នៅថ្ងៃទី២១ ខែកញ្ញា ឆ្នាំ២០២៣នេះ ឯកឧត្តម W.Patrick Murphy ឯកអគ្គរដ្ឋទូតអាមេរិក ប្រចាំកម្ពុជា លើកឡើងថាការចុះបញ្ជីរមណីយដ្ឋានប្រាសាទកោះកេរ ជាសម្បត្តិបេតិកភណ្ឌពិភពលោកកាលពីថ្មីៗនេះ គឺ មានសារៈសំខាន់ណាស់សម្រាប់ប្រទេសកម្ពុជា និងសម្រាប់ពិភពលោក។
តាមរយៈកម្មវិធី សប្តាហ៍មិត្តភាព កម្ពុជា-អាមេរិក ឆ្នាំ២០២៣ ដែលរយៈពេល៥ថ្ងៃ ក្នុងខេត្តសៀមរាប ចាប់ពីថ្ងៃទី១៨ដល់ថ្ងៃទី២២ ខែកញ្ញា គណៈប្រតិភូ នៃស្ថានទូតអាមេរិកប្រចាំនៅកម្ពុជា ប្រមាណ៦០នាក់ បានធ្វើដំណើរទៅកាន់ខេត្តបន្ទាយមានជ័យ ខេត្តសៀមរាប និងទស្សនាប្រាសាទកោះកែរ ស្ថិតក្នុងខេត្តព្រះវិហារផងដែរ។
ឯកឧត្តម W.Patrick Murphy បញ្ជាក់ថា ក្នុងរយៈពេល ២០ឆ្នាំកន្លងមក អាមេរិក បានចូលរួមជាមួយកម្ពុជាក្នុងការផ្លាស់ប្តូរគា្ននូវវត្ថុបុរាណ និងវត្ថុជាតិពន្ធុវិទ្យា សម្រាប់ផ្នែកវប្បធម៌ អប់រំ និងវិទ្យាសាស្ត្រ តាមរយៈការចុះអនុស្សរណៈនៃការយោគយល់គ្នា លើកិច្ចព្រមព្រៀងផ្នែកវប្បធម៌ ដែលជាការផ្តល់តម្លៃ ដល់បេតិកភណ្ឌវប្បធម៌ ដ៏សម្បូរបែបរបស់កម្ពុជា។ ឯកឧត្តម បន្ថែមថា គិតមកដល់បច្ចុប្បន្ន អាមេរិកបានសម្របសម្រួល ដល់ការបញ្ជូនវត្ថុបុរាណដ៏មានតម្លៃ ត្រឡប់មកកម្ពុជាវិញ ចំនួនជាង១០០ដុំ និងបានបណ្ដុះបណ្ដាលជនជាតិខ្មែរ លើការងារថែរក្សា គាំពារបេតិកភណ្ឌវប្បធម៌ជាច្រើននាក់។ ទន្ទឹមនោះនៅពេលឆាប់ៗខាងមុខ អាមេរិក ក៏នឹងបញ្ជូនវត្ថុបុរាណចំនួន ៣៣ដុំបន្ថែមទៀត ដែលខ្លះត្រូវបានជនខិលខូចលួចពីប្រាសាទបន្ទាយស្រី ក្រុងអង្គរធំ និងខ្លះមកពីប្រាសាទកោះកេរ ត្រលប់មកកាន់កម្ពុជាវិញ។
គួររំលឹកថា គិតចាប់ពីឆ្នាំ ២០០១ សហរដ្ឋអាមេរិក បានផ្ដល់ជំនួយជាថវិកាជិត ៦លានដុល្លារ សម្រាប់ជួយដល់ការអភិរក្ស វប្បធម៌នៅកម្ពុជា ដែលរួមមានជំនួយជាថវិកា សម្រាប់ជួសជុលប្រាសាទភ្នំបាខែង និងប្រាសាទព្រះវិហារ ជួយដល់សារមន្ទីរប្រល័យពូជសាសន៍ទួលស្លែង ការបង្កើតបញ្ជីសារពើភណ្ឌតាមប្រព័ន្ធអនឡាញនៃវត្ថុសិល្បៈនៅសារមន្ទីរតាមខេត្តនានា និងការអប់រំផ្សព្វផ្សាយដល់សាធារណជនលើការការពារបេតិកភណ្ឌវប្បធម៌។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
