នៅព្រឹកថ្ងៃទី២៥ ខែមេសា ឆ្នាំ២០១៩នេះ រដ្ឋបាលខេត្ត សៀមរាប បានរៀបចំទិវាជាតិប្រយុទ្ធនឹងជំងឺគ្រុនចាញ់ នៅឃុំស្រែណូយ ក្នុងស្រុកវ៉ារិន ក្រោមប្រធានបទ គ្មានជំងឺគ្រុន ចាញ់ ផ្ដើមចេញពីខ្ញុំ ក្រោមអធិបតីភាពលោក ពិន ប្រាកដ អភិបាលរងខេត្ត ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលរងស្រុកមួយចំនួនក្នុងខេត្ត មន្ត្រីរាជការក្នុងស្រុកវ៉ារិន សិស្សានុសិស្ស និង បងប្អូនប្រជាពលរដ្ឋក្នុងឃុំស្រែណូយ ជាច្រើនរូបទៀត ។
លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានមានប្រសាសន៍ថា កាលពីមុនក្នុងអំឡុងពេលប្រទេស ជាតិមានសង្គ្រាម តំបន់នេះជាតំបន់គ្រុនចាញ់យ៉ាងស្រួច ស្រាល់ បណ្ដាលឲ្យមានមនុស្សស្លាប់ជាច្រើននាក់ ប៉ុន្តែ បច្ចុប្បន្នបើទោះបីជាកើតមានជំងឺគ្រុនចាញ់ក៏ពិតមែន ប៉ុន្តែមិនមានករណីស្លាប់នោះទេ ដូច្នេះ ទិវានេះប្រារព្ធឡើង ក្នុងគោលបំណងជំរុញ និង បំផុសការយល់ដឹង និងយកចិត្តទុកដាក់កាន់តែខ្ពស់បន្ថែមទៀត ក្នុងការលើកកម្ពស់សុខុមាលភាពសង្គម និង សំដៅរួមចំណែកដល់ការថែរក្សាសុខភាពរបស់ប្រជាពលរដ្ឋ ខណៈដែលជំងឺគ្រុនចាញ់នៅ មិនត្រឹមតែធ្វើឲ្យប៉ះពាល់ដល់សុខភាព ការចំណាយថវិកាក្នុងការព្យាបាល ការខាតបង់ការងារ ការបាត់បង់ផលិតភាព និង អាយុជីវិតប៉ុណ្ណោះទេ ប៉ុន្តែថែមទាំងបង្កផលប៉ះពាល់ជាអវិជ្ជមានដល់ការអភិវឌ្ឍសង្គម សេដ្ឋកិច្ចដ៏ធ្ងន់ធ្ងរទៀតផង ។
តាមរយៈសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទិវាជាតិប្រយុទ្ធនឹងជំងឺគ្រុនចាញ់ លោក ពិន ប្រាកដ អភិបាលរងខេត្ត បានមានប្រសាសន៍ថា ទិវាជាតិប្រយុទ្ធនឹងជំងឺគ្រុនចាញ់ ក្រោមប្រធានបទ គ្មានជំងឺគ្រុនចាញ់ ផ្ដើមចេញពីខ្ញុំនេះ ស្របនឹងដំណើរការវិវត្តនៃសភាពការណ៍សង្គម សេដ្ឋកិច្ចរបស់កម្ពុជា ដែលកំពុងពង្រីកការអភិវឌ្ឍតាមព្រំដែន និង តំបន់អេកូទេសចរណ៍ធម្មជាតិ ព្រៃភ្នំ ដែលប្រឈមនឹងអត្រាឈឺ ស្លាប់ដោយជំងឺគ្រុនចាញ់នៅឡើយ ។
ព័ត៌មានជាតិ ថ្មីៗ
