នៅរសៀលថ្ងៃទី៤ ខែតុលា ឆ្នាំ២០២៣ ក្រុមការងារគណៈកម្មាធិការគ្រប់គ្រងគ្រោះមហន្តរាយខេត្តសៀមរាប លោក អ៊ឹង គឹមលាង អភិបាលរងខេត្ត និងជាអនុប្រធានគណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានដឹកនាំក្រុមការងារជំនាញ និងអ្នកពាក់ព័ន្ធ ចុះពិនិត្យ វាយតម្លៃ និងត្រៀមវិធានការផ្សេងៗ ដើម្បីឆ្លើយតប ចំពោះផលប៉ះពាល់ដោយសារជំនន់ទឹកភ្លៀង ស្ថិតនៅក្នុងស្រុកជីក្រែង បន្ទាប់ពីខេត្តសៀមរាបទទួលរងនូវឥទ្ធិពលសម្ពាធទាប និងមានភ្លៀងធ្លាក់ជាបន្តបន្ទាប់ ក្នុងរយៈពេលមួយសប្តាហ៍កន្លងមក។
តាមរបាយការណ៍របស់លេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្ត គិតចាប់ពីថ្ងៃទី២ ដល់ ថ្ងៃទី៤ខែតុលា ឆ្នាំ២០២៣នេះ ជំនន់ទឹកភ្លៀងបានប៉ះពាល់ ភូមិចំនួន១៩២ ក្នុងស្រុក ក្រុងចំនួន ១០ នៃស្រុក ក្រុងទាំង១២ លើកលែងតែស្រុកក្រឡាញ់ និងស្រុកស្រីស្នំ។ ក្នុងនោះ ប៉ះពាល់ផ្ទៃដីដាំដុះដំណាំស្រូវជិត ៨ ០០០ហិកតា និងប៉ះពាល់ភូមិឋានប្រជាពលរដ្ឋជាង ៦ ០០០គ្រួសារ ព្រមទាំងហេដ្ឋារចនាសម្ព័ន្ធផ្លូវថ្នល ប្រឡាយទឹក មន្ទីរពេទ្យ សាលារៀន និងទីតាំងសាធារណៈជាច្រើនទៀត។
លោកអ៊ឹង គឹមលាង គូសបញ្ជាក់ថា មកដល់ពេលនេះពុំទាន់មានការគំរាមគំហែងធ្ងន់ធ្ងរណាមួយ បង្កឡើងដោយជំនន់ទឹកភ្លៀង និងបង្កប៉ះពាល់ដល់អាយុជីវិតប្រជាពលរដ្ឋឡើយ។
ព័ត៌មានជាតិ ថ្មីៗ
សូមជម្រាប ក្រុមការងារគណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានត្រៀមបម្រុង សម្រាប់ឆ្លើយតបទៅនឹងគ្រោះមហន្តរាយ រួមមាន៖ ពូជស្រូវចំនួន២៧០០គ.ក្រ ពូជ បន្លែ១០០កញ្ចប់ ថ្នាំសម្លាប់សត្វល្អិត១៥០ដប ថ្នាំសម្លាប់សត្វកណ្តុរ ៥៤គ.ក្រ និងបន្តត្រៀមលក្ខណៈ ដើម្បីតាមដាន និងត្រៀមបម្រុងសម្រាប់ជួយសង្គ្រោះ ក្នុងករណីមានគ្រោះមហន្តរាយ ឬឧបទ្ទវហេតុផ្សេងៗ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
