ក្រុមនិស្សិតអាហារូបករណ៍របស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន នៃវិទ្យាស្ថានខ្មែរជំនាន់ថ្មី ចំនួន១១៨នាក់ បានធ្វើកម្មសិក្សានៅតាមប្រាសាទបុរាណមួយចំនួនក្នុងតំបន់អង្គរ ដើម្បីឈ្វែងយល់ពីប្រវត្ដិសាស្ដ្រស្ថាបត្យកម្មរបស់ខ្មែរ បន្ទាប់ពីពួកគាត់ធ្លាប់បានសិក្សាតាមទ្រឹស្ដីមេរៀនកន្លងមក ដែលកម្មសិក្សានេះមានរយៈពេល ៣ថ្ងៃ ចាប់ពីថ្ងៃទី១-៣ ខែកញ្ញា ឆ្នាំ២០២៣។
លោកបណ្ឌិត កុល សារូ នាយករងនៃវិទ្យាស្ថានខ្មែរជំនាន់ថ្មី មានប្រសាសន៍ថា ក្រុមនិស្សិតដែឡបានចុះសិក្សាស្រាវជ្រាវនាឱកាសនេះ គឺពួកគេបាចុះទៅតាមសំណង់ប្រាសាទមួយចំនួនដែលស្ថិតនៅតំបន់អង្គរ រួមមាន៖ ប្រាសាទបាគង ប្រាសាទព្រះគោ ប្រាសាទបន្ទាយស្រី ប្រាសាទបន្ទាយសំរ៉ែ ប្រាសាទអង្គរធំ ប្រាសាទអង្គរវត្ដ និងប្រាសាទសំខាន់ៗមួយចំនួនទៀត។ ក្រោយពេលបំពេញបេសសកម្មក្រុមនិស្សិតក៏បានធ្វើបទបង្ហាញតាមក្រុមនីមួយៗ បន្ទាប់ពីពួកគាត់បានស្វែងយល់ដឹងខ្លះៗពីបេតិកភ័ណ្ឌស្ថាបត្យកម្មសំណង់ប្រាសាទខ្មែរ។
លោកបណ្ឌិត កុល សារូ បញ្ជាក់ថា ក្រុមនិស្សិតមានជំនាញខ្លះរៀនជំនាញផ្នែកច្បាប់ រៀនវិទ្យាសាស្ដ្រអប់រំ ប៉ុន្ដែពួកគាត់ត្រូវតែចេះចឹងពីប្រវត្ដិសាស្ដ្ររបស់ខ្លួនផងដែរ ព្រោះការគ្រប់គ្រងរដ្ឋមួយត្រូវការចេះច្រើនជំនាញ។ លោកក៍បានអរគុណដល់នាយកវិទ្យាស្ថាន ដែលតែងផ្ដល់ឱ្យនិស្សិតចុះកម្មសិក្សាឈ្វែងយល់ពីប្រាសាទបុរាណផងដែរ។ ការទស្សនកិច្ចសិក្សានេះជាលើកទី២០ហើយ ដែលធ្វើឱ្យពួកគាត់មានភាពសប្បាយរីករាយផងនិងបានចំណេះបន្ថែមដឹងផង។លោកបន្ដថា ជាលទ្ធផលក្រុមនិស្សិតបានយល់កាន់តែច្បាស់ និងទទួលបានចំណេះដឹងបន្ថែមទៀតពីសម្បត្ដិបេតិកភ័ណ្ឌ បន្ទាប់ពីបានសិក្សាតាមទ្រឹស្ដី។លោករំពឹងថា ក្រុមនិស្សិតទាំងអស់ នឹងអនុវត្ដចំណេះដឹងរបស់ខ្លួនទៅធ្វើការដឹកនាំបន្ដវេនទៅនិស្សិតជំនាន់ក្រោយទៀត និងយកចំណេះដឹងទៅកសាងនិងអភិវឌ្ឍន៍ប្រទេសជាតិឱ្យទទួលបានជោគជ័យបន្ថែមទៀត។
ក្រុមនិស្សិតដែលចូលរួមក្នុងឱកាសនោះ បានថ្លែងអំណគុណដល់ថ្នាក់ដឹកនាំសាលា ដែលតែយកចិត្ដទុកដាក់ផ្ដល់អាហាររូបករណ៍ និងផ្ដល់ឱកាសឱ្យក្រុមនិស្សិតធ្វើកម្មសិក្សាស្វែងយល់ពីបេតិកភ័ណ្ឌបន្ថែមទៀតពីលើទ្រឹស្ដី នៅតាមប្រាសាទបុរាណក្នុងតំបន់អង្គរ។ ចំពោះទស្សកិច្ចរយៈពេលបីថ្ងៃនេះ បានធ្វើឱ្យពួកគាត់ស្គាល់កាន់តែច្បាស់ពីសំណង់ស្ថាបត្យកម្មរបស់បុព្វការីជន ដែលបានបន្សល់ទុកឱ្យខ្មែរជំនាន់ក្រោយ។ ពួកគាត់បន្ដថា ប្រវត្ដិសាស្ដ្រវប្បធម៌ អរីយធម៌ពិតជាបេតិកភ័ណ្ឌរបស់ជាតិខ្មែរមិនអាចរកអ្វីមកកាត់ថ្លៃបានឡើយ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
