ក្នុងរយៈពេល២ថ្ងៃ គឺនៅថ្ងៃទី២៥ និងថ្ងៃទី២៦ ខែមេសា ឆ្នាំ២០១៩នេះ ក្រុមការងារចម្រុះចុះត្រួតពិនិត្យ និងទប់ស្កាត់ការដឹកជញ្ជូនធនធានរ៉ែចូលក្រុងសៀមរាប ដឹកនាំដោយលោក ពិន ប្រាកដ អភិបាលរងខេត្តសៀមរាប បានចុះធ្វើការត្រួតពិនិត្យ និងទប់ស្កាត់ការដឹកជញ្ជូនធនធានរ៉ែ ដូចជាដីស ដីក្រហម ខ្សាច់ និង ថ្ម ជាដើម នៅតាមបណ្តោយផ្លូវជាតិលេខ៦ ស្ថិតត្រង់ចំណុចភូមិរលួសខាងលិច ឃុំរលួស ស្រុកប្រាសាទបាគង ហើយបានឃាត់រថយន្ត និង គោយន្តកែច្នៃដឹកដី ចំនួន១៣ គ្រឿង ក្នុងនោះរថយន្តអត់មានឈៀកចំនួន០៤គ្រឿង ដែលមិនគោរពទៅតាមការណែនាំរបស់អាជ្ញាធរខេត្ត ក្រុង ដែលធ្វើឲ្យប៉ះពាល់យ៉ាងខ្លាំងដល់បរិស្ថាន អនាម័យ សុខភាពនៅតាម ដងផ្លូវ ដោយការធ្លាក់ដីដែលជាប់កង់រថយន្ត និង ដឹកដីហៀរធ្លាក់ពីរថយន្តតាមដងផ្លូវ ដែលបង្កឲ្យមានធូលីហ៊ុយនៅតាម ដងផ្លូវជាតិលេខ៦ និង ដងវិថីមួយចំនួនក្នុងក្រុងសៀមរាប ។
ក្នុងចំណោមអ្នកបើកបររថយន្តទាំង១៣គ្រឿងនោះ កម្លាំងនគរបាលគ្រឿងញៀនខេត្ត បានធ្វើតេស្តទឹកនោម ដោយរកឃើញមានអ្នកផ្ទុកសារធាតុញៀនក្នុងខ្លួន ចំនួន១នាក់ ហើយត្រូវបានកម្លាំងនគរបាលជំនាញធ្វើការឃាត់ខ្លួន ហើយបញ្ជូនខ្លួនទៅកាន់មជ្ឈមណ្ឌលបន្សាបគ្រឿងញៀន ។
ក្នុងឱកាសនោះ ក្រុមការងារចម្រុះបានធ្វើការអប់រំ ណែនាំ ដល់អ្នកបើកបរ ឬ ម្ចាស់រថយន្តដែលគ្មានសារធាតុញៀនក្នុងខ្លួន បានយល់អំពីច្បាប់ក្នុងការដឹកជញ្ជូនធនធានរ៉ែ , ច្បាប់ធ្វើអាជីវកម្ម និង ត្រូវធ្វើការបំពាក់នូវភ្លើងសញ្ញាចរាចរណ៍ និង ភ្លើងបំភ្លឺផ្លូវឲ្យបានគ្រប់លក្ខណៈ ព្រមទាំងបានធ្វើកំណត់ហេតុ និង កិច្ចសន្យាជាមួយម្ចាស់រថយន្ត ហើយឲ្យយករថយន្តត្រឡប់ទៅកាន់ការដ្ឋានវិញ ដើម្បីកាយទំលាក់អាចម៌ដីដែលលើសនោះ ហើយគ្របឲ្យបានត្រឹមត្រូវ តាមលក្ខណ:បច្ចេកទេស មុននឹងដឹកចេញ ពីការដ្ឋានចូលទៅក្នុងក្រុង ពិសេសក្រុមការងារក៏បានបញ្ជាក់ចំពោះម្ចាស់ និង អ្នកបើកបររថយន្តដឹកជញ្ជូនធនធាន រ៉ែទាំងអស់ ពេលដែលរថយន្តរបស់ខ្លួនដឹកជញ្ជូនដីចេញពីការដ្ឋានមកដល់ផ្លូវជាតិ គឺត្រូវធ្វើការបោសជម្រះដីនៅជាប់រថយន្ត មុនពេលបន្តដំណើរដឹកជញ្ជូនចូលទៅក្នុងក្រុង ដើមី្ បជៀសវាងការធ្លាក់ដីនៅតាមដងផ្លូវ ដែលធ្វើឲ្យខូចនូវសោភ័ណ ភាពក្រុង ៕
ព័ត៌មានជាតិ ថ្មីៗ
រូបថត និង អត្ថបទ ៖ សហការី
កែសម្រួលអត្ថបទ ៖ លោក លីវ សាន្ត
