នាព្រឹកថ្ងៃទី២៦ ខែមេសា ឆ្នាំ២០១៩នេះ លោក ខាន់ណារី យូតាកាក់ ប្រធានអង្គការ NPO ឃ្យូសេ ហ្វ័ររឹម ប្រចាំខេត្តសៀមរាប បាននាំយកថវិកាមួយចំនួនដែលបានមកពីការចូលរួមរបស់សប្បុរសជនជនជាតិជប៉ុន ទៅប្រគល់ជូនគ្រួសារសពលោក ហ៊ឹម ចាន់ ជាអ្នករត់តាក់ស៊ី ដែលត្រូវបានបុរសជាជនជាតិជប៉ុនចំនួន២នាក់ ចាក់សម្លាប់កាលពីថ្ងៃទី១៧ ខែមីនា ឆ្នាំ២០១៩ កន្លងទៅ ស្ថិតនៅក្នុងឃុំពួក ស្រុកពួក ខេត្តសៀមរាប ។
ក្នុងឱកាសនោះ លោក ខាន់ណារី យូតាកាក់ តំណាងឲ្យជនជាតិជប៉ុនទាំងអស់ សូមសម្តែងនូវការសោកស្តាយចំពោះការបាត់ បង់សមាជិកគ្រួសារដ៏សំខាន់គឹ លោក ហ៊ឹម ចាន់ ដែលបានទទួលមរណភាពនៅក្នុងហេតុការណ៍ដែលមិនអាចបំភ្លេចបាននាពេលនោះ ហើយដោយមានហេតុនេះកើតឡើងមកលើប្រជាជនកម្ពុជា អង្គការ NPO ឃ្យូសេ ហ្វ័ររឹម ប្រចាំប្រទេសជប៉ុនរបស់ក្រុមហ៊ុន GenKi Group បានបង្កើតកម្មវិធីមូលនិធិមួយឡើង ដែលមានឈ្មោះថា មូលនិធិនៃក្តីស្រលាញ់( GenKi) ដើម្បីប្រមូលថវិកាសម្រាប់ឧបត្ថម្ភដល់គ្រួសាររបស់លោក ហ៊ឹម ចាន់ ក្នុងរយៈពេល៧ឆ្នាំ ដោយក្នុង១ខែ ផ្តល់ប្រាក់ឧបត្ថម្ភចំនួន ២៤០ដុល្លារអាមេរិក ។
សូមបញ្ជាក់ថា បុរសជនជាតិជប៉ុន២នាក់ បានប្លន់យករថយន្តដោយសម្លាប់បុរសម្នាក់ជាអ្នករត់តាក់ស៊ី កាលពីវេលាម៉ោង៥ ល្ងាច ថ្ងៃទី១៧ ខែមីនា ឆ្នាំ២០១៩ ស្ថិតនៅចំណុចលើកំណាត់ផ្លូវជាតិលេខ៦ ត្រង់ចំណុចជញ្ជីញថ្លឹងរថយន្ត ក្នុងទឹកដីភូមិពួកថ្មី ឃុំពួក ហើយជនរងគ្រោះដែលស្លាប់ឈ្មោះ ហ៊ឹង ចាន់ ភេទប្រុស អាយុ៤០ឆ្នាំ មុខរបររត់តាក់ស៊ី រស់នៅសង្កាត់ស្លក្រាម ក្រុងសៀមរាប ។
ចំណែកជនសង្ស័យចំនួន២នាក់ ក្នុងនោះជនសង្ស័យម្នាក់ឈ្មោះ ISHIDA REIMON ភេទប្រុស អាយុ២៤ឆ្នាំ ជាជនជាតិជប៉ុន និងជនសង្ស័យម្នាក់ទៀតឈ្មោះ NAKA RYUJI ភេទប្រុស អាយុ២៤ឆ្នាំ ជាជនជាតិជប៉ុន ហើយជនសង្ស័យជាជនជាតិជប៉ុនទាំង២នាក់នេះ ត្រូវបានតុលាការសម្រេចឃុំខ្លួនកាលពីល្ងាចថ្ងៃទី១៩ ខែមីនា ឆ្នាំ២០១៩កន្លងទៅនេះ៕
រូបថត និង អត្ថបទ ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
