នៅថ្ងៃទី៤ ខែកញ្ញា ឆ្នាំ២០២៣នេះ អាងទឹកទំនប់ម្កាក់ ស្ថិតក្នុងស្រុកជីក្រែង ខេត្តសៀមរាប បានធ្វើការបើកទ្វារទឹក ដើម្បីបញ្ចៀសការលិចលង់ផ្នែកខាងលើ បន្ទាប់ពីមន្រ្តីជំនាញ នៃមន្ទីរធនធានទឹក និងឧតុនិយម ខេត្តសៀមរាប សង្កេតឃើញកម្រិតទឹកក្នុងអាងមានការកើនឡើងជាបន្តបន្ទាប់។
ទន្ទឹមនោះ រដ្ឋបាលឃុំស្ពានត្នោត ក៏បានជូនដំណឹងលើ ផេក Facebook របស់ខ្លួនថា “យោងទៅតាមការជូនដំណឹងរបស់រដ្ឋបាលស្រុកជីក្រែង នឹងមន្ទីរធនធានទឹក នឹងឧតុនិយមខេត្តសៀមរាប ទំនប់ទឹកម្កាក់នឹងបើកទ្វារទឹកទាំងអស់ដើម្បីរំដោះទឹកចេញពីទំនប់នៅថ្ងៃទី០៤ ខែកញ្ញា ឆ្នាំ២០២៣។ដូចនេះសូមបងប្អូនប្រជាពលរដ្ឋ ជាពិសេសអ្នកដែលមានទីលំនៅជាប់នឹងប្រឡាយមេ មេត្តាបង្កើនការប្រុងប្រយ័ត្ន នឹងត្រៀមក្រែងមានរឿងហេតុអាក្រក់ណាមួយកើតឡើង។”
ដោយឡែក លោក ឡែម ខែម មន្ត្រីកាន់ទ្វារទឹក នៃមន្ទីរធនធានទឹក និងឧតុនិយម ខេត្តសៀមរាប បង្ហាញថា កម្រិតទឹកនៅរយៈពេល ៣ថ្ងៃចុងក្រោយបានកើនឡើងដល់កម្រិត១៦.៨៥ម៉ែត្រ ដែលជាកម្រិតត្រូវបើកទ្វារទឹក ប៉ុន្តែនេះមិនមែនមានន័យថាជាកម្រិតប្រកាសអាសន្នឡើយ។ ដោយលោកបញ្ជាក់ថា ការបើកទឹកនៅពេលនេះ គឺចៀសវាងការបើកទឹកចេញដោយគំហុក ដែលអាចបង្កឲ្យប៉ះពាល់សំណង់ទ្វារទឹក លិចផ្ទៃដីដាំដុះ និងភូមិឋានប្រជាពលរដ្ឋ។
ជាមួយនោះ លោក ឡែម ខែម ក៏បានបញ្ជាក់បន្ថែមផងដែរថា ការបើកទឹកចេញពីអាងទឹកទំនប់ម្កាក់នៅពេលនេះ ពុំបង្កផលប៉ះពាល់ដល់ប្រជាពលរដ្ឋ នៅផ្នែកខាងក្រោមទ្វារទឹកឡើយ ដោយសារទឹកដែលបើកចេញ នឹងហូរចូលទៅក្នុងស្ទឹងជីក្រែង រហូតដល់ទំនប់៧៨ និងចូលទៅកាន់បឹងទន្លេសាប។
គួរជម្រាបថា អាងទឹកទំនប់ម្កាក់ស្ថិតនៅភូមិម្កាក់ ឃុំគោកធ្លកលើ ស្រុកជីក្រែង ខេត្តសៀមរាប ត្រូវបានកសាងឡើងនៅឆ្នាំ១៩៧០។ នៅឆ្នាំ២០១៥ ក្រសួងធនធានទឹក និង ឧតុនិយម សហការជាមួយក្រុមវិស្វករប្រទេសចិន បានធ្វើការជួសជុល ស្ថាបនាទ្វារទឹក ទំនប់បង្ហៀរទឹក និងប្រអប់ទ្វារទឹកចែកចាយ ដើម្បីសម្រួលដល់ការស្រោចស្រពផ្ទៃដីកសិកម្ម។
អត្ថបទ : លោក សេង ផល្លី