កាលពីរសៀលថ្ងៃទី១១ ខែកញ្ញា ឆ្នាំ២០២៣នេះ លោក លី ប៊ុណ្ណា ប្រធានមន្ទីរអប់រំ យុវជន និងកីឡាខេត្តសៀមរាប រួមជាមួយនឹងមន្ត្រីអ្នកមុខអ្នកការសំខាន់ៗជាច្រើនរូប បានទទួលស្វាគមន៍ចំពោះវត្តមានកីឡាករ កីឡាការិនីសិស្សខេត្តសៀមរាប ដែលបានត្រឡប់មកដល់ខេត្ត បន្ទាប់ពីបានចូលរួមការប្រកួតកីឡាសិស្សមធ្យមសិក្សាថ្នាក់ជាតិ ឆ្នាំ២០២៣ នៅ រាជធានីភ្នំពេញ ដោយនាំមកជាមួយនូវមេដាយសរុបចំនួន ២៨គ្រឿង ក្នុងនោះមាសចំនួន៩គ្រឿង , ប្រាក់ចំនួន ៧គ្រឿង និង សំរឹទ្ធចំនួន១២គ្រឿង ដោយឈរនៅចំណាត់ថ្នាក់លេខ៤ ក្នុងចំណោម២៥រាជធានី ខេត្ត។
លោក ជូន សុវណ្ណឌី ប្រធានការិយាល័យកីឡា នៃមន្ទីរអប់រំ យុវជន និងកីឡាខេត្តសៀមរាប បានបញ្ជាក់ថា ការប្រកួតកីឡាសិស្សមធ្យមសិក្សាថ្នាក់ជាតិនេះ បានដំណើរការចាប់ពីថ្ងៃទី០៣ ដល់ថ្ងៃទី១០ ខែកញ្ញា ឆ្នាំ២០២៣ ក្នុងនោះខេត្តសៀមរាប បានបញ្ជួនប្រតិភូកីឡាករ កីឡាការិនីសិស្សសរុបចំនួន ១៨៥នាក់ ដែលប្រកួតលើប្រភេទកីឡា១០ប្រភេទ ក្នុងចំណោម១២ប្រភេទកីឡាដែលដាក់ឱ្យប្រកួត។
លោកបន្តថា មានប្រភេទកីឡាចំនួន ៧ប្រភេទដែលកីឡាករ កីឡាការិនីសិស្សខេត្តសៀមរាបយើងដណ្តើមបានមេដាយរួមមាន ៖ ១. ប្រភេទកីឡាបាល់ទាត់នារី ទទួលបានមេដាយមាស និង ប្រភេទបាល់ទាត់បុរស ទទួលបានមេដាយប្រាក់ , ២. ប្រភេទបាល់ទះបុរស ទទួលបានមេដាយសំរឹទ្ធ , ៣. ប្រភេបាល់បោះបុរស ទទួលបានមេដាយមាស និង បាល់បោះនារីទទួលបានមេដាយសំរឹទ្ធ , ៤. ប្រភេទអត្តពលិកម្ម ទទួលបានមេដាយមាស៤គ្រឿង មេដាយប្រាក់ ១គ្រឿង និងមេដាយសំរឹទ្ធ ១គ្រឿង , ៥. ប្រភេទកីឡាល្បុក្កតោ ទទួលបានមេដាយមាស ២គ្រឿង មេដាយប្រាក់ ៤គ្រឿង និងមេដាយសំរឹទ្ធ ៣គ្រឿង , ៦. ប្រភេទកីឡាតេក្វាន់ដូ WT ទទួលបានមេដាយសំរឹទ្ធ ៥គ្រឿង និង ៧. ប្រភេកីឡាវាយសី ទទួលបានមេដាយមាស ១គ្រឿង មេដាយប្រាក់ ១គ្រឿង និងមេដាយសំរឹទ្ធ ១គ្រឿង។
មានប្រសាសន៍ក្នុងឱកាសនោះលោក លី ប៊ុណ្ណា ប្រធានមន្ទីរអប់រំ យុវជន និងកីឡាខេត្តសៀមរាប បានសម្ដែងនូវអំណរសាទរ និង កោតសរសើរជាខ្លាំងដល់កីឡាករទាំងអស់ដែលបានខិតខំប្រឹងប្រែងប្រកួត និងដណ្តើមបានមេដាយ មាស ប្រាក់ និងសំរឹទ្ធ រហូតដល់ទៅ ២៨គ្រឿង ដែលសកម្មភាពនេះគឺជាកិត្តិយស និង ជាមោទនភាពដ៏ធំធេងសម្រាប់ខេត្តសៀមរាបទាំងមូល ។
លោក លី ប៊ុណ្ណា ក៏បានក្រើនរំលឹកដល់ក្រុមកីឡាទាំងអស់ ត្រូវបន្តការហ្វឹកហាត់បន្ថែមទៀត រួមទាំងការខិតខំប្រឹងប្រែងរៀនសូត្រ ចៀសវាងនូវអំពើអបាយមុខគ្រប់ប្រភេទ ដែលធ្វើឲ្យប៉ះពាល់ដល់កិត្តិយស និង សេចក្ដីថ្លៃថ្នូរ ទាំងផ្ទាល់ខ្លួន ក្រុមគ្រួសារ និង សង្គមជាតិ ដោយត្រូវធ្វើជាកូនល្អ សិស្សល្អ និង ពលរដ្ឋល្អជារៀងរហូត ៕
អត្ថបទ និងរូបភាព៖ លោក ឈិត សាវី និង លោក អ៊ុន ណារាជ្យ
កែសម្រួលអត្ថបទ ៖ លោក លីវ សាន្ត
