ជារៀងរាល់ឆ្នាំនៅថ្ងៃទី២៧ ខែកញ្ញា នៅទូទាំងពិភពលោក ក្នុងនោះប្រទេសកម្ពុជា នឹងរៀបចំពិធីអបអរសាទរ ទិវាទេសចរណ៍ពិភពលោក ឆ្នាំ២០២៣ ក្រោមប្រធានបទ «ទេសចរណ៍ និងការវិនិយោគបៃតង»។ ក្នុងកិច្ចប្រជុំពិភាក្សា នៅសាលាខេត្តសៀមរាប នាថ្ងៃទី២១ ខែកញ្ញានេះ រដ្ឋបាលខេត្តសៀមរាប នឹងសហការជាមួយភាគីពាក់ព័ន្ធនានា ជាពិសេសប្រតិបត្តកទេសចរណ៍ ដើម្បីធ្វើការផ្សព្វផ្សាយពីតំបន់ទេសចរណ៍ដ៏ទាក់ទាញរបស់កម្ពុជា ក្នុងព្រឹត្តិការណ៍នេះ។
ដឹកនាំក្នុងកិច្ចប្រជុំនោះ លោក យុន លីនណេ អភិបាលរងខេត្តសៀមរាប លើកឡើងថា ការប្រារព្ធព្រឹត្តការណ៍នេះ ជាចំណុចចាប់ផ្ដើម ក្នុងការបន្សល់ទុកនូវអនុស្សាវរីយ៍ថ្មីមួយ ទៅដល់ភ្ញៀវជាតិ អន្តរជាតិ ក៏ដូចជាប្រជាពលរដ្ឋក្នុងខេត្ត តាមរយៈការចូលរួមដើរក្បួនដង្ហែរតាមដងផ្លូវនៃស្ទឹងសៀមរាប និងផ្លូវស៊ីវុត្ថា ជាមួយនោះម្ចាស់អាជីវកម្ម នឹងអាចមានឱកាសផ្សព្វផ្សាយ និងចែកជូននូវកញ្ចប់សេវាកម្មរបស់ខ្លួនសំរាប់អ្នកចូលរួម ជាពិសេសភ្ញៀវអន្តរជាតិ ដែលមកលេងកំសាន្ដ នៅអំឡងពេលនេះ។
លោក អភិបាលរងខេត្ត បញ្ជាក់ថា ជាមួយនឹងការអបអរសាទរ ទិវាទេសចរណ៍ពិភពលោក ឆ្នាំ២០២៣ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្ដោតសំខាន់ទៅលើខ្លឹមសារសំខាន់ៗ ៣រួមមាន ការវិនិយោគទៅលើមនុស្ស គឺផ្ដល់អាទិភាពលើការអប់រំ និងជំនាញបន្ថែម ការវិនិយោគលើភពផែនដី គឺគាំទ្រការផ្លាស់ប្ដូរបៃតងរបស់ទេសចរណ៍ និងការវិនិយោគលើវិបុលភាព គឺជំរុញការច្នៃប្រឌិត និងសហគ្រិនភាព។
ព័ត៌មានជាតិ ថ្មីៗ
គួររំលឹកថា នៅឆ្នាំ២០២២ តាមការចេញផ្សាយរបស់អង្គការទេសចរណ៍ពិភពលោក មុនផ្ទុះវិបត្តិជំងឺកូវីដ១៩ ពោលគឺនៅឆ្នាំ២០១៩ ទេសចរប្រមាណជា ១ ៥០០លាននាក់ បានចេញដើរលេង រួមមានទេសចរណ៍ក្នុងស្រុក និង នៅបរទេស។ ចំណែកប្រាក់ចំណូល ដែលបានមកពីវិស័យមួយនេះមានប្រមាណជា ១លាន ៥សែន លានដុល្លារអាមេរិក (១ ៥០០ ០០០លាន)។ ប៉ុន្តែ នៅពេលពិភពលោកបានផ្តើមធ្លាក់ចូលក្នុងវិបត្តិកូវីដ១៩ នាចុងឆ្នាំ ២០១៩ វិស័យមួយនេះបានធ្លាក់ចុះយ៉ាងគំហុក និងមិនមានសូម្បីទេសចរផ្ទៃក្នុង។
អត្ថបទ និងរូបភាព៖ លោក ធន់ ពូថេ
កែសម្រួល៖ លោក សេង ផល្លី
