ថ្លែងក្នុងពិធីប្រគល់វិញ្ញាបនប័ត្រជូនដល់សិស្សនុសិស្សចំនួន ១៤៨នាក់ នៅថ្ងៃទី១៧ ខែកញ្ញានេះ នាយកសាលាអន្តរជាតិរ៉ូយ៉ាល់អាមេរិកាំង លោក លី សុវណ្ណ បានប្ដេជ្ញាពង្រឹងការអប់រំបន្ថែមដល់កុមារឲ្យកាន់តែមានប្រសិទ្ធិភាព ទាំងទ្រឹស្ដី និងការអនុវត្តន៍ ស្របទៅតាមគោលនយោបាយថ្មីរបស់រាជរដ្ឋាភិបាលកម្ពុជា ក្នុងការបង្កើតធនធានមនុស្សដែលពោលពេញដោយសមត្ថភាព ដើម្បីប្រគួតប្រជែងទីផ្សាអប់រំ និងការងារអាស៊ាន។
លោកបន្តថា ដើម្បីឲ្យសម្រេចបាននូវចក្ខុវិស័យទាំងនេះ សាលាក៏បានដាក់ចេញនូវ និងកំណត់យកនូវគោលការសំខាន់ៗមួយចំនួនដែលបានដាក់ចេញដោយក្រសួងអប់រំ យុវជន និងកីឡា ធ្វើយ៉ាងណាឲ្យសិស្សក្រោយបញ្ចបើការសិក្សាមានប្រសិទ្ធិភាព អាទិភាពខ្ពស់ និងមានជំនាញចំណេះដឹងគ្រប់គ្រាន់ សម្រាប់ប្រើប្រាស់ជួយខ្លួនឯង គ្រួសារ និងសង្គមជាតិទៀតផង។
គួរឲ្យដឹងថា កាលពីពេលនេះថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានមានប្រសាសន៍ថា នៅក្នុងនីតិកាលថ្មីនេះ រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលចាត់ទុកការអភិវឌ្ឍធនធានមនុស្សជាអាទិភាពទី១។ ដើម្បីធ្វើឱ្យកំណែទម្រង់វិស័យអប់រំកាន់តែមានភាពល្អប្រសើរ សម្តេចធិបតី ហ៊ុន ម៉ាណែត បានកំណត់អាទិភាពស្នូល ៤ចំណុច គឺ៖ ទី១.ការពង្រឹងអភិបាលកិច្ចសាលារៀន, ទី២.ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស, ទី៣.ការលើកកម្ពស់សុខភាពសិក្សា ដោយយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលា និងទី៤.ការជំរុញ និងលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ ស្របតាមពាក្យស្លោកភាពជាដៃគូរដ្ឋ និងសហគមន៍ ដើម្បីការអប់រំ។
ព័ត៌មានជាតិ ថ្មីៗ
ឯកឧត្តមបណ្ឌិតសភាចារ្យ បន្ថែមថា ស្របទៅនឹងវិស័យអាទិភាពទាំង៤នេះ ក្រសួងអប់រំ ក៏បានបន្ថែមនូវចំនុចចំនួន៤ ទៀតរួមមាន៖ ការអប់រំឌីជីថល, ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា, ការកសាងប្រព័ន្ធ និងការអភិវឌ្ឍសមត្ថភាព និងការអភិវឌ្ឍការអប់រំកាយ និងកីឡា៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
