ក្នុងឱកាសអញ្ជើញចុះបំពេញ បេសកកម្មការងារនៅខេត្តកំពង់ចាម ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន បានអញ្ជើញទៅជួបសំណេះសំណាល និងពិនិត្យលទ្ធផលការងារ ដែលថ្នាក់ដឹកនាំ និងមន្ត្រីរាជការ អាជ្ញាធរដែនដី ឃុំ ទូទាំងស្រុកកោះសូទិន ខេត្តកំពង់ចាម សម្រេចអនុវត្តន៏បាន នានាពេលកន្លង មកនេះ ។
នៅក្នុងពិធីនេះដែលបានធ្វើឡើងនៅរសៀលថ្ងៃទី ២២ ខែមេសា ឆ្នាំ ២០១៩ នាស្រុកកោះសូទិន ក៏មានវត្តមានអញ្ជើញចូលរួមពី ឯកឧត្តម គួច ចំរើន អភិបាល នៃ គណះអភិបាលខេត្ត កំពង់ចាម ហើយក៏មានការបង្ហាញនូវ សមាសភាពថ្មីនៃ គណះអភិបាលស្រុក កោះសូទិន គឺលោក យី វណ្ណះ ហើយអតីត អភិបាលស្រុក ចាស់ គឺលោក ផេន សុផល ត្រូវទៅធ្វើជាអភិបាលស្រុកបាធាយ ខេត្តកំពង់ចាម វិញ។
បន្ទាប់ពីអាជ្ញាធរដែនដីស្រុក កោះសូទិន ធ្វើរបាយការណ៏ជម្រាបជូនពី លទ្ធផលការងារ ក៏ដូចជាសភាពការណ៏រួមនៅទូទាំងស្រុក លើកិច្ចការថែរក្សា សន្តិសុខ សណ្តាប់សាធារណះជូនប្រជាពលរដ្ឋ បានយ៉ាងល្អរួចមក ឯកឧត្តមអភិ បាលខេត្ត កំពង់ចាម គួច ចំរើន មានប្រសាសន៏ ជម្រុញលើកទឹកចិត្ត ដល់មន្ត្រី គ្រប់លំដាប់ថ្នាក់ កងកំលាំងសមត្ថកិច្ច គ្រប់ផ្នែកគ្រប់ជំនាញ ត្រូវបន្តខិតខំប្រឹង ប្រែងរួមសហការសាមគ្គីគ្នា ក្នុងការធ្វើយ៉ាងណា បំរើសេវាសាធារណះជូន ប្រជា ពលរដ្ឋ ឲ្យបានកាន់តែល្អប្រសើរ ដោះស្រាយបញ្ហាកង្វល់នានា ក៏ដូចជាការ ថែរក្សា សន្តិសុខ សណ្តាប់ ក្នុងតំបន់មូលដ្ឋាន ឲ្យមានសុខសុវត្ថិភាព ដើម្បី ធ្វើការរសើនៅ ប្រកបរបររកស៊ីបាន ដោយរលូន និងមានជីវភាពធូរធារទាំងអស់ គ្នា ។ ជាមួយនេះ ឯកឧត្តមអភិបាលខេត្ត ស្នើដល់អាជ្ញាធរ មូលដ្ឋានគ្រប់លំដាប់ថ្នាក់ ការចូលរួម ក្នុងចលនាប្រឡងប្រណាំង សាវាសុខភាពសាធារណះ បានកាន់ តែ ល្អប្រសើរ តាមរយះការជម្រុញដល់ប្រជាពលរដ្ឋ តាមបណ្តាភូមិ ត្រូវមាន បន្ទប់ ទឹក ពិសេសបង្គន់អនាម័យ មាននៅគ្រប់ខ្នងផ្ទះ ទាំងអស់ ជៀសវាងការបន្ទោះ បង់ ពាស់វាល ពាស់កាល នាំឲ្យកើតជំម្ងឺ អាសន្នរោគផ្សេងៗ ។
