ក្នុងឱកាសជួបពិភាក្សាការងារជាមួយឯកឧត្តម ហង់ ពៅ អគ្គនាយកអាជ្ញាធរជាតិអប្សរា នារសៀលថ្ងៃទី២៦ ខែមេសា ឆ្នាំ២០១៩ម្សិលមិញនេះ លោកសាស្ត្រាចារ្យ ហ៊ីរ៉ាយ៉ាម៉ា សិងគិជិ ប្រធានគណៈកម្មការបច្ចេកទេសគម្រោងជួសជុលស្ពានហាលប្រាសាទអង្គរវត្ត បានលើកឡើងថា ប្រាសាទក្នុងរមណីយដ្ឋានអង្គរមានអាយុកាលជាងមួយពាន់ឆ្នាំ ហើយតាមរយៈកិច្ចសហការក្នុងការអភិរក្សនិងការជួសជុលកន្លងមក ប្រាង្គប្រាសាទទាំងនេះនឹងនៅតែរឹងនាំបានរាប់ពាន់ឆ្នាំទៅមុខទៀត ដូច្នេះក្នុងគម្រោងអភិរក្សជួសជុលស្ពានហាលប្រាសាទអង្គរវត្តនេះ សូមថ្លែងអំណរគុណដល់អាជ្ញាធរជាតិអប្សរា ដែលបានផ្តល់កិច្ចសហប្រតិបត្តិការយ៉ាងជិតស្និទ្ធជាមួយសាកលវិទ្យាល័យ សូហ្វីយ៉ា ព្រមទាំងបានវាយតម្លៃខ្ពស់ចំពោះអ្នកជំនាញខ្មែរដែលបំពេញការងារបានយ៉ាងល្អ និងបានបង្កើនសមត្ថភាពជំនាញដ៏រឹងមាំក្នុងពេលអនុវត្តគម្រោង ហើយតាមរយៈនេះ សាកលវិទ្យាល័យសូហ្វីយ៉ា ប្តេជ្ញាជួយជ្រោមជ្រែងអាជ្ញាធរជាតិអប្សរាក្នុងកិច្ចអភិរក្សប្រាសាទក្នុងតំបន់អង្គរបន្តទៀត ។
ជាការឆ្លើយតប ឯកឧត្តម ហង់ ពៅ បានសម្តែងនួវការថ្លែងអំណរគុណចំពោះកិច្ចសហការរបស់សាកលវិទ្យាល័យសូហ្វីយ៉ា ដែលបានជួយនិងគាំទ្រគម្រោងការជួសជុលអភិរក្សប្រាង្គប្រាសាទ , ការស្រាវជ្រាវ និង ការបណ្តុះបណ្តាលធនធានមនុស្សដល់អ្នកជំនាញខ្មែរ ខណៈសមិទ្ធផលកន្លងមកនេះ មានទាំងការអភិរក្សជួលជុលប្រាង្គប្រាសាទនៅរមណីយដ្ឋានអង្គរ និងការបណ្តុះបណ្តាលធនធានមនុស្ស ដែលពិតជាមិនអាចផ្តាច់ចេញពីកិច្ចសហការយ៉ាងល្អប្រសើរពីសាកលវិទ្យាល័យសូហ្វីយ៉ាបានឡើយ ដូច្នេះក្នុងឱកាសនេះ សូមសម្ដែងនូវកោតសរសើរចំពោះទឹកចិត្ត ក្តីស្រឡាញ់ និងការលះបង់របស់សាស្ត្រាចារ្យជំនាញជាន់ខ្ពស់គ្រប់ផ្នែកទាំងអស់រនៃសាកលវិទ្យាល័យសូហ្វីយ៉ា មិនថាមានវ័យចំណាស់ណាស់ទៅហើយ មិនថាអាកាសធាតុក្តៅយ៉ាងណា ក៏នៅតែមកបំពេញភារកិច្ចយ៉ាងទៀងទាត់ និងខ្ជាប់ខ្ជួននៅរមណីយដ្ឋានអង្គរ ដែលសកម្មភាពនេះ គឺជាគំរូដ៏គួរឲ្យកោតគោរពបំផុត៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
