កិច្ចប្រជុំអន្តរក្រសួងលើកទី៣ ដើម្បីពិនិត្យលើ សេចក្តីព្រាងច្បាប់ស្តីពីសិទ្ធ ទទួលព័ត៌មាន ដែលរៀបចំឡើងដោយ ក្រសួង ព័ត៌មាន បានប្រារព្ធធ្វើនៅ ព្រឹក ថ្ងៃទី ២៤ ខែ មេសា ឆ្នាំ ២០១៩ ក្រោមវត្តមានប្រធានអង្គប្រជុំ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន និងវត្តមានចូលរួមពីសំណាក់ ឯកឧត្តម ជាអ្នក ជំនាញ ផ្នែក ច្បាប់ មកពី ក្រសួង គន្លឹះ តំណាង ក្រុមប្រឹក្សាអ្នកច្បាប់ ទីស្តីការ គណៈរដ្ឋមន្ត្រី និង ក្រុមប្រឹក្សាសេដ្ឋកិច្ចសង្គម វប្បធម៏ ទីស្តីការគណៈរដ្ឋមន្ត្រី ដើម្បីធ្វើ ការ ពិនិត្យពិភាក្សា ក្នុងការ ចូលរួមផ្តល់ ធាតុផ្សុំ សម្រាប់សេចក្តីព្រាង ច្បាប់នេះ ឲ្យមានលក្ខណៈគ្រប់ជ្រុងជ្រោយ តាមសមត្ថកិច្ចរបស់ក្រសួង ស្ថាប័នពាក់ព័ន្ធ នីមួយៗ និងស្របតាមស្ថានភាពនយោបាយច្បាប់ នៃព្រះរាជាណាចក្រ កម្ពុជា ។
គួរបញ្ជាក់ដែរថា ច្បាប់ស្តីពីសិទ្ធទទួលព័ត៌មាននេះ ត្រូវបានរាជរដ្ឋាភិបាល ប្រគល់ភារកិច្ចជូន ក្រសួង ទំនាក់ទំនងព្រឹទ្ធសភា រដ្ឋសភា និងអធិការកិច្ច មុនដំបូងបង្អស់ ជាអ្នករៀបចំ បន្ទាប់មកនៅខែវិច្ឆិកា ឆ្នាំ ២០១៣ រាជរដ្ឋាភិបាលក៏បានប្រគល់ភារកិច្ចនេះ មកឲ្យក្រសួងព័ត៌មានជាអ្នករៀបចំម្តង ក្នុងនោះក្រសួងព័ត៌មានត្រូវ ដឹកនាំវេទិកា ពិគ្រោះយោបល់ជាមួយអ្នកសារព័ត៌មានអង្គការសង្គមស៊ីវិល និងក្រសួង ស្ថាប័ន ពាក់ពន្ធ័ ដើម្បីរៀបចំតាក់តែង សេចក្តីព្រាងច្បាប់ស្តីពីសិទ្ធទទួលព័ត៌មាន នេះ ឡើង។ បន្ទាប់មក នៅក្នុងខែកុម្ភៈ ឆ្នាំ ២០១៥ ក្រសួងព័ត៌មាន បានសហការ ជាមួយ អង្គការ យូណេស្កូ ប្រចាំកម្ពុជា ដោយបានបង្កើតក្រុមការងារបច្ចេកទេស ហៅកាត់ថា TWG A 2 I ( អេ ធូ អាយ ) ហើយកិច្ចពិភាក្សាកែសម្រួលសេចក្តី ព្រាងច្បាប់នេះ សម្រាប់ក្រុមការងារបច្ចេកទេស ទើបតែបញ្ចប់កាលពី ឆ្នាំកន្លងទៅនេះ។
សរុបជារួម ច្បាប់នេះ បានតាក់តែងមានរយៈពេលជាង ១២ឆ្នាំមក តែនៅពុំទាន់អាចចេញជារូបរាងនៅឡើយ រហូតដល់ភារកិច្ចនេះបានប្រគល់ជូនក្រសួងព័ត៌មានជារៀបចំតាក់តែង ទើបតែ ដំណើរការបានរយៈពេល ២ ឆ្នាំ កន្លះប៉ុណ្ណោះ ដោយមាន ការចូលរួមពីគ្រប់ ផ្នែកពាក់ពន្ធ័ រួមទាំងអង្គការអន្តរជាតិ អង្គការសហ ប្រជាជាតិ ហើយក្នុងនោះអង្គការយូណេសស្កូ បានកំណត់ថា របៀបធ្វើច្បាប់ស្តីពីសិទ្ធិ ទទួលព័ត៌មាន នេះ គួរតែជាគំរូ សម្រាប់បណ្តាប្រទេសក្នុងអាស៊ាន ដែលមាន លក្ខណះបើកទូលាយ ។
ឯកឧត្តម មាស សុភ័ណ្ឌ អនុរដ្ឋលេខាធិការ ប្រធានអនុគណៈកម្មការរៀបចំ តាក់តែង សេចក្តីព្រាងច្បាប់ ស្តីពីសិទ្ធទទួលព័ត៌មាន និង ជាអ្នកនាំពាក្យ នៃក្រសួងព័ត៌មាន បានលើកឡើងថា សេចក្តីព្រាងច្បាប់នេះ គឺជាលទ្ធផលនៃការ អភិវឌ្ឍក្របខណ្ឌគតិយុត្ត របស់រាជរដ្ឋាភិបាល ដើម្បីគាំទ្រដល់គោលនយោបាយ នៃការធ្វើកំណែទម្រង់ប្រព័ន្ធរដ្ឋបាល និងអភិបាលកិច្ចល្អ ក្នុងការផ្តល់សេវាជូន ប្រជាពលរដ្ឋប្រកបដោយប្រសិទ្ធភាព តម្លាភាព និងគណនេយ្យភាព ស្របតាមយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលកម្ពុជា។
អត្ថបទ និង រូបភាព ៖ ក្រសួងព័ត៌មាន
