លោក ព្រៅ ខេមរិទ្ធ ប្រធានសាខាកាំកុងត្រូលខេត្តសៀមរាប បានអះអាងថា នៅក្នុងខណៈពេលដែលលោកបានដឹកនាំក្រុមការងារចុះត្រួតពិនិត្យសុវត្ថិភាពចំណីអាហារនៅក្នុងផ្សារក្រោម សង្កាត់ស្វាយដង្គំ ក្រុងសៀមរាប កាលពីព្រឹកថ្ងៃទី២៤ ខែមេសា ឆ្នាំ២០១៩នេះ យើងពុំបានរកឃើញសារធាតុគីមីហាមឃាត់ ដាក់នៅក្នុងប្រភេទទំនិញម្ហូបអាហារស្រស់មួយចំនួនឡើយ ដូចជាសណ្តែកបណ្តុះ , ស្ពៃជ្រក់ , សសៃគុយទាវ , ជ្រក់ទំពាំង , ផ្អកត្រី , នំបញ្ចុក , តៅហ៊ូ និង អាហារស្រស់គ្រឿងសមុទ្រ ជាដើម ដូច្នេះអាចវាយតម្លៃបានថា សព្វថ្ងៃនេះ អាជីវករមានស្មារតីភ្ញាក់រលឹកយ៉ាងខ្ពស់ បើប្រៀបធៀបទៅនឹងរយៈពេលប៉ុន្មានឆ្នាំមុននោះ និង ប្រជាពលពលរដ្ឋមានការយល់ដឹងច្រើនជាមួយនឹងការប្រុងប្រយត្ន័ខ្ពស់ ចំពោះការថែរក្សាសុខភាព តាមរយៈនៃការជ្រើសរើសទិញម្ហូបអាហារប្រចាំថ្ងៃរបស់ពួកគាត់
នោះ ។
លោក ព្រៅ ខេមរិទ្ធ មានប្រសាសន៍ទៀតថា ទោះជាយ៉ាងនេះក្ដី ក្រុមការងាររបស់លោក នៅតែបន្តការចុះត្រួតពិនិត្យ ការតាម ដាន និង ការអប់រំ ព្រោះវាជាមូលដ្ឋាននាំមកនូវជោគជ័យ ដែលសាខាកាំកុងត្រូលខេត្តសៀមរាប បាននឹងកំពុងអនុវត្តន៍ជារៀងរាល់ថ្ងៃ ដើម្បីសុវត្ថិភាពម្ហូបអាហារ កាន់តែល្អប្រសើរឡើងទៅថ្ងៃអនាគត ។
ព័ត៌មានជាតិ ថ្មីៗ
គួររំលឹកថា កាលពីព្រឹកថ្ងៃទី២៣ ខែមេសា ឆ្នាំ២០១៩ម្សិលមិញនេះ ក្នុងពេលចុះត្រួតពិនិត្យសុវត្ថិភាពចំណីម្ហូបអាហារ នៅផ្សារចាស់នោះ មន្ត្រីជំនាញសាខាកាំកុងត្រូល ក៏រកពុំឃើញនូវសារធាតុគីមីហាមឃាត់ ដែលបានផ្ទុកនៅក្នុងម្ហូបចំណីគ្រប់ប្រភេទ ឬក៏ទំនិញគ្រឿងឧបភោគបរិភោគមួយចំនួនដែលបានដាក់តាំងលក់នៅក្នុងផ្សារដែរ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
