នាព្រឹកថ្ងៃទី២៤ ខែមេសា ឆ្នាំ២០១៩ម្សិលមិញនេះ រដ្ឋបាលខេត្តសៀមរាប ដឹកនាំដោយលោក ហែន ពុទ្ធី នាយករងរដ្ឋបាលខេត្តសៀមរាប បានបើកកិច្ចប្រជុំមួយ ស្ដីពីការដំឡើង និង ការរុះរើផ្ទាំងផ្សព្វផ្សាយពាណិជ្ជកម្មគ្រប់ប្រភេទនៅក្នុងខេត្តសៀមរាប ដោយមានការចូលរួមពីសំណាកើលោក លោកស្រី ជានាយកទីចាត់ការងអន្តរវិស័យ , ថ្នាក់ដឹកនាំមន្ទីរអង្គភាពនានាក្នុងខេត្ត , ប្រធានអង្គភាពច្រកចេញចូលតែមួយ , អភិបាល-អភិបាលរងក្រុង-ស្រុក , តំណាងក្រុមហ៊ុន ,សណ្ឋាគារ , ផ្ទះសំណាក់ , ភោជ នីយ ដ្ឋាន , សហគ្រាសឯកជន , គ្រឹះស្ថានឯកជន និងអ្នកពាក់ព័ន្ធនានា ។
គោលបំណង នៃកិច្ចប្រជុំនេះគឺដើម្បីរៀបចំសោភ័ណភាព សណ្ដាប់ធ្នាប់ របៀបរៀបរយសាធារណៈ ក្នុងខេត្តសៀមរាបឲ្យសក្តិសមជាខេត្តទេសចរណ៍ប្រវត្តិសាស្ត្រដ៏រុងរឿង ក៏ដូចជាការរក្សានូវអត្តសញ្ញាណនៃវប្បធម៌ទំនៀមទម្លាប់ប្រពៃណី និង លើកតម្កើងកិត្យានុភាពវប្បធម៌ អក្សរសាស្ត្រជាតិខ្មែរ ខណៈកន្លងមករដ្ឋបាលសៀមរាប បានចេញសេចក្ដីជូនដំណឹងលេខ១២៤២ សជណ ចុះថ្ងៃទី១១ ខែធ្នូ ឆ្នាំ២០១៧ និងសេចក្ដីណែនាំលេខ ០០៥/១៨សជណ ចុះថ្ងៃទី២៤ ខែមេសា ឆ្នាំ២០១៨ ពាក់ព័ន្ធនឹងការលើកស្លាកយីហោ , ប៉ាណូ , របារកាត់ទទឹងផ្លូវ , ប្រអប់ភ្លើងLED , ផ្ទាំងផ្សព្វផ្សាយពាណិជ្ជកម្មចល័ត , អចល័ត និងផ្ទាំងផ្សព្វផ្សាយពាណិជ្ជកម្មគ្រប់ប្រភេទ ស្ថិតនៅលើជាប់ជញ្ជាំងអគារផ្សេងៗ និងនៅដីចំណីផ្លូវសាធារណៈ ។
ដើម្បីអនុវត្តឲ្យសមស្របតាមនីតិវិធីច្បាប់ និងលិខិតបទដ្ឋានគតិយុត្តជាធរមាន រដ្ឋបាលខេត្តសៀមរាប សូមឯកឧត្តម លោកជំទាវ លោក លោកស្រី ដែលមានស្លាកយីហោ ឬផ្ទាំងផ្សព្វផ្សាយពាណិជ្ជកម្ម ដែលអស់សុពលភាព ឬគ្មានលិខិតអនុញ្ញាត ត្រូវមកបំពេញបែបបទស្នើសុំលិខិតអនុញ្ញាតពីច្រកចេញចូលតែមួយ នៃរដ្ឋបាលខេត្ត និងច្រកចេញចូលតែមួយ នៃរដ្ឋបាលក្រុង-ស្រុក ។
រដ្ឋបាលខេត្តសៀមរាប សូមធ្វើការណែនាំដូចខាងក្រោម៖
១-ត្រូវសរសេរអក្សរខ្មែរ ឲ្យធំជាងអក្សរបរទេសហើយដាក់នៅជួរខាងលើ
២-អក្សរបរទេស ត្រូវសរសេរនៅជួរខាងក្រោមនិងមានទំហំមួយភាគពីរ (១/២) នៃទំហំអក្សរខ្មែរ
៣-អក្សរខ្មែរ ត្រូវអនុវត្តតាមវចនានុក្រមរបស់សម្ដេចព្រះមហាសុមេធាធិបតីជោតញ្ញាណោ «ជួន ណាត»
៤-ចំពោះការដាក់តាំងស្លាកយីហោ ឬផ្ទាំងផ្សព្វផ្សាយពាណិជ្ជកម្មគ្រប់ប្រភេទដែលមានទំហំក្រោម ៤ម៉ែត្រក្រឡា ត្រូវមកបំពេញបែបបទស្នេីសុំលិខិតអនុញ្ញាតពីច្រកចេញចូលតែមួយ នៃរដ្ឋបាលក្រុង-ស្រុក និងទំហំចាប់ពី ៤ម៉ែត្រក្រឡាឡើងទៅ ត្រូវមកបំពេញបែបបទស្នើសុំលិខិតអនុញ្ញតពីអង្គភាពច្រកចេញចូលតែមួយ នៃរដ្ឋបាលខេត្តសៀមរាប ៕
