សហរដ្ឋអាមេរិក នឹងបន្តគម្រោងជួសជុលប្រាសាទភ្នំបាក់ខែងក្នុងរយៈពេល ៥ឆ្នាំបន្ថែមទៀត ក្នុងទំហំទឹកប្រាក់ ៤៥ម៉ឺនដុល្លារ ខណៈគម្រោងជួសជុលប្រាសាទភ្នំបាខែង ក្រោមមូលនិធិស្ថានទូតអាមេរិកប្រចាំកម្ពុជាបានចាប់ផ្ដើមតាំងពីឆ្នាំ២០០៩។
តាមបញ្ជាក់របស់ ឯកឧត្តម W.Patrick Murphy ឯកអគ្គរដ្ឋទូតអាមេរិក ប្រចាំកម្ពុជា ក្នុងដំណើរទស្សនកិច្ច សប្តាហ៍មិត្តភាព កម្ពុជា-អាមេរិក ឆ្នាំ២០២៣ នៅថ្ងៃទី២១ ខែកញ្ញានេះ គម្រោងជួសជុលប្រាសាទភ្នំបាខែង នឹងត្រូវចុះហត្ថលេខាជាមួយក្រសួងវប្បធម៌ និងវិចិត្រសិល្បៈ នាមុនដំណាច់ឆ្នាំ២០២៣ ក្រោមការអនុម័តគម្រោងដោយក្រសួងការបរទេសសហរដ្ឋអាមេរិក។ ជាមួយនឹងការពង្រីកកិច្ចសហប្រតិបត្តិការជាមួយកម្ពុជាលើផ្នែកវប្បធម៌នេះ ជាក់ស្ដែងកាលពីចុងខែសីហាកន្លងទៅនេះ កម្ពុជា និងសហរដ្ឋអាមេរិក បានចុះហត្ថលេខាលើអនុស្សារណៈយោគយល់គ្នា លើកិច្ចព្រមព្រៀងផ្នែកវប្បធម៌ រយៈពេល ៥ឆ្នាំបន្តទៀត ទាក់ទងនឹង «ការដាក់កម្រិតហាមប្រាមនូវការនាំចូលប្រភេទវត្ថុបុរាណ និងវត្ថុជាតិពន្ធុវិទ្យានៃប្រទេសកម្ពុជា» និងកាត់បន្ថយការលួចប្លន់នៃវត្ថុបុរាណដ៏ល្អឯកពីប្រទេសកម្ពុជា។
ឯកឧត្តម ឯកអគ្គរដ្ឋទូត បញ្ជាក់បន្ថែមថា ដំណើរទស្សនកិច្ច សប្តាហ៍មិត្តភាព កម្ពុជា-អាមេរិកនេះ ចង់បង្ហាញពីការប្តេជ្ញាចិត្តរបស់រដ្ឋាភិបាលអាមេរិក ក្នុងការប្រាស្រ័យទាក់ទង ក្នុងភាពជាដៃគូជាមួយរាជរដ្ឋាភិបាលកម្ពុជា និងអ្នកពាក់ព័ន្ឋនៅក្នុងវិស័យសុខភាពសាធារណៈ អប់រំ វប្បធម៌ ធុរកិច្ច យុវជន ការដោះមីន និងការពង្រឹងការអនុវត្តច្បាប់ និងសន្តិសុខជាដើម។
គួរជម្រាបថា ប្រាសាទភ្នំបាខែង ដែលស្ថិតលើភ្នំបាក់ខែង បានរងការខូចខាតដោយសារកត្តាអាយុកាល អាកាសធាតុ ដែលធ្វើឱ្យរចនាសម្ព័ន្ធប្រាសាទនេះ ទ្រេត និងផ្នែកខ្លះរលំផងដែរ រួមមាននៅតាមជ្រុងនីមួយៗ បង្កដោយទឹក ហូរច្រោះ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
