សមត្ថកិច្ចនគរបាលខេត្តសៀមរាប បានឲ្យដឹងថា ជនសង្ស័យចំនួន០៦នាក់ ក្នុងនោះមានស្រី០១នាក់ ដែលជាប់សង្ស័យនឹងករណីគ្រឿងញៀន រួមទាំងវត្ថុតាង រួមមាន ៖ ម្សៅមេតំហ្វេតាមីនប្រភេទទឹកកក ចំនួន១១កញ្ចប់ ស្មើនឹងទម្ងន់៨,៥ក្រាម(ទាំងសំបក) និងទូរស័ព្ទដៃចំនួន០៤គ្រឿង ត្រូវបានកម្លាំងនគរបាលជំនាញគ្រឿងញៀន បានកសាងសុំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី២៩ ខែមេសា ឆ្នាំ២០១៩នេះ ដើម្បីចាត់ការតាមនីតិវិធីបន្ត បន្ទាប់ពីកម្លាំងការិយាល័យប្រឆាំងគ្រឿងញៀន សហការជាមួយកម្លាំងប្រជាការពារភូមិ និងកម្លាំងប៉ុស្តិ៍នគរបាលរដ្ឋបាលសង្កាត់ជ្រាវ នៃអធិការដ្ឋាននគរបាលក្រុងសៀមរាប បានបើកប្រតិបត្តិការចុះបង្ក្រាបករណីរក្សាទុក ជួញដូរ និង ចាត់ចែងឲ្យប្រើប្រាស់ដោយខុសច្បាប់នូវសារធាតុញៀន នៅលំនៅដ្ឋានមួយស្ថិតនៅភូមិខ្នារ សង្កាត់ជ្រាវ និង នៅចំនុចភូមិវត្តបូព៌ សង្កាត់សាលាកំរើក ក្រុងសៀមរាប កាលពីវេលាម៉ោង១៤ និង៣០នាទី នាថ្ងៃទី២៧ ខែមេសា ឆ្នាំ២០១៩កន្លងទៅថ្មីៗនេះ ។
គួររំលឹកផងដែរថា កាលពីថ្ងៃទី ២៥ ខែមេសា ឆ្នាំ២០១៩ វេលាម៉ោង១៦ និង ៣០នាទី រហូតដល់ ថ្ងៃទី២៦ ខែមេសាឆ្នាំ ២០១៩ វេលាម៉ោង០៩ និង ៣០ នាទី កម្លាំងការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុងសៀមរាប បានចុះបង្ក្រាបករណី រក្សាទុក ជួញដូរ និង ចាត់ចែងឲ្យប្រើប្រាស់ដោយខុសច្បាប់នូវសារធាតុ ញៀន នៅលំនៅដ្ឋានភូមិបន្ទាយចាស់ សង្កាត់ស្លក្រាម និង នៅលំនៅដ្ឋានស្ថិតនៅភូមិវត្តស្វាយ សង្កាត់សាលាកំរើក ក្រុង ដោយឃាត់ខ្លួនជនសង្ស័យចំនួន០៣នាក់ និង ដកហូតវត្ថុតាងបានរួមមាន៖ ម្សៅមេតំហ្វេតាមីនប្រភេទទឹកកកចំនួន ១៨កញ្ចប់ ស្មើនឹងទម្ងន់១២,២ក្រាម(ទាំងសំបក) , ឧបករណ៍ប្រើប្រាស់ និង សម្ភារវេចខ្ចប់គ្រឿងញៀនមួយចំនួន និង ទូរស័ព្ទដៃ ០៣គ្រឿង ហើយកម្លាំងជំនាញបានរៀបចំកសាងសំណុំរឿងបញ្ចូនទៅចាត់ការបន្តតាមផ្លូវច្បាប់ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត