នាព្រឹកថ្ងៃទី២៧ ខែមេសា ឆ្នាំ២០១៩នេះ សាលាវេសហ្គេតអន្តរជាតិខេត្តសៀមរាប បានរៀបចំតាំងពិព័រណ៍អប់រំ និងការប្រឡងប្រណាំងអំណានប្រចាំឆ្នាំ២០១៩ លើកទី២ ដើម្បីបង្ហាញស្នាដៃដ៏ប៉ិនប្រសព្វរបស់ប្អូនៗជាសិស្សានុសិស្ស និង វាស់ស្ទង់សមត្ថភាពនៃការអាន តាមរយៈការប្រឡង ដើម្បីឱ្យស្របទៅតាមទិសដៅរបស់ក្រសួងអប់រំយុវជននិងកីឡា ក៏ដូចជាផ្តល់ឱកាសឱ្យប្អូនៗ យកចិត្តទុកដាក់ក្នុងការអានឱ្យបានកាន់តែច្រើន ស្រមតាមភាសិតខ្មែរថា អានច្រើនចេះច្រើន ឬអានមួយជីវិតក៏មិនចេះចប់ ។
លោក រ័ត្ន រស្មី នាយកសាលាវេស្ទើនអន្តរជាតិសាខាខេត្តសៀមរាប បានឲ្យដឹងថា នេះគឺជា ឆ្នាំទី២ ដែលសាលា បានរៀបចំនូវកម្មវិធីតាំងពិព័រណ៍អប់រំបែបនេះឡើង ក្រោមការផ្តួចផ្តើមឡើងដោយលោកគ្រូ អ្នកគ្រូ ដោយស្ថិតក្នុងគោលបំណងផ្តល់ឱកាសឲ្យសិស្សានុសិស្ស បាននាំយកចំណេះដឹង តាមរយៈនៃការរៀនសូត្ររបស់ខ្លួនលើមេរៀនទ្រឹស្តី ទៅជាការអនុវត្តជាក់ស្តែង ហើយក៏ជាការវាស់ស្ទង់ចំណេះដឹងរបស់សិស្សផងដែរ ឃណៈសាលាក៏បានរៀបចំដាក់បញ្ផូលនូវការប្រឡងប្រជែងអំណាននៅក្នុងកម្មវិធីពិពណ៏អប់រំនេះផងដែរ ដើម្បីឲ្យស្របតាមទិសដៅក្រសួងអប់រំយុវជន និងកីឡា និងក៏ដូចជាការផ្តល់ឱកាសឲ្យប្អូនស្រឡាញ់ និងយកចិត្តទុកដាក់ក្នុងការអានឲ្យកាន់តែច្រើន ។
លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍ថា កូនៗបានមកសិក្សាក្នុងសាលា គឺអាស្រ័យដោយមាតាបិតាលះបង់ធនធាន និងកម្លាំងកាយចិត្ត ក្នុងបំណងឱ្យកូនមានចំណេះដឹងប្រកបដោយគុណភាព ហើយការដែលទទួលបានចំណេះដឹងប្រកបដោយគុណភាពនោះ ក៏អាស្រ័យដោយខ្លួនឯង ព្រមជាមួយនឹងការខិតខំយកចិត្តទុកដាក់របស់លោកគ្រូអ្នកគ្រូផងដែរ ដូច្នេះ ដើម្បីឆ្លើយតបទៅនឹងការចង់បាននេះ សូមប្អូនៗ ក្មួយៗត្រូវប្រឹងប្រែងសិក្សារៀនសូត្រឱ្យអស់ពីសមត្ថភាព ដើម្បីពង្រឹងចំណេះដឹងផ្ទាល់ខ្លួន សម្រាប់រួមគ្នាអភិវឌ្ឍសង្គមគ្រួសារ និងសង្គមជាតិយើងទាំងមូលទៅថ្ងៃអនាគត ៕
អត្ថបទ និង រូបថត ៖ លោក យូ វង្ស និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