ឯកឧត្តមរដ្ឋមន្ត្រី ខៀវ កាញារីទ្ធ មានប្រសាសន៏ កោតសរសើរចំពោះលទ្ធផល ការងារទាំងឡាយ ដែលអាជ្ញាធរដែនដីគ្រប់លំដាប់ថ្នាក់ រួមគ្នាសម្រេចអនុវត្តន៏ បានជាបន្តបន្ទាប់កន្លងមកនេះ សំដៅធ្វើយ៉ាងណាឲ្យ ការរស់នៅរបស់បង ប្អូនប្រជាពលរដ្ឋ ក្នុងតំបន់មូលដ្ឋាននានា ក្នុងស្រុកកោះសូទិនទាំងមូល ប្រកបដោយភាពសប្បាយរីករាយ និងសុខសវត្ថិភាព ។
ឯកឧត្តមរដ្ឋមន្ត្រី បានជម្រាបជូនពី សភាពការណ៍វិវត្តន៍រួម នៅទូទាំងប្រទេស ប្រកបទៅដោយការអភិវឌ្ឍ និងស្ថេរភាពនយោបាយយ៉ាងល្អប្រសើរ ហើយជាមួយនេះ ប្រមុខរាជរដ្ឋាភិបាល ក្រោមការដឹកនាំរបស់ សម្តេចតេជោ នាយករដ្ឋ មន្ត្រី ហ៊ុន សែន បានគិតគួរខ្ពស់ចំពោះ ស្ថានភាព និងជីវភាពរស់នៅរបស់ មន្ត្រី រាជការ និងកងកម្លាំងប្រដាប់អាវុធ គ្រប់លំដាប់ថ្នាក់ តាមរយៈបង្កើតឲ្យមាន នូវគោលនយោបាយ បេឡាជាតិរបបសន្តិសុខសង្គម ប.ស.ស. ហើយគោល នយោបាយនេះ មានសារៈសំខាន់ណាស់ ដែលរាជរដ្ឋាភិបាល បានខិតខំ ជួយ ប្រជាជន ជាកម្មករ កម្មការិនី តាមបណ្តារោងចក្រ សហគ្រាស មន្ត្រីរាជការ និង កងកម្លាំង ក្នុងការថែទាំ ពិនិត្យសុខភាព ព្យាបាលជំងឺ ជូន ដោយឥតគិត ជាពិសេសនៅពេលពួកគាត់ចូលនិវត្តន៍ ពីការងារទៅ ហើយធ្លាក់ខ្លួនឈឺ ក្នុងករណីខ្វះខាតថវិកាព្យាបាលជំងឺ រាជរដ្ឋាភិបាល នឹងរ៉ាប់រងការចំណាយថ្លៃព្យាបាល នៅពេលពួកគាត់មានបណ្ណសមាជិក ប.ស.ស. ។ ទន្ទឹម ជាមួយគ្នានេះដែរ សម្រាប់អ្នកក្រីក្រ អ្នកសុំទានតាមផ្លូវ ក៏នឹងទទួលបានបណ្ណ សមធម៌ ផងដែរ នៅពេលចូលទៅ ព្យាបាលជំងឺ គឺឥតគិតថ្លៃដូចគ្នា ហើយអ្នកទៅ កំដរ ក៏ រដ្ឋ ផ្តល់ថវិកា ជូនផងដែរ។ ដូច្នេះគោលនយោបាយដ៏មានសារះសំខាន់ ត្រូវរួមគ្នា ផ្សព្វផ្សាយឲ្យបានទូលំទូលាយ ព្រោះកិច្ចការងារនេះ ប្រមុខរាជរដ្ឋា ភិបាល ខិតខំប្រឹងប្រែងធ្វើកិច្ចការងារនេះ រយះពេល ៤០ ឆ្នាំមកហើយ ដោយ មានលុយតម្កល់ទុកគ្រប់គ្រាន់សម្រាប់ជួយដល់ ប្រជាពលរដ្ឋ មន្ត្រីរាជការ កម្មករ កម្មការិនី ទាំងអស់នៅទូទាំងប្រទេស ដែលជាសមាជិក បេឡាជាតិរបបសន្តិ សុខសង្គម ប.ស.ស.។
