ពាក់ព័ន្ធនឹងការអនុវត្តគោលនយោបាយ និង ការលើកម្ពស់ការធ្វើចំណាកស្រុកដោយស្របច្បាប់បន្ទាប់ពីសន្និសីទអន្តរជាតិ ស្តីពីកិច្ចសហប្រតិបត្តិការទ្វេរភាគី លើការងារទេសន្តរប្រវេសន៍ការងារនិងអំពើជួញដូរមនុស្សលើក ទី២រវាងព្រះរាជាណាកម្ពុជា និងព្រះរាជាណាចក្រថៃ កាលពីថ្ងៃទី ២៤ និងថ្ងៃទី២៥ ខែមេសា ឆ្នាំ២០១៩ នៅសណ្ឋាគារអង្គរមឺរ៉ាខល ក្នុងក្រុងសៀមរាប ក្រោមអធិបតីភាព ជូ ប៊ុនអេង រដ្ឋលេខាធិការក្រសួងមហាផ្ទៃ និង ជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងនិងការជួញដូរមនុស្ស រួចមក គណៈប្រតិភូនៃព្រះរាជាណាចក្រថៃ និងអង្គការពាក់ព័ន្ធ ដែលដឹកនាំដោយ លោកស្រី Manoothum Naovanan អ្នកសម្របសម្រួលរបស់អង្គការក្រុមអ្នកស្ម័ត្រចិត្តស៊ីវិល បានអញ្ជើញមកជួបពិភាក្សាការងារ និង ផ្លាស់ប្តូរបទពិសោធន៍ជាមួយក្រុមការងារនៃគណៈកម្មាធិការប្រយុទ្ធប្រឆាំងអំពើ ជួញដូរមនុស្សខេត្តសៀមរាប នៅសាលប្រជុំសាលាខេត្តសៀមរាប កាលពីព្រឹកថ្ងៃទី២៦ ខែមេសា ឆ្នាំ២០១៩ម្សិលមិញនេះ ទាក់ទងនឹងការអនុវត្តគោលនយោបាយ និង ការលើកម្ពស់ការធ្វើចំណាកស្រុកដោយស្របច្បាប់ ។
ក្នុងឱកាសនោះ លោកស្រី យូ សុភា អភិបាលរងខេត្ត ជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានបង្ហាញជូនប្រតិភូអំពីឆន្ទៈដ៏មុះមុតរបស់រាជរដ្ឋាភិបាលកម្ពុជា ក្នុងការបង្ការទប់ស្កាត់ ការបង្ក្រាប ការផ្តន្ទាទោសជនល្មើសជួញដូរមនុស្ស និង អំពើធ្វើអាជីវកម្មផ្លូវភេទ និងបំផុសការយល់ដឹង ការប្រុងស្មារតី និងធ្វើសកម្មភាពប្រយុទ្ធប្រឆាំង អំពើជួញដូរមនុស្សគ្រប់រូបភាព វិធីទប់ស្កាត់ការជួញដូរមនុស្ស និង អំពើកេងប្រវ័ញ្ចផ្លូវភេទលើស្ត្រី និង កុមារ តាមគ្រប់រូបភាព នៅទូទាំងខេត្ត ទៅតាមតួនាទី ភារកិច្ច លទ្ធភាព សមត្ថភាព ការសហការ និងរួមចំណែកដោយឆន្ទៈ និងមនសិការ ព្រមទាំងធ្វើការពង្រីកការយល់ដឹង និងទទួលបានព័ត៌មានពាក់ព័ន្ធ និង វិសាលភាពនៃបទល្មើសជួញដូរមនុស្សដល់ប្រជាពលរដ្ឋ របស់កិច្ចប្រឹងប្រែងរបស់រាជរដ្ឋាភិបាល រួមទាំងដៃគូពាក់ព័ន្ធទាំងអស់ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
