ទោះបីអាកាសធាតុមិនសូវអំណោយផល ប៉ុន្តែអ្នកទេសចរជាតិ អន្តរជាតិ និងប្រជាពលរដ្ឋក្នុងខេត្តសៀមរាប នៅតែទន្ទឹងរង់ចាំមើលព្រឹត្តិការណ៍ សមរាត្រី ឬថ្ងៃរះចំកំពូលកណ្តាលប្រាសាទអង្គរវត្ត យ៉ាងច្រើនកុះករ នៅព្រឹកព្រលឹមស្រាងៗថ្ងៃទី២២ ខែកញ្ញា ឆ្នាំ២០២៣នេះ។
តាមការឱ្យដឹងពីមន្ត្រីនៃមន្ទីរទេសចរណ៍ខេត្តសៀមរាប រយៈពេល ២ថ្ងៃ គឺនៅព្រលឹមថ្ងៃទី២១ និង ទី២២ ខែកញ្ញានេះ ចំនួនអ្នកមកទស្សនាសមរាត្រី នៅប្រាសាទអង្គរវវត្ត នារដូវវស្សា នៅតែមានចំនួនច្រើនកុះករដូចគ្នា មន្ត្រីរូបនោះ ពុំបានបញ្ជាក់ចំនួនអ្នកទៅទស្សនាជាក់លាក់នោះឡើយ។
លោក អ៊ឹម សុខរិទ្ធី បុរាណវិទូ និងជាប្រធាននាយកដ្ឋានស្រាវជ្រាវ បណ្ដុះបណ្ដាល ផ្សព្វផ្សាយនៃអាជ្ញាធរជាតិអប្សរា បានឱ្យដឹងថា ជារៀងរាល់ឆ្នាំ ព្រឹត្តិការណ៍សមរាត្រី (Equinox) តែងតែកើតមាន២ដង គឺនៅរដូវប្រាំង (Vernal Equinox) កើតទ្បើងនៅខែមីនា និងសមរាត្រីរដូវវស្សា (Autumnal Equinox) កើតទ្បើងនៅខែកញ្ញា។ ចំពោះឆ្នាំនេះ សមរាត្រីរដូវស្សា កើតឡើងចំថ្ងៃទី២២ ខែកញ្ញា ដែលជាវេលាដែលថ្ងៃនិងយប់មានរយៈពេលស្មើគ្នា គិតតាមពេលវេលានៅប្រទេសកម្ពុជា។ ក្រៅពីនេះ ខែខ្លះថ្ងៃមានរយៈពេលវែងជាងយប់ ហើយខ្លះទៀត យប់មានរយៈពេលវែងជាងថ្ងៃវិញ។
លោក អ៊ឹម សុខរិទ្ធី បន្តថា ករណីពិសេសនៅអង្គរវត្ត ជារឿងអច្ឆិរយៈ ដែលបុព្វបុរសយើង បានស្ថាបនាទ្បើងដោយមានការសិក្សាគន់គូរយ៉ាងល្អិតល្អន់ រួមផ្សំគ្នារវាងទ្រឹស្តីគណិតសាស្រ្ត វិស្វកម្ម និងតារាសាស្រ្ត។ ទាំងនេះជាហេតុផលវិទ្យាសាស្រ្តមួយ ដែលឆ្លើយទៅនឹងសំណួរ ដែលសួរមិនចេះចប់ថា ហេតុដូចម្តេចបានជាអង្គរវត្តបែរមុខទៅទិសខាងលិច។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
