ផលិតផលមួយចំនួន ដែលកំពុងធ្វើចរាចរណ៍ក្នុងខេត្តសៀមរាបមានការក្លែងបន្លំ ស្លាកយីហោ ដែលធ្វើឲ្យប៉ះពាល់ដល់ការលក់ផលិតផលរបស់ក្រុមហ៊ុន នេះបើតាមការលើកឡើងរបស់លោក ឡុ យានវិន (Lu Yanwen)ប្រធានក្រុមហ៊ុន យូណានគ្រុបខូអិលធីឌី តំណាងឲ្យក្រុមហ៊ុនចិនចំនួន១៥។
ក្នុងជំនួបពិភាក្សាជាមួយឯកឧត្តម ទៀ សីហា អភិបាលខេត្តសៀមរាប លោក ឡុ យានវិន (Lu Yanwen) បានបង្ហាញថា ក្រុមហ៊ុនចិនក្នុងខេត្តសៀមរាប ដែលជួបនូវបញ្ហាប្រឈមនេះ បាននិងកំពុងវិនិយោគទៅលើ វិស័យទេសចរណ៍ សុខាភិបាល និង ពាណិជ្ជកម្ម។
លោក ឡុ យានវិន (Lu Yanwen) បានគូសបញ្ជាក់ថា ក្នុងរយៈ ពេល៣ខែនេះ បើទោះបីជាចំនួនភ្ញៀវទេសចរណ៍បរទេសចូលមកទស្សនានៅក្នុងខេត្តសៀមរាប មានការថយចុះក៏ពិតមែន ប៉ុន្ដែពួកលោក កំពុងតែធ្វើការទាក់ទាញដល់អ្នកវិនិយោគចិន ឲ្យចូលមកខេត្តសៀមរាបបន្ថែមទៀត ដើម្បីធ្វើការសិក្សាអំពីវិស័យទេចរណ៍ និង កសិកម្មក្នុងខេត្តមួយនេះ។ ទន្ទឹមនឹងនោះ លោកបានស្នើសុំឲ្យអាជ្ញាធរខេត្តជួយសម្រួលដល់ការនាំចូលឱសថព្យាបាលជំងឺគាំងបេះដូង និងជួយដោះស្រាយបញ្ហាខ្វះថាមពលអគ្គិសនី សម្រាប់ផ្គត់ផ្គង់ដល់រោងមហោស្រពអាណាចក្រអង្គរ ។
ព័ត៌មានជាតិ ថ្មីៗ
ជាការឆ្លើយតប ឯកឧត្តម ទៀ សីហា បានធ្វើការថ្លែងនូវអំណរគុណ ចំពោះក្រុមហ៊ុនចិនទាំង១៥ ដែលបានចូលមក វិនិយោគក្នុងខេត្តសៀមរាប ដែលជាការចូលរួមក្នុងការកាត់បន្ថយភាពក្រីក្រនៅកម្ពុជា ព្រមទាំងបានបង្កើននូវការងារជូនដល់ប្រជាពលរដ្ឋក្នុងខេត្តទៀតផង ។
ឯកឧត្តម ទៀ សីហា មានប្រសាសន៍ទៀតថា ចំពោះបញ្ហានៃការក្លែងបន្លំស្លាកយីហោផលិតផល យើងនឹងជំរុញដល់មន្ទីរ អង្គភាពជំនាញ ចុះធ្វើការត្រួតពិនិត្យ នូវរាល់ផលិតផលនានា ដែលបានកំពុងធ្វើចរាចរណ៍នៅក្នុងទីផ្សារនៅខេត្ត សៀមរាប ព្រោះវាជាបញ្ហាដ៏ធំបំផុតចំពោះបញ្ហាសុខភាពរបស់ប្រជាពលរដ្ឋ និង ភ្ញៀវទេសចរ រីឯការនាំចូលនូវឱសថព្យាបាល សុំឲ្យក្រុមហ៊ុនមានកិច្ចសហការជាមួយវិស័យជំនាញ អំពីការធ្វើបែបបទទៅតាមផ្លូវច្បាប់ ។
ឯកឧត្តមអភិបាលខេត្តសៀមរាប បានបញ្ជាក់ទៀតថា បញ្ហាអគ្គិសនីវិញ ដោយឆ្នាំនេះប្រទេសកម្ពុជា ទទួលរងនូវរលកកំដៅក្តៅខ្លាំង ដែលបានធ្វើឲ្យប៉ះពាល់តំបន់ជាច្រើនក្នុងខេត្ត ដើម្បីកាត់បន្ថយនូវកង្វះខាតថាមពលអគ្គិសនី រាជរដ្ឋាភិបាលកម្ពុជា បានបញ្ជាទិញថាមពលអគ្គិសនីបន្ថែមពីបណ្ដាប្រទេសជិតខាង ទោះបីជាមានការដោះស្រាយយ៉ាងណាក្ដី ក៏មិនអាចបំពេញតម្រូវរបស់ប្រជាពលរដ្ឋក្នុងអំឡុងរដូវប្រាំងឆ្នាំនេះ បានមួយភាគរយបានឡើយ ហេតុដូច្នេះរាជរដ្ឋាភិបាលកម្ពុជា សូមការអធ្យាស្រ័យពីបណ្ដាអ្នកវិនិយោគ ដោយហេតុថានេះជាបាតុភូតធម្មជាតិមិនអាចប៉ាន់ស្មានបាន និងកើតឡើងនៅជុំវិញពិភពលោក។
ឯកឧត្តម ទៀ សីហា បានសម្ដែងនូវការសាទរផងដែរ ដែលប្រតិភូក្រុមហ៊ុនចិន នឹងបន្តជំរុញដល់អ្នកវិនិយោគចិន ចូលមកធ្វើការសិក្សា ក្នុងវិស័យទេសចរណ៍ និង កសិកម្ម ក្នុងខេត្តសៀមរាប ដែលវានឹងជំរុញឲ្យសេដ្ឋកិច្ចរបស់ប្រជាពលរដ្ឋក្នុងខេត្ត កាន់តែមានការរីកចម្រើនបន្ថែមទៀត ៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត និង លោកសេង ផល្លី
