នៅពាក់កណ្ដាលឆ្នាំ២០១៩នេះ គម្រោង អភិវឌ្ឍន៍ទីក្រុងវៃឆ្លាតអាស៊ាន ក្នុងក្រុងសៀមរាប នឹងត្រូវចុះធ្វើការសិក្សាជាលើកដំបូង ដោយទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន ហៅកាត់ថា JICA។ទីក្រុងចំនួន៣ រួមមាន រាជធានីភ្នំពេញ ក្រុងបាត់ដំបង និងក្រុងសៀមរាប នឹងត្រូវដាក់បញ្ចូលក្នុងគម្រោងបណ្តាញទីក្រុងឆ្លាតអាស៊ាន នេះបើតាមការឲ្យដឹងពីរាជរដ្ឋាភិបាលកម្ពុជា។
-អ្វីជាទីក្រុងវៃឆ្លាត?
ទីក្រុងឆ្លាតវៃសំដៅដល់ការ ប្រើប្រាស់បច្ចេកវិទ្យាទំនើបជាចម្បង និងមាននិរន្តរភាពដើម្បីដោះស្រាយផលប៉ះពាល់ជូនប្រជាពលរដ្ឋ ដែលបង្កឡើងដោយការរីកចម្រើនដ៏ឆាប់រហ័សនៃ ការធ្វើនគរូបនីយកម្ម ឬការអភិវឌ្ឍទីក្រុង ដូចជា ការកកស្ទះចរាចរណ៍ បំពុលខ្យល់ ភាពក្រីក្រ គម្លៀតសង្គម ការបែងចែកគ្នារវាងប្រជាជនទីក្រុងនិងជនបទ រួមទាំងបញ្ហាសន្តិសុខ និងសុវត្ថិភាពរបស់ប្រជាពលរដ្ឋផង។ ហើយបណ្តាញទីក្រុងឆ្លាតវៃអាស៊ាននេះ ក៏មានបំណងបង្កើនការតភ្ជាប់ក្នុងតំបន់ ដែលនឹងត្រូវបានបង្កើតឡើងដោយទីក្រុងចំនួន ២៦ ពីប្រទេសនៅក្នុងតំបន់អាស៊ាន។
បើតាមជំនួបពិភាក្សា កាលពីថ្ងៃទី ២៤ ខែមេសា ឆ្នាំ ២០១៩ម្សិលមិញនេះ រវាងថ្នាក់ដឹកនាំខេត្តសៀមរាប ជាមួយប្រតិភូទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន ហៅកាត់ថា JICA ពាក់ព័ន្ធ នឹងគម្រោងអភិវឌ្ឍន៍ទីក្រុងវៃឆ្លាតអាស៊ាន ក្នុងក្រុងសៀមរាបនេះ លោក តេស្យូជី ហ្គុតុ (Testuji Goto) ទីប្រឹក្សា ជាន់ខ្ពស់ ផ្នែករៀបចំផែនការ និងការអភិវឌ្ឍហេដ្ឋារចនាសម្ព័ន្ធ របស់ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន បានឲ្យដឹងថា គោលបំណង នៃជំនួបពិភាក្សាការងារក្នុងខេត្តសៀមរាបនាពេលនេះ គឺដើម្បីជម្រាបពីការចុះសិក្សាពី គម្រោងអភិវឌ្ឍន៍ទីក្រុងវៃឆ្លាត អាស៊ាន ក្នុងក្រុងសៀមរាប ហើយក៏ជាជំនួប ដើម្បីស្នើសុំកិច្ចសហការពីរដ្ឋបាលខេត្តសៀមរាបផងដែរ ដែលគម្រោងសិក្សានេះគ្រោងនឹងបែងចែកចេញជា ២ ផ្នែក គឺ ផ្នែកទី១ សិក្សាចាប់ពីខែ កក្ដដា ដល់ ខែ ធ្នូ ឆ្នាំ ២០១៩ និងផ្នែកទី២ នឹងចាប់ផ្ដើម អនុវត្តគម្រោង ចាប់ពីខែ មករា ដល់ខែ មិថុនា ឆ្នាំ ២០២០។
លោក លី សំរិទ្ធ អភិបាលរងខេត្តសៀមរាប តំណាងឯកឧត្តម ទៀ សីហា អភិបាលខេត្តសៀមរាប បានសម្តែងការស្វាគមន៍ ចំពោះគម្រោងចុះសិក្សារបស់ទីភ្នាក់ងារសហប្រតិបត្តិការអន្តរជាតិ របស់ប្រទេសជប៉ុន(JICA)នានេះ លោកអភិបាលរងខេត្ត បានសង្ឃឹមយ៉ាងមុតមាំថា គម្រោងអភិវឌ្ឍន៍នេះ នឹងធ្វើការគ្រប់គ្រងក្នុងខេត្តសៀមរាប មានភាពងាយស្រួល តាមរយៈការប្រើប្រាស់បច្ចេកវិទ្យាទំនើប និងអភិវឌ្ឍន៍ប្រកបដោយចីរភាព ព្រមទាំងចូលរួមដោះស្រាយបញ្ហាប្រឈមនានា ដែលនឹងអាចកើតមានឡើង ដោយសារការរៀបចំអភិវឌ្ឍន៍ក្រុងសៀមរាបនាពេលអនាគត។
ទន្ទឹមនឹងនោះ លោកអភិបាលរងខេត្ត បង្ហាញនូវកិច្ចសហការយ៉ាងពេញទំហឹង ដើម្បីសម្របសម្រួលធ្វើយ៉ាងណា ឲ្យគម្រោងអភិវឌ្ឍន៍នេះដំណើរការដោយរលូន និងជោគជ័យ ដើម្បីផលប្រយោជន៍ និងការអភិវឌ្ឍប្រទេសកម្ពុជា និងប្រជាជាតិសមាគមអាស៊ានទាំងមូល។
អត្ថបទ និង រូបភាព ៖ លោក អ៊ិន សីហរិទ្ធ និងលោក សេង ផល្លី
