ទស្សនកិច្ចមានរយៈពេល ៥ថ្ងៃ របស់ស្ថានទូតសហរដ្ឋអាមេរិក ប្រចាំកម្ពុជា នឹងត្រូវបញ្ចប់នៅថ្ងៃទី២២ ខែកញ្ញានេះ បន្ទាប់ពីបានចេញដំណើរពីរាជធានីភ្នំពេញ មកកាន់ខេត្តបន្ទាយមានជ័យ ខេត្តសៀមរាប និងខេត្តព្រះវិហារ ដើម្បីទៅទស្សនាប្រាសាទកោះកែរ ដែលកម្ពុជាទើបតែបានចុះបញ្ជីជាសម្បត្តិបេតិកភណ្ឌពិភពលោកកាលពីពេលថ្មីកន្លងមកនេះ។
តាមរយៈកម្មវិធីសប្តាហ៍មិត្តភាព កម្ពុជា-អាមេរិក ឆ្នាំ២០២៣នេះ ត្រូវបានឯកឧត្តម W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បង្ហាញថា ជាការការប្តេជ្ញាចិត្តរបស់រដ្ឋាភិបាលអាមេរិក ក្នុងការប្រាស្រ័យទាក់ទងក្នុងភាពជាដៃគូ ជាមួយរាជរដ្ឋាភិបាលកម្ពុជា និងអ្នកពាក់ព័ន្ឋនៅក្នុងវិស័យសុខភាពសាធារណៈ អប់រំ វប្បធម៌ ធុរកិច្ច យុវជន ការដោះមីន និងការពង្រឹងការអនុវត្តច្បាប់ និងសន្តិសុខជាដើម។
ព័ត៌មានជាតិ ថ្មីៗ
នៅក្នុងសន្និសីទសារព័ត៌មាន នៃសកលវិទ្យាល័យឯកជនមួយក្នុងក្រុងសៀមរាប ឯកឧត្តម W.Patrick Murphy បញ្ជាក់ថា ក្នុងភាពជាដៃគូលើវិស័យអប់រំ ជារៀងរាល់ឆ្នាំសហរដ្ឋអាមេរិក បានឧបត្ថម្ភគាំទ្រដល់កម្ពុជា នូវថវិកាប្រមាណ ១០លានដុល្លារ សម្រាប់អនុវត្តន៍ទៅលើ កម្រិតបឋមសិក្សា ការកែលម្អកម្មវិធីសិក្សានៅតាមសាលារៀន និងនៅតាមសាកលវិទ្យាល័យជាដើម ជាពិសេសលើផ្នែកឌីជីថល រួមជាមួយការផ្ដល់អាហារូបកណ៍ដល់សិស្ស ទៅសិក្សានៅសហរដ្ឋអាមេរិក និងបញ្ជូនមន្ត្រីស្ម័គ្រចិត្តអន្តរជាតិ (Peace Corps) ដើម្បីជួយបង្រៀនសិស្សានុសិស្សផងដែរ។ បន្ថែមលើនោះ គម្រោង អភិវឌ្ឍជំនាញការងារឌីជីថល ដែលបានអនុវត្តនៅដើមឆ្នាំ២០២២ រយៈពេល ៥ឆ្នាំ ដែលផ្តល់ដោយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) នឹងជួយដល់គ្រឹះស្ថានឧត្តមសិក្សានៅកម្ពុជា លើផ្នែកព័ត៌មានវិទ្យា និងសារទូរគមនាគមន៍ ក្នុងការពង្រឹងជំនាញឌីជីថលដល់យុវជនកម្ពុជា ព្រមទាំងបង្កើតឱកាសការងារ តាមរយៈការចុះកម្មសិក្សា និងផ្តល់អាទិភាពខ្ពស់លើបរិយាប័ន្ន។
ដោយឡែក ឯកឧត្តម ឯកអគ្គរដ្ឋទូត ក៏បានលើកឡើងឡើងផងដែរ ទៅការពង្រីកកិច្ចសហប្រតិបត្តិការណ៍ជាមួយកម្ពុជាលើផ្នែកវប្បធម៌ តាមរយៈការចុះហត្ថលេខាលើអនុស្សារណៈយោគយល់គ្នា លើកិច្ចព្រមព្រៀងផ្នែកវប្បធម៌ ទាក់ទងនឹង «ការដាក់កម្រិតហាមប្រាមនូវការនាំចូលប្រភេទវត្ថុបុរាណ និងវត្ថុជាតិពន្ធុវិទ្យានៃប្រទេសកម្ពុជា» និងកាត់បន្ថយការលួចប្លន់នៃវត្ថុបុរាណដ៏ល្អឯកពីប្រទេសកម្ពុជា។ ឯកឧត្តម បន្ថែមថា ក្នុងរយៈពេល ២០ឆ្នាំកន្លងមក អនុស្សរណៈនៃការយោគយល់គ្នានេះ បានជួយសម្រួលដល់ការបញ្ជូនត្រឡប់មកកម្ពុជាវិញ នូវវត្ថុបុរាណដ៏មានតម្លៃចំនួនជាង១០០ដុំ និងបានកសាងសមត្ថភាពរបស់ ជនជាតិខ្មែរដែលធ្វើការងារថែរក្សា គាំពារបេតិកភណ្ឌវប្បធម៌។ នៅពេលឆាប់ៗខាងមុខនេះ សហរដ្ឋអាមេរិក ក៏នឹងគ្រោងបញ្ជូនវត្ថុបុរាណខ្មែរចំនួន ៣៣ដុំបន្ថែមទៀត ដែលត្រូវបានជនខិលខូចលួចយកចេញពីប្រាសាទបន្ទាយស្រី ក្រុងអង្គរធំ និងប្រាសាទកោះកេរ ត្រលប់មកកាន់កម្ពុជាវិញ។ ចំពោះ កិច្ចសហប្រតិបត្តិការលើការអភិរក្សវប្បធម៌នៅកម្ពុជា សហរដ្ឋអាមេរិក បានផ្ដល់ជំនួយជាថវិកាជិត ៦លានដុល្លារ ចាប់តាំងពីឆ្នាំ២០០១ ដើម្បីជួសជុលប្រាសាទភ្នំបាខែង និងប្រាសាទព្រះវិហារ ជួយដល់សារមន្ទីរប្រល័យពូជសាសន៍ទួលស្លែង បង្កើតបញ្ជីសារពើភណ្ឌតាមប្រព័ន្ធអនឡាញនៃវត្ថុសិល្បៈនៅសារមន្ទីរតាមខេត្តនានា និងអប់រំផ្សព្វផ្សាយដល់សាធារណជន លើការការពារបេតិកភណ្ឌវប្បធម៌។
អត្ថបទ និងរូបភាព៖ លោក យូ វង្ស និងលោក ជាស្រស់
កែសម្រួល៖ លោក សេង ផល្លី
