នាព្រឹកថ្ងៃទី២៤ ខែមេសា ឆ្នាំ២០១៩នេះ នាយកដ្ឋានផលិតកម្មសត្វ នៃអគ្គនាយកដ្ឋានសុខភាពសត្វនិងផលិតកម្មសត្វ ក្រសួងកសិកម្មរុក្ខាប្រមាញ់និងនេសាទ បានរៀបចំសិក្ខាសាលាមួយនៅខេត្តសៀមរាប ស្តីពីការពង្រឹងការគ្រប់គ្រងកសិដ្ឋានចិញ្ចឹមសត្វ ដោយមានសមាសភាព ចូលរួមជាមន្ត្រីនាយកដ្ឋានផលិតកម្មសត្វ , មន្ត្រីការិយាល័យផលិតកម្មនិងបសុព្យាបាលខេត្តសៀមរាប , ម្ចាស់ឬតំណាងក្រុមហ៊ុន , កសិដ្ឋាន , កន្លែងចិញ្ចឹមសត្វមកពីវិស័យឯកជនក្នុងខេត្តសៀមរាប ចំនួន៨០ នាក់ ក្នុងគោលបំណងពង្រឹងការគ្រប់គ្រង និងការចិញ្ចឹមសត្វតាមកសិដ្ឋានសម្រាប់ពាណិជ្ជកម្ម , ការគ្រប់គ្រងនិងការត្រួតពិនិត្យចំណីសត្វ និងជាពិសេស ផ្សព្វផ្សាយនិងជំរុញការអនុវត្តប្រកាសលេខ៥៤៩ របស់ក្រសួងកសិកម្ម ស្តីពីចំណាត់ថ្នាក់ខ្នាត បទដ្ឋានបច្ចេកទេស និងនិតិវិធី សម្រាប់ការផ្តល់លិខិតអនុញ្ញាតការចិញ្ចឹមសត្វ និងបង្កាត់ពូជសត្វ ។
លោក ស៊ាង សុខលីម ប្រធាននាយកដ្ឋានផលិតកម្មសត្វ បានមានប្រសាសន៍ថា ការចិញ្ចឹមសត្វដើម្បីធ្វើពាណិជ្ជកម្ម នោះ កត្តាសំខាន់គឺផ្តោតទៅលើការគ្រប់គ្រង ការថែទាំ និង ការត្រួតពិនិត្យទៅលើគុណភាពចំណី ព្រោះថាដើម្បីឱ្យមុខរបរនេះទទួលបានជោគជ័យ កសិករនិងម្ចាស់កសិដ្ឋាន ត្រូវចេះរៀបចំផែន ការក្នុងការចិញ្ចឹម , ចេះពីរបៀបកែច្នៃចំណីអាហារ ធ្វើយ៉ាង ណាឱ្យទុនផលិតកម្មមានតម្លៃទាប និងចេះវិភាគស្ថាន ភាពសេដ្ឋកិច្ចទីផ្សារ ដូច្នេះចំណីសម្រាប់សត្វជាធាតុចូល និងជាកត្តាសំខាន់បំផុត ក្នុងការកំណត់ពីជោគវាសនានៃការចិញ្ចឹមសត្វទទួលបានភាពបរាជ័យឬជោគជ័យ ហើយបើយើងមិនបានគិតគូរអំពីចំណីទេនោះ គឺមិនអាចអភិវឌ្ឍន៍ការចិញ្ចឹមសត្វទទួលបានជោគជ័យឡើយ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