ដោយឡែកនៅព្រឹកថ្ងៃទី ២៣ ខែ មេសា ឆ្នាំ ២០១៩ ឯកឧត្តមរដ្ឋមន្ត្រី ខៀវ កាញារីទ្ធ រួមជាមួយ ថ្នាក់ដឹកនាំរួមជាមួយថ្នាក់ដឹកនាំអង្គការ Sipar និង មូល និធិគីណាល់ បានអញ្ជើញទៅពិនិត្យមើលដំណើរការជួសជុលឡើងវិញ នូវ អាគារសិក្សា និងអាគារ បណ្ណាល័យ នៃវិទ្យាល័យជីហែ ស្ថិតក្នុង ភូមិផ្សារថ្មី ឃុំពាម ប្រធ្នោះ ស្រុក កោះសូទិន ខេត្តកំពង់ចាម ។
នៅក្នុងឱកាសនោះដែរ ក៏មានការចុះហត្ថលេខា លើកិច្ចសន្យា ជួសជុល អាគារសិក្សា ១ ខ្នងមាន ៤ បន្ទប់ ដើម្បីបង្កើតជា សាលប្រជុំ និងបណ្ណាល័យ ពហុព័ត៌មាន ហើយការជួសជុលអាគារនេះឡើង ធ្វើដោយអង្គការស៊ីប៉ា
តាមរយះការគាំទ្រថវិកាពី មូលនិធិ គីណាល់ និងអតីតសិស្ស វិទ្យាល័យជីហែ ដែលមានលោក ហៃ លី អ៊ាង ជាប្រធាន ព្រមទាំង ដៃគូរផ្សេងៗទៀត។ ចំពោះ ដំណើរការជួសជុលអាគារ សម្រាប់ធ្វើជាបណ្ណាល័យ ពហុព័ត៌មាន និងសាល ប្រជុំ នេះ គឺចាប់ផ្តើមពីថ្ងៃទី ២០ ខែមេសា និងគ្រោងបញ្ចប់នាថ្ងៃទី ២០ ខែ តុលា ឆ្នាំ ២០១៩ ខាងមុខនេះ ដោយចំណាយថវិកាអស់ប្រមាណ ៦ ម៉ឺន ៩ ពាន់ ៣៥៤ ដុល្លា ហើយថវិកានេះមិនបានបូកបញ្ចូលថ្លៃសម្របសម្រួល ត្រួតពិនិត្យ និងរដ្ឋ បាលឡើយ។ បណ្ណាល័យ ពហុព័ត៌មាន នឹងត្រូវបំពាក់ដោយ សៀវភៅ និង ឯកសារ ស្រាវជ្រាវជាច្រើន ប្រភេទ បំពាក់កុំព្យូទ័រ សម្រាប់គ្រប់គ្រងបណ្ណាល័យ និងសម្រាប់ស្រាវជ្រាវ បង្កើតជ្រុងតម្រង់ទិសវិជ្ជាជីវះ ដោយមានភ្ជាប់នៅ ប្រពន្ធ័ ព័តមានវិទ្យា និងអ៊ីនធើណែត បំពាក់ តុ ទូ កៅអី ជាដើម។ បន្ទាប់ពីការជួសជុលអាគារបណ្ណាល័យ និងសាលប្រជុំនេះ រួចរាល់ ឯកឧត្តមរដ្ឋមន្ត្រី ខៀវ កាញារីទ្ធ និងទិញ ម៉ាស៊ីនត្រជាក់ ចំនួន ៤ គ្រឿង បំពាក់ ក្នុងបន្ទប់ ទាំងនេះផងដែរ ។
