កាលពីរសៀលថ្ងៃទី២៨ខែមេសាឆ្នាំ២០១៩នេះនៅវិហារឥស្លាមអាន់នៀកម៉ាស់ដែលស្ថិតនៅភូមិ ស្ទឹងថ្មី សង្កាត់ស្វាយដង្គំក្រុងសៀមរាប បានរៀបចំពិធីអបអរសាទរស្រហាន់អាហ្គាម៉ា និងទទួលស្វាគមន៍ការមកដល់ខែរ៉ម៉ាឌនរបស់បងប្អូនខ្មែរឥស្លាម ។
លោក អែល សៀត អនុប្រធាន សាសនាខ្មែរឥស្លាមខេត្តសៀមរាប បានមានប្រសាសន៍ថា ខែរ៉ាម៉ាឌន គឺជាខែដ៏ពិសិដ្ឋរបស់ឥស្លាម គ្រប់ទិសទីនៅលើសកលលោក ដែលអនុវត្តនៅលើប្រព័ន្ឋលំនាំប្រពៃណីតែមួយ។
លោកបន្តថាបួសរ៉ម៉ាឌន បានតម្រូវលើជនមុស្លិមគ្រប់រូបឲ្យអនុវត្តទាំងចាស់ទាំងក្មេង ប្រុសស្រី សូម្បីកុមារក៏ត្រូវស្ថិតនៅក្នុងការរៀនបួស តាមលទ្ធភាពរបស់ខ្លួនដែរ។ ដើម្បីឲ្យបួស បានពេញលេញ អ្នកបួសត្រូវតមពីការ និយាយស្តីអាក្រក់ និងតមការធ្វើអំពើមិន គប្បី តាមការធ្វើឲ្យប៉ះពាល់ដល់អារម្មណ៍អ្នកដ៏ទៃ។ បួសគឺជាការដាក់ខ្លួនឲ្យស្មើភាព ដោយចៀសវាងពីភាពរើសអើង ឬច្រណែនឈ្នានីស ចំពោះសមាជិក ក្នុងសហគមន៍ខ្លួន ដើម្បីបង្កើតបាននូវបរិយាកាសសហការគ្នា លើការជំរុញឲ្យប្រព្រឹត្តអំពើល្អ និងទប់ស្កាត់មិនឲ្យធ្វើអំពើអាក្រក់។ ហើយចំពោះការបួសមិនមែនតែការតមអាហារប៉ុណ្ណោះឡើយ តែត្រូវតមទាំងអស់នូវរាល់ កាយវិការមិនសមរម្យ ដូចជាការបៀតបៀន រំលោភសិទ្ឋិអ្នកដទៃ ការកេងប្រវ័ញ្ញ និង អំពើរអសីលធម៌ផ្សេងៗ ។
លោក អែល សៀត ក៍បានមានប្រសាសន៍បញ្ជាក់បន្ថែម ដោយសារគោលនយោបាយដឹកនាំដ៏ត្រឹមត្រូវរបស់ប្រមុខរាជរដ្ឋាភិបាលកម្ពុជា ទើបសហគមន៍ឥស្លាម មានភាពកក់កក្ដៅនិង រីកចម្រើនជាបន្តបន្ទាប់ តាមគោលនយោបាយឈ្នះឈ្នះ និងភាពជោគជ័យដ៏ត្រចះត្រចង់ របស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាខណៈកម្ពុជាក៏មានបងប្អូនអ្នកកាន់សាសនាឥស្លាមប្រមាណជាង៧០ម៉ឺននាក់ បានកំពុងរស់ក្រោមដំបូលសន្តិភាពតែមួយ របស់ព្រះរាជាណាចក្រកម្ពុជា ដែលមានសាសនាព្រះពុទ្ធជាសាសនារបស់រដ្ឋ មិនតែប៉ុណ្ណោះ បងប្អូនសាសនិកឥស្លាមនៅកម្ពុជា ក៏ទទួលបាន នូវគោលនយោបាយល្អល្អ ដើម្បីបំពេញ នឹងរាល់តម្រូវការចាំបាច់ របស់សហគមន៍ខ្មែរឥស្លាម ជាពិសេសការបើកសិទ្ធទូលំទូលាយ ក្នុងការទទួលយកការប្រតិបត្តិ តាមជំនឿសាសនា ទំនៀមទម្លាប់ប្រពៃណីរបស់ខ្លួន មិនតែប៉ុណ្ណោះ រាជរដ្ឋាភិបាលកម្ពុជា ក៏បានអនុញាតឲ្យជនខ្មែរឥស្លាម អាចទទួលបានការងារ ក្នុងជួររាជរដ្ឋាភិបាល ដូចជារដ្ឋសភាព្រឹទ្ធសភានិងតាមអង្គភាពក្រសួងមន្ទីរនានាផងដែរ។
នៅក្នុងពិធីអបអរសាទស្រហាន់អាហ្គាម៉ា និងទទួលស្វាគមន៍ការមកដល់ខែរ៉ម៉ាឌនក៏មាន ការឡើងសូត្រព្រះគម្ពីរអាល់គូរអាន និងមានសម្តែងចំរៀង(ខស៊ីដាស់ឥស្លាម)ជាក្រុមៗ របស់ប្អូនៗសិស្សានុសិស្ស ដើម្បីទទួលរង្វាន់លើកទឹកចិត្តពីសំណាក់អ្នកគ្រប់គ្រងវិហារនិងសាលារៀនផងដែរ៕
អត្ថបទ និង រូបភាព៖ លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
