លទ្ធផលបិទការប្រឡងសិស្សពូកែទូទាំងប្រទេសលើកទី ២៦នេះ ចំណាត់ថ្នាក់លេខមួយផ្នែកគណិត ថ្នាក់ទី១២ បានទៅខេត្តកំពង់ចាម និងចំណាត់ថ្នាក់លេខមួយផ្នែកគណិត ថ្នាក់ទី៩ បានទៅរាជធានីភ្នំពេញ ដោយឡែក ផ្នែករូបវិទ្យាថ្នាក់ទី១២ និងទី៩ ចំណាត់ថ្នាក់លេខមួយ បានទៅខេត្តព្រៃវែងទាំង២កម្រិត រីឯ ផ្នែកអក្សរសិល្ប៍ខ្មែរថ្នាក់ទី១២ និងទី៩ ក៏បានទៅខេត្តកណ្ដាលទាំង២កម្រិតផងដែរ។
នារសៀលថ្ងៃអាទិត្យ ថ្ងៃទី២៨ ខែមេសា ឆ្នាំ ២០១៩នេះ ខេត្តសៀមរាប បានប្រារព្ធពិធីបិទការប្រឡងជ្រើសរើសសិស្សពូកែទូទាំងប្រទេសលើកទី ២៦ និងចែករង្វាន់ដល់សិស្សជ័យលាភី ក្រោមអធិបតីភាពដ៏ខ្អង់ខ្ពស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអបរំ យុវជន និងកីឡា លោក ពៅ ពិសិដ្ឋ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ។
នេះជាការប្រឡងជ្រើសរើស សិស្សពូកែ ក្នុងឆ្នាំសិក្សា ២០១៨-២០១៩ សម្រាប់ សិស្សពូកែផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ក្នុងកម្រិតថ្នាក់ទី ៩ និងថ្នាក់ទី ១២ ទូទាំងប្រទេស ។ ការ ប្រឡងនេះ មានរយៈពេល ៣ថ្ងៃ គឺចាប់ពីថ្ងៃទី ២២ ដល់២៤ ខែមេសា ឆ្នាំ ២០១៩ ដែលមានបេក្ខជន ប្រឡងសរុបចំនួន ៤៨០នាក់ ស្រី ២៤៦ នាក់ ក្នុងនោះបេក្ខជនថ្នាក់ទី ៩ មានចំនួន ២៤០ នាក់ ស្រី ១៣៩ នាក់ បេក្ខជនថ្នាក់ទី ១២ មានចំនួន ២៤០ នាក់ ស្រី ១០៧ ។ ជាលទ្ធផលនៃការប្រឡងសិស្សពូកែទូទាំងប្រទេសលើកទី ២៦ សម្រាប់ឆ្នាំ ២០១៩នេះរួមមាន៖
សម្រាប់ថ្នាក់ទី៩
-ផ្នែកអក្សរសិល្ប៍ខ្មែរ លេខ ១ ឈ្មោះ រ៉ុន រ៉ូនីតា ភេទស្រី មកពីអនុវិទ្យាល័យព្រះសីហនុរាជ ខេត្តកណ្តាល
-ផ្នែកគណិតវិទ្យា លេខ១ ឈ្មោះ តែ ប៊ុនម៉េង ភេទប្រុស មកវិទ្យាល័យប៊ែលធីអន្តរជាតិទី៥ រាជធានីភ្នំពេញ
-ផ្នែករូបវិទ្យា លេខ១ ឈ្មោះ មន់ សីម៉ា ភេទប្រុស មកពីវិទ្យាល័យមេសាង ខេត្តព្រៃវែង ។
សម្រាប់ថ្នាក់ទី ១២
-ផ្នែកអក្សរសិល្ប៍ខ្មែរ លេខ ១ ឈ្មោះ តែ ហេងលី ភេទ ស្រី មកពីវិទ្យាល័យសុវណ្ណភូមិ ខេត្តកណ្តាល
-ផ្នែក គណិតវិទ្យាលេខ ១ ឈ្មោះ សាន គឹមស័ង ភេទប្រុស មកពីវិទ្យាល័យព្រះសីហនុ ខេត្តកំពង់ចាម
-ផ្នែករូបវិទ្យា លេខ ១ ឈ្មោះ កុច តុលា ភេទស្រី មកពីវិទ្យាល័យមេសាង ខេត្តព្រៃវែង ។
ដើម្បីជាការលើកទឹកចិត្ត សម្រាប់សិស្សពូកែឆ្នាំ ២០១៩នេះ រួមមាន:
– ប្រកាសស្តីពីការទទូលស្គាល់សិស្សពូកែទូទាំងប្រទេសដោយរដ្ឋមន្ត្រីក្រសួងអប់រំ យុវជន និងកីឡា ។
– មេដាយមួយគ្រឿងសម្រាប់បេក្ខជនជ័យលាភីចំណាត់ថ្នាក់លេខ ១ ដល់លេខ ២
– វិញ្ញាបនបត្របញ្ចាក់សិស្សពូកែទូទាំងប្រទេសមួយច្បាប់។
– ប្រាក់រង្វាន់លើទឹកចិត្តមួយចំនួនទៀត
– រង្វាន់កុំព្យូទ័រយួរដៃ មួយគ្រឿង សម្រាប់ជ័យលាភីពីលេខ ១ ដល់លេខ ១០ ទាំង៣ ផ្នែក ។
– វត្ថុអនុស្សាវរីយ៍មួយចំនួនទៀតពីសប្បុរសជន។
សូមជម្រាបជូនថាៈ នេះជាការប្រឡងជ្រើសរើសសិស្សពូកែទូទាំងប្រទេសលើកទី ២៦ និងជាលើកទី ៦ ហើយដែលខេត្តសៀមរាបធ្វើជាម្ចាស់ផ្ទះ ។ ពិធីបិទការប្រឡងនេះរៀបចំនៅមណ្ឌលវិទ្យាល័យ ១០ មករា ១៩៧៩ ខេត្តសៀមរាប ។
អត្ថបទ និង រូបភាព៖ លោក យូ វង្ស
កែសម្រួលអត្ថបទ ៖ លោក លីវ សុខុន និង លោក សេង ផល្លី