លោក ពិន ប្រាកដ មានប្រសាសន៍ទៀតថា កម្ពុជាកំពុងអនុវត្តអភិក្រមការងារលុបបំបាត់ជំងឺគ្រុនចាញ់នៅក្នុងព្រះរាជាណាចក្រកម្ពុជា ឆ្នាំ២០១៦-២០២០ ដែលជាផ្នែកមួយនៃផែនការយុទ្ធសាស្ត្រជាតិ លុបបំបាត់ជំងឺគ្រុនចាញ់នៅក្នុងព្រះរាជាណាចក្រកម្ពុជា ឆ្នាំ២០១១-២០២៥ ដែលជាផែនទីបង្ហាញផ្លូវ និង បង្កលក្ខណៈងាយស្រួលដល់ការប្រតិបត្តិជាក់ស្តែង ឈានទៅលុបបំបាត់ជំងឺគ្រុនចាញ់ទូទាំងប្រទេស ។
លោក ពិន ប្រាកដ មានប្រសាសន៍បន្ថែមទៀតថា ទោះបីយ៉ាងណាក៏ដោយ ក៏យើងមិនត្រូវភ្លេចខ្លួន ស្កប់ស្កល់នឹងលទ្ធផលដែលយើងទទួលបាននោះទេ ព្រោះថា ជំងឺគ្រុនចាញ់នៅតែជាបន្ទុកដ៏ធ្ងន់មួយរបស់កម្ពុជា ហើយបើយើងមិនទាន់លុបបំបាត់មេរោគគ្រុនចាញ់ឲ្យអស់ពីក្នុងខ្លួនមនុស្សគ្រប់ៗរូបទេនោះ សត្វមូសដែកគោលញីដែលបន្តមាននៅក្នុងព្រៃ និង តំបន់ជុំវិញ នៅតែមានឱកាសបឺតឈាមចម្លងមេរោគគ្រុនចាញ់ពីមនុស្សម្នាក់ទៅមនុស្សម្នាក់ទៀត ពីសហគមន៍មួយទៅសហគមន៍មួយដដែល ដូច្នេះ យើងត្រូវយកចិត្តទុកដាក់ខ្ពស់ទាំងអស់គ្នា លើចំណុចទាំងនេះ ដើម្បីលើកកម្ពស់សុខភាព គុណភាពនៃការរស់នៅ និង សេចក្តីថ្លៃថ្នូររបស់ប្រជាពលរដ្ឋយើង ។
ក្នុងឱកាសនោះដែរ លោក ពិន ប្រាកដ បានអំពាវនាវដល់ប្រជាពលរដ្ឋ និង សិស្សានុសិស្សទាំងអស់ ទាំងនៅក្នុងកម្មវិធី និង នៅក្នុងទូទាំងខេត្ត ក្នុងករណីកើតមានរោគសញ្ញាសង្ស័យជំងឺគ្រុនចាញ់ សូមប្រញាប់ប្រញាល់ទៅមណ្ឌលសុខភាពដែលនៅជិតបំផុត ដើម្បីទទួលការពិនិត្យ និង ព្យាបាលជំងឺ ឲ្យបានទាន់ពេលវេលា ។
បើតាមរបាយការណ៍របស់មន្ទីរសុខាភិបាលខេត្ត បានឲ្យដឹងថា ក្នុងត្រីមាសទី១ ឆ្នាំ២០១៩នេះ ស្ថានភាពជំងឺគ្រុនចាញ់មានការថយចុះ បើធៀបនឹងពេលវេលាដូចគ្នានាឆ្នាំកន្លងមក
ដែលករណីគ្រុនចាញ់វិជ្ជមានសរុបចំនួន ១០៥ករណី ក្នុងនោះ ប្រភេទប៉ារ៉ាស៊ីតប្លាស់ស្មូដ្យូមហ្វាល់ស៊ីប៉ារ៉ូម ចំនួន ០៥ករណី , ប្រភេទចម្រុះចំនួន ០២ករណី និង ប្រភេទប៉ារ៉ាស៊ីតប្លាស់ស្មូដ្យូមវីវ៉ាក់ចំនួន ៩៨ករណី ប៉ុន្តែមិនមានករណីស្លាប់នោះទេ ៕
រូបថត : លោក យូ វង្ស
អត្ថបទ : លោក លីវ សាន្ត
