អណ្តូងទឹកដែលប្រើប្រាស់ដោយម៉ូទ័រ ចំនួន២កន្លែងដែលជាអំណោយរបស់សាខាកាកបាទក្រហមកម្ពុជាខេត្ត ជួយដល់សហគមន៍ងាយរងគ្រោះ អនុសាខាកាកបាទក្រហមកម្ពុជាស្រុកអង្គរធំ និង បន្ទាយស្រី ខេត្តសៀមរាប ត្រូវបានធ្វើពិធីសម្ពោធកាត់ខ្សែបូរដាក់ឲ្យប្រើប្រាស់ជាផ្លូវការ កាលពីព្រឹកថ្ងៃទី ២៩ ខែ មេសា ឆ្នាំ២០១៩ ក្រោមវត្តមានរបស់លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាតំណាងដ៏ខ្ពស់ខ្ពស់ឯកឧត្តម ទៀ សីហា អភិបាល នៃគណៈ អភិបាលខេត្តសៀមរាប និងជាប្រធានគណៈកម្មា ធិ ការ សាខាកាក បាទក្រហមកម្ពុជាខេត្ត និងសហការី ។
តាមរបាយការណ៍របស់លោក ស៊ុ សំអន នាយក ប្រតិ បត្តិសាខា បានគូសបញ្ជាក់ថា យោងតាមស្ថានភាព នៃ ការរាំងស្ងួតរយៈពេលវែង និងការប្រែប្រួលអា កាសធាតុដ៏គំហុកក្នងឆ្នាំ២០១៩នេះ គណៈកម្មាធិការសាខាកាកបាទក្រហមខេត្ត ដែល មានឯកឧត្តម ទៀ សីហា ជាប្រធាន បានសម្រេចឲ្យពិនិត្យនូវស្ថានភាព ក្នុងការជីក ខួងអណ្តូងទឹកខ្នាតធំ ដោយប្រើប្រាស់ម៉ូទ័រ សម្រាប់ផ្តល់ និងផ្គត់ផ្គទឹកស្អាតជូនដល់ប្រជា ពលរដ្ឋដែលខ្វះខាតទឹកប្រើប្រាស់ទាំងពីរស្រុក នៅ ក្នុង រដូវប្រាំងនេះ ។
មានប្រសាសន៍នាឱកាសនោះ លោកជំទាវ ទាង អេង ទៀសីហា បានធ្វើការសំណេះសំណាល និង ប្រគល់អណ្តូងទឹក ជូនដល់អនុសាខាកាកបាទក្រហមទាំងពីរស្រុក ដើម្បីផ្តល់ជូនបងប្អូនប្រជាពលរដ្ឋ សម្រាប់ប្រើប្រាស់ប្រចាំថ្ងៃ ។ ក្នុងនោះដែរលោក ជំទាវ ក៏បានពាំនាំមកនូវប្រសាសន៍ផ្ដាំផ្ញើសួរសុខទុក្ខ ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចឯកឧត្តមប្រធានគណៈ កម្មាធិការសាខាកាកបាទក្រហមខេត្ត ដែលតែងតែ យកចិត្តទុកដាក់ ចំពោះប្រជាពលរដ្ឋគ្រប់រូប មិនប្រ កាន់វណ្ណៈ ពណ៌សម្បុរ ជំនឿសាសនា ឬនិន្នាការ នយោបាយណាមួយឡើយ ។ លោកជំទាវក៏បានលើកឡើងថា បញ្ហាសុខភាព គឺ ជាកត្តាចម្បង របស់មនុស្សយើងគ្រប់រូប ដូច្នេះទឹកស្អាត ក៏ជាបញ្ហាចាំ បាច់សម្រាប់មនុស្សជាតិយើងគ្រប់ៗរូប ក្នុងការ រស់ នៅប្រចាំថ្ងៃ ដើម្បីបរិភោគ និងប្រើប្រាស់ជាអចិ ន្ត្រៃយ៍ ។
លោកជំទាវ បានបញ្ជាក់ទៀតថា អណ្តូង ទឹកដែលផ្តល់ជូនដល់សហគមន៍ ទាំងពីរស្រុកនាពេល នេះ គឺបានជួយសម្រួលដល់ការលំបាក នៃការខ្វះខាតទឹកប្រើប្រាស់របស់ប្រជាពលរដ្ឋ ក្នុងស្ថានភាពអា កាសធាតុក្តៅខ្លាំងធ្វើឲ្យបងប្អូនងាយស្រួលមកមានទឹកប្រើប្រាស់ជាធម្មតាវិញ ។ លោកជំទាវក៏បានធ្វើ ការលើកទឹកចិត្តដល់បងប្អូនត្រូវចេះដាំដំណាំរួមផ្សំនៅជិតៗផ្ទះ ដើម្បីជួយសម្រួលដល់ជីវភាពរស់នៅ ប្រចាំថ្ងៃរបស់បងប្អូន ហើយក៏មិនចាំបាច់បារម្មណ៍ពីការខ្វះខាតទឹកសម្រាប់ប្រើប្រាស់ដែរ ម្យ៉ាងទៀតត្រូវពិសាទឹកស្អាត ឬទឹកដាំពុះ ។
ក្នុងនោះលោកជំទាវក៏បានធ្វើការអំពាវនាវដល់ អាជ្ញាធរមូលដ្ឋាន កង កម្លាំងប្រដាប់អាវុធ សិស្សានុសិស្ស យុវជនកាកបាទ ក្រហម និង ប្រជាពលរដ្ឋស្រុកទាំងពីរ គឺត្រូវចូលរួមក្នុងចលនានៃយុទ្ធនាការ ដាំដុះកូនឈើឡើងវិញ ដើម្បីទប់ស្កាត់នូវការបម្រែបម្រួលអាកាសធាតុ និង គ្រោះធម្មជាតិ កុំឲ្យកើតមានឡើងនៅក្នុងមូលដ្ឋានរបស់ខ្លួន ព្រមទាំងបញ្ឈប់ នូវការកាប់ទន្ទ្រានព្រៃឈើ យកដីធ្វើកម្មសិទ្ធិ ។ បញ្ហាការបាត់បង់ធនធានធម្មជាតិទាំងនេះហើយ ដែលធ្វើឲ្យយើងជួបនូវគ្រោះធម្មជាតិ ព្រមទាំងធ្វើឲ្យបាត់បង់ នូវទ្រព្យសម្បត្តិ និង អាយុជីវិតទៀតផងដែរ ៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សុខុន
