កាលពីវេលាម៉ោង ៧យប់ ថ្ងៃទី២៨ ខែមេសា ឆ្នាំ២០១៩ មានបាតុភូតខ្យល់កន្ត្រាក់ បណ្ដាលឲ្យរលំស្លាកស្វាគមន៍ឆ្នាំថ្មីកាត់ទទឹងផ្លូវ សង្កត់រថយន្តចំនួន៤គ្រឿង ហេតុការណ៍នេះបានកើតនៅចំណុចផ្លូវជាតិលេខ៦ ខាងកើតស្ពានព្រះរាជដំណាក់ កណ្តាលក្រុងសៀមរាប។
ប្រភពពីពលរដ្ឋឃើញហេតុការណ៍បានឲ្យដឹងថា នៅមុនពេលរលំរបានេះ ផ្ទៃមេឃមានសភាពងងឹតរកកលភ្លៀង ខណៈពេលនោះមានខ្យល់កន្ទ្រាក់បក់បោកយ៉ាងខ្លាំងពេញក្នុងក្រុងសៀមរាប បណ្ដាលឲ្យស្លាកស្វាគមន៍ឆ្នាំថ្មី កាលពីថ្ងៃបុណ្យចូលឆ្នាំប្រពៃណីខ្មែរ២០១៩កន្លងទៅ របស់រដ្ឋបាលខេត្តសៀមរាប បានរលំបាក់ចុះទាំងស្រុង។
ប្រភពដដែលបានបញ្ជាក់ថា រថយន្ត ទាំង៤គ្រឿងនោះ រួមមាន រថយន្ត ហាយ ឡិនឌឺ ខូចខាត ពាក់កណ្តាលតួរថយន្ត រថយន្ត តូយូតា ហាយឡាក់ ខូចខាតផ្នែកខាងមុខ រថយន្ត ម៉ាក តូយ៉ូតា សាយអន ពាក់កណ្តាលតួរថយន្ត និងរថយន្ត ម៉ាក ហ្វត ត្រូវចំកញ្ចក់ផ្នែកខាងមុខបន្តិច ក្នុងហេតុការណ៍នេះ ពុំមានមនុស្សរងរបួស ឬបាត់បង់អាយុជីវិតឡើយ។
ព័ត៌មានជាតិ ថ្មីៗ
បន្ទាប់ពីកើតហេតុ ក្នុងយប់ដដែល ក្រុមការងាររបស់អាជ្ញាធរខេត្តសៀមរាប បានកាត់ស្លាកបាក់រលំនោះចេញពីផ្លូវ និងធ្វើកំណត់ហេតុខូចខាតជាមួយម្ចាស់រថយន្តទាំង៤គ្រឿង៕
អត្ថបទ និង រូបភាព៖ លោក ជា ស្រស់ និង លោក ខេង ឧត្តម
កែសម្រួលអត្ថបទ ៖ លោកសេង ផល្លី
