាទ និងជាប្រយោជនន៍ដល់មនុស្សជាតិទាំងមូល រួមគ្នាថែរក្សាទេសភាពវប្បធម៌ បង្កើនជម្រកសត្វព្រៃ និងជួយដល់ការអភិរក្សប្រាសាទផង៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
