នាព្រឹកថ្ងៃទី ២៥ ខែ មេសា ឆ្នាំ២០១៩នេះ អគ្គនាយកដ្ឋានពន្ធដារ សហការជាមួយរដ្ឋបាលខេត្តសៀមរាប បានរៀបចំសិក្ខាសាលាផ្សព្វផ្សាយមួយនៅសាលាខេត្តសៀមរាប ស្តីពីការប្រមូលពន្ធប្រថាប់ត្រា ចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ពន្ធលើអចលនទ្រព្យ និង ការត្រៀមអនុវត្តប្រកាសស្តីពីការកំណត់មូលដ្ឋានគិតពន្ធប្រថាប់ត្រា ចំពោះការផ្ទេរសិទ្ធិ ឬ សិទ្ធិកាន់កាប់អចលនទ្រព្យ ក្រោមអធិបតីភាពឯកឧត្តម ហេង សុខណាង អគ្គនាយករង នៃអគ្គនាយកដ្ឋានពន្ធដារ និង លោក លី សំរឹទ្ធ អភិបាលរងនៃគណៈអភិបាលខេត្តសៀមរាប ។
គោលបំណងសំខាន់នៃសិក្ខាសាលានេះ គឺជំរុញដល់កម្ម សិទ្ធិករ ឬអ្នកទទួលសិទ្ធិកាន់កាប់អចលនទ្រព្យ សំខាន់ចំពោះម្ចាស់អចលនទ្រព្យដែលពុំទាន់ចុះបញ្ជី ដែលបានផ្ទេរសិទ្ធិកាន់កាប់ នៅថ្នាក់ក្រុង ស្រុក ឃុំសង្កាត់ ឲ្យចូលទៅបង់ពន្ធប្រថាប់ត្រានៅរដ្ឋបាលសារពើពន្ធ និង ពង្រឹងកិច្ចសហការប្រមូលពន្ធ ដែលជាគុណប្រយោជន៍សម្រាប់អភិវឌ្ឍន៍មូលដ្ឋាន របស់រដ្ឋបាលថ្នាក់ក្រោមជាតិឲ្យអស់សក្តានុពល ពន្ធលើដីធ្លីមិនបានប្រើប្រាស់ និង ពន្ធលើអចលន ទ្រព្យជាដើម ដោយត្រូវលើកទឹកចិត្តឲ្យកម្មសិទ្ធិករ អ្នកកាន់ កាប់អចលនទ្រព្យក្នុងមូលដ្ឋាន បានបំពេញកាតព្វកិច្ចបង់ពន្ធបានទាន់ពេលវេលា ។
គួររំលឹកថា រាជរដ្ឋាភិបាលកម្ពុជា បានសម្រេចធ្វើបច្ចុប្បន្នភាពឡើងវិញ នូវឧបសម្ព័ន្ធស្តីពីការបែងចែក ភូមិសាស្ត្រ និង តម្លៃអចលនទ្រព្យ សម្រាប់មូលដ្ឋានគិតពន្ធប្រថាប់ត្រា ដែលបានកំពុងអនុវត្តជិត១០ឆ្នាំមកនេះ ដើម្បីឲ្យស្របតាមការ រីក ចម្រើនខាងវិស័យអចលនទ្រព្យនៅកម្ពុជានាពេលបច្ចុប្បន្ន ខណៈក្រសួងសេដ្ឋកិច្ច និង ហិរញ្ញវត្ថុ ក៏បានចេញប្រកាស ស្តីពីការកំណត់មូលដ្ឋានគិតពន្ធប្រថាប់ត្រា ចំពោះការផ្ទេរសិទ្ធិ ឬ សិទ្ធិកាន់កាប់អចលនទ្រព្យ ដែលនឹងត្រូវចាប់អនុវត្តពីថ្ងៃទី០១ កក្កដា ឆ្នាំ ២០១៩នេះ ដើម្បីពង្រឹងការប្រមូលចំណូលពន្ធលើវិស័យអចលនទ្រព្យនៅខេត្តសៀមរាប ដែលជាចំណូលថវិកាថ្នាក់ក្រោមជាតិ សម្រាប់អភិវឌ្ឍន៍មូលដ្ឋាន ឲ្យកាន់តែរីក ចម្រើនថែមទៀត ។
សូមបញ្ជាក់ថា ក្នុងឆ្នាំ២០១៨ ខេត្តសៀមរាប ទទួលបានចំណូលពីពន្ធប្រថាប់ត្រា លើការផ្ទេរកម្មសិទ្ធិ ឬ សិទ្ធិកាន់កាប់អចលនទ្រព្យ មានចំនួនប្រមាណ ៣៦ប៊ីលានរៀល ស្មើប្រមាណ ៩លានដុល្លា លើចំនួនអចលនទ្រព្យប្រមាណ ១១ពាន់១៨៤មូលដ្ឋាន និង បន្ទាប់ពីទទួលបានការណែនាំរបស់សម្តេចតេជោនាយករដ្ឋមន្ត្រី ក្រសួងក៏បានពិនិត្យកែសម្រួលឧបសម្ព័ន្ធ និង កោះប្រជុំអនុគណៈកម្មការវាយតម្លៃអចលនទ្រព្យខេត្ត ដើម្បីពិនិត្យ ដោយកំណត់យកតម្លៃថ្មីមិនលើសពី៧០ភាគរយ នៃតម្លៃទីផ្សារជាក់ស្តែង ហើយក្នុងការធ្វើបច្ចុប្បន្នភាពតម្លៃ មានការកែសម្រួលភូមិសាស្ត្រ និង បន្ថែមឬកែសម្រួលកំណត់ផ្លូវមេ តំបន់អភិវឌ្ឍន៍ ឬ បុរីដែលទើប កើតថ្មី និង ទីប្រជុំជន ដើម្បីងាយស្រួលក្នុងការអនុវត្ត និង កាត់បន្ថយកម្រិតលម្អៀងតម្លៃ សំដៅធានាបាននូវសមធម៌ ៕
អត្ថបទ និង រូបថត : លោក ម៉ី សុខារិទ្ធ
កែសម្រួលអត្ថបទ : លោក លីវ សាន្ត
