នៅថ្ងៃទី៩ ខែតុលា ឆ្នាំ២០២៣ ឯកឧត្តម ឯក វណ្ណឌី រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ និងលោកស្រី យូ សុភា អភិបាលរងខេត្តសៀមរាប បានអញ្ជើញជាអធិបតីក្នុងពិធីអបអរទិវាប្រៃសណីយ៍ពិភពលោកឆ្នាំ២០២៣ ក្រោមប្រធានបទ ”រួមគ្នាដើម្បីការជឿទុកចិត្ត“ ដើម្បីបង្ហាញពីសារៈសំខាន់ និងការប្តេជ្ញាចិត្តទាំងអស់គ្នា ទាំងអ្នកតាក់តែងគោលនយោបាយបទប្បញ្ញត្តិ អ្នកផ្តល់សេវា និងអ្នកប្រើប្រាស់សេវាប្រៃសណីយ៍ ក្នុងការកសាងទំនុកចិត្ត និងទំនាក់ទំនងគ្នាយ៉ាងរឹងមាំ សម្រាប់ការអភិវឌ្ឍវិស័យប្រៃសណីយ៍។
ឯកឧត្តម ឯក វណ្ណឌី លើកឡើងថា ការរៀបចំទិវាប្រៃសណីយ៍ ពិភពលោកថ្ងៃនេះ ក៏ជាការរំលឹកខួបទី១៤៩ នៃថ្ងៃបង្កើតសហភាពប្រៃសណីយ៍សកល ហៅកាត់ថា UPU នាថ្ងៃទី៩ ខែតុលា ឆ្នាំ១៨៧៤ នៅទីក្រុងប៊ន ប្រទេសស្វីស ដែលបានឆ្លុះបញ្ចាំងពីតួនាទីដ៏សំខាន់របស់សេវាប្រៃសណីយ៍ ក្នុងការចូលរួមបម្រើប្រជាជន សេដ្ឋកិច្ចសង្គម នៅទូទាំងពិភពលោក ព្រមជាមួយការដាក់ចេញនូវប្រធានបទសំខាន់ៗ ផ្សេងៗគ្នាជារៀងរាល់ឆ្នាំ។ ប្រធានបទ «រួមគ្នាដើម្បីការជឿទុកចិត្ត» នៅឆ្នាំនេះ នឹងជំរុញដល់ប្រទេសជាសមាជិកទាំង១៩២ របស់ UPU រួមគ្នាពង្រឹងកិច្ចសហប្រតិបត្តិការជាបណ្តាញប្រៃសណីយ៍ពិភពលោកតែមួយ ដើម្បីបង្កើនភាពជឿទុកចិត្តជូនអតិថិជន។
ឯកឧត្តម រដ្ឋលេខាធិការ បញ្ជាក់ថា ដើម្បីឆ្លើយតបទៅនឹងការធ្វើទំនើបកម្ម និងប្រើប្រាស់បច្ចេកវិទ្យាឌីជីថលនេះ វិស័ប្រៃសណីយ៍ត្រូវចូលរួម អនុវត្តន៍ឱ្យបានពេញលេញនូវអនុសាសន៍គន្លឹះរបស់ ឯកឧត្តមរដ្ឋមន្ត្រី ក្រសួងប្រៃសណីយ៍ និងទូរគមនាគមន៍ ចំនួន៣ គឺ ទី១៖ រដ្ឋាភិបាលឌីជីថល ទី២៖ សេដ្ឋកិច្ច និងធុរកិច្ចឌីជីថល និងទី៣៖ ប្រជាជនឌីជីថល ដើម្បីរួមចំណែកទ្រទ្រង់ការអភិវឌ្ឍពាណិជ្ជកម្មតាមប្រព័ន្ធអេឡិចត្រូនិច និងគាំទ្រដល់ពិពិធកម្មសេដ្ឋកិច្ចកម្ពុជា។
នៅក្នុងពិធីអបអរសាទរទិវាប្រៃសណីយ៍ពិភពលោកឆ្នាំ២០២៣នេះដែរ ក៏មានការដង្ហែរក្បួន របស់ប្រតិបត្តិករប្រៃសណីយ៍ ពីមន្ទីរប្រៃសណីយ៍ និងទូរគមនាគមន៍ខេត្តសៀមរាប ទៅកាន់តំបន់ប្រាសាទមួយចំនួន ក្នុងតំបន់រមណីយដ្ឋានអង្គរ ត្រឡប់មកកាន់បរិវេណប្រៃសណីយ៍កម្ពុជា។ ដោយឡែក នៅពេលរសៀល នឹងការជិះកង់រួមគ្នា ដោយមានការចូលរួមពីថ្នាក់ដឹកនាំ មន្ត្រីរាជការ ប្រតិបត្តិករប្រៃសណីយ៍ ទៅកាន់តំបន់អង្គរផងដែរ ៕
អត្ថបទ និងរូបភាព: លោក ទ្រា ពន្លឺ
កែសម្រួល: លោក សេង ផល្លី