បើតាមការបញ្ជាក់របស់លោក ស៊ុយ ចន្ទ័រិទ្ធិ នាយកវិទ្យាល័យជីហែ បាន ឲ្យដឹងដែរថា ក្រៅពីការជួយ ជួសជុលអាគារ ២ ខ្នង ៤ បន្ទប់នេះ ដោយ អង្គការ ស៊ីប៉ា តាមរយះការគាំទ្រថវិកាពី មូលនិធិ គីណាល់ និងអតីតសិស្ស វិទ្យា ល័យជី ព្រមទាំង ដៃគូរផ្សេងៗទៀតនោះ សម្តេចសេនាវិបុលភក្តី សាយ ឈុំ ប្រធាន ព្រឹទ្ធសភា បានជួយ ជួសជុល អាគារសិក្សាចំនួន ៤ ខ្នង ស្មើនិង ១៨ បន្ទប់ ក្នុងវិទ្យាល័យជីហែ នេះដែរ ដែលមានសភាពចាស់ ទ្រុឌទ្រោម
ឲ្យបាន ស្អាត ល្អឡើងវិញ ។ សម្រាប់អាគារសិក្សា ៤ ខ្នងនេះ គឺត្រូវបាន ជួសជុល ហើយរួចរាល់បាន ១ខ្នង នឹងកំពុងបន្តធ្វើការជួសជុល ទៀតឲ្យឆាប់ បានហើយរួចរាល់ ដើម្បីឲ្យ សិស្សានុសិស្ស មានអាគារសិក្សា ស្អាត មានផាសុខភាព និងអនាម័យល្អ។ បើតាមការបញ្ជាក់របស់លោកនាយកសាលា បានឲ្យដឹងថា ការជួសជុល អាគារសិក្សា ទាំង ៤ ខ្នង ស្មើនិង ១៨ បន្ទប់នេះ គ្រោងចំណាយថវិកាអស់ ប្រមាណជាង ១០ ម៉ឺនដុល្លា ។
តាមឯកសារប្រវត្តិបានឲ្យដឹងថា វិទ្យាល័យជីហែ ស្ថិតក្នុងភូមិផ្សារថ្មី ឃុំពាមប្រធ្នោះ ស្រុកកោះសូទិន ខេត្តកំពង់ចាម ដោយបានកសាងឡើងក្នុង កំឡុងឆ្នាំ ១៩៥៦ ដោយថវិកាអាណាព្យាបាល សិស្ស និងសប្បុរសជន ហើយរួច រាល់ក្នុងឆ្នាំ ១៩៥៧ ក្នុងនោះមានអាគារ ទីចាត់ការ ១ ខ្នង ២ ជាន់ និងអាគារ សិក្សា ៦ ខ្នង ស្មើ ២៥ បន្ទប់។ វិទ្យាល័យជីហែ ចាប់បើកទ្វារឲ្យបង្រៀន សិស្សក្នុងឆ្នាំ ១៩៥៧ ដែលមានឈ្មោះថា អនុ វិទ្យាល័យជីហែ ។ ក្នុងឆ្នាំ ១៩៧០ ដល់ ១៩៧៥ ក្នុងរបបសាធារណរដ្ឋ វិទ្យាល័យជីហែ ត្រូវបិទទា្វរ ដោយយកធ្វើជា ឃ្លាំងសម្ភារះ ។ ក្នុងឆ្នាំ ១៩៧៥ ដល់ ១៩៧៩ ក្នុងរបបកម្ពុជា ប្រជាធិបតេយ្យ វិទ្យាល័យជីហែ ក្លាយជាមន្ទីរពេទ្យស្រុក និងជាមន្ទីរឃុំឃាំង ។ ប៉ន្តែក្រោយថ្ងៃ រំដោះ ៧ មករា ១៩៧៩ ត្រូវបានដំណើរការរៀបចំសាលានេះឡើងវិញ ហើយ នៅឆ្នាំ ១៩៨០ ទើបបើកដំណើរបង្រៀនរហូតមកដល់បច្ចុប្បន្ន ដែលមានការ កសាង អាគារសិក្សា រួមជាមួយសមិទ្ធិផលនានាដែលបំរើដល់ការងារអប់រំ ។ វិទ្យាល័យជីហែ ជាវិទ្យាល័យដ៏ចំណាស់មួយ តែងតែជួបការលំបាកក្នុង ការរៀន និងបង្រៀន ព្រោះអាគារមានសភាពចាស់ទ្រុឌទ្រោម ហើយអាគារ ខ្លះ ជួសជុលប្រើការលែងកើត៕
អត្ថបទ និង រូបភាព ៖ ក្រសួងព័ត៌មាន
