លោក ណុប សារ៉ាក់ អធិការនគរបាលក្រុងសៀមរាប បានឲ្យដឹងថា កាលពីវេលាម៉ោង១៦និង៣០នាទី ថ្ងៃទី៣០ ខែមេសា ឆ្នាំ២០១៩នេះ មានករណីអគ្គិភ័យឆេះផ្ទះប្រជា ពលរដ្ឋមួយខ្នង ធ្វើអំពីថ្មនៅខាងក្រោម ឈើលើ ប្រក់ក្បឿង ទំហំ១២ម៉ែត្រគុណនឹង១៦ម៉ែត្រ កម្ពស់៧ម៉ែត្រ ជារបស់ឈ្មោះ ស ឈយ ភេទប្រុស អាយុ ៣៥ឆ្នាំ មុខរបរបុគ្គលិកអង្គការជប៉ុន ត្រូវជាប្ដី និងប្រពន្ធឈ្មោះ ស៊ា ផល្លា អាយុ២៩ឆ្នាំ មុខរបរនៅផ្ទះ មានកូនចំនួន៣នាក់ក្នុងបន្ទុក ក្នុងនោះស្រីចំនួន១នាក់ នៅភូមិវាល សង្កាត់គោកចក ក្រុងសៀមរាប ខេត្តសៀមរាប ដែលមូលហេតុនេះ បណ្តាលមកពីទុស្សេខ្សែភ្លើង ខណៈម្ចាស់ផ្ទះមិនបាននៅ ដោយប្ដីទៅធ្វើការ ចំណែកប្រពន្ធ បានយកម្តាយនិងកូនទៅមើលជំងឺនៅឯប្រទេសថៃ ដោយទុកឱ្យម្តាយធំ និងក្មួយជួយនៅមើលផ្ទះជំនួស ។
បើតាមសាក្សីពីបងប្អូនជីដូនមួយដែលរស់នៅក្នុងដីឡូតិ៍ជាមួយគ្នា បានឲ្យដឹងថា មុនពេលកើតហេតុពួកគាត់កំពុងអង្គុយលេងជាមួយក្រុមគ្រួសារ នៅខាងមុខផ្ទះល្វែង ពីមុខផ្លូវចូលផ្ទះឆេះរបស់ប្អូន ដែលខណៈពេលនោះ ត្រូវបានម្តាយធំ និង ក្មួយ ចុះរត់មកប្រាប់ថា ឃើញភ្លើងឆេះចេញពីកន្លែងកុងម៉ាឱ្យពួកគាត់ជួយផង ហើយបន្ទាប់មកភ្លាម ពួកគាត់ក៏ទូរស័ព្ទទៅប្រាប់សមត្ថកិច្ចប៉ុស្តិ៍នគរបាលរដ្ឋបាលសង្កាត់គោកចក ដើម្បីឱ្យជួយហៅរថយន្តពន្លត់អគ្គិភ័យមកជួយផ្ទះប្អូនគាត់ផង ព្រោះវាកំពុងតែឆេះ ហើយមួយសន្ទុះក្រោយមក ក៏ឃើញមានរថយន្តជាច្រើនគ្រឿងមកជួយ ដូចចិត្តប្រាថ្នា ប៉ុន្តែអកុសលត្រូវភ្លើងឆេះចង់អស់ទៅហើយ ព្រោះផ្លូវវាបត់បែនច្រើនពេក ។
លោក ណុប សារ៉ាក់ បានឲ្យដឹងទៀតថា ករណីអគ្គិភ័យនេះ ក្រៅពីផ្ទះដែលឆេះអស់ បណ្តាលឲ្យខូចខាតអស់ទ្រព្យសម្បត្តិ និង សម្ភារ រួមមាន : សៀវភៅស្នាក់នៅ , សំបុត្រកំណើត , កាតគ្រីឡាន ម៉ូតូ និងសម្ភារក្នុងផ្ទះទាំងស្រុង សរុបជាទឹកប្រាក់ប្រមាណជាង៥ម៉ឺនដុល្លារអាមេរិក នេះបើតាមសម្ដីរបស់លោក ស ឈយ ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ត
