នៅរសៀលថ្ងៃទី១៦ ខែតុលា ឆ្នាំ២០២៣ លោកជំទាវ ទូច សារ៉ុម រដ្ឋលេខាធិការក្រសួងធម្មការ និងសាសនា ព្រមទាំងក្រុមប្រតិភូអមដំណើរ ដោយបានសហការជាមួយរដ្ឋបាលខេត្ត និងព្រះមេគណខេត្តសៀមរាប បាននាំយកទេយវត្ថុដែលជាអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី លោកជំទាវ ប្រគេនដល់ព្រះសង្ឃគង់ក្នុងវត្ត និងអាស្រមដែលមានជីវភាពខ្វះខាតចំនួន៩ ក្នុងខេត្តសៀមរាប។
ពិធីប្រគេននេះដែរធ្វើឡើងនៅក្នុងវត្តរាជបូណ៌ ក្រុងសៀមរាប ក្រោមព្រះវត្តមានសម្ដេចព្រះព្រហ្មរតនមុនី ពិន សែម សិរីសុវណ្ណោ គណៈមហានិកាយ ឧត្តមទីប្រឹក្សាគណៈសង្ឃនាយក និងជាសមាជិកថេរសភាព្រះពុទ្ធសាសនា នៅព្រះរាជាណាចក្រកម្ពុជា និងជាព្រះចៅអធិការវត្តរាជបូណ៌ ព្រះធម្មសិរី អាភាករោ ជុំ គឹមឡេង ព្រះរាជាគណៈកិត្តិយស ព្រះសុមង្គលសិលាចារ្យ ព្រះមេគណខេត្ត និងលោកស្រី យូ សុភា អភិបាលរងខេត្តសៀមរាប រួមនឹងប្រតិភូសង្ឃ និងអាជ្ញាធរខេត្តជាច្រើនរូបទៀត។
មានប្រសាសន៍ក្នុងឱកាសនោះ លោកជំទាវ ទូច សារ៉ុម បាននាំយកនូវប្រសាសន៍ផ្តាំផ្ញើសួរសុខទុក្ខរបស់សម្តេចមហាបវរធិបតី ហ៊ុន ម៉ាណែ នាយករដ្ឋមន្ត្រីនៃកម្ពុជា និងឯកឧត្តមរដ្ឋមន្ត្រីក្រសួងធម្មការ និងសាសនា ប្រគេន និងជូនដល់មន្ត្រីសង្ឃខេត្ត ព្រះសង្ឃគ្រប់អង្គ ប្រជាពុទ្ធបរិស័ទដែលជានិច្ចកាលសម្តេចបវរធិបតី តែងតែគិតគូរពីសុខទុក្ខ ភាពលំបាក ការខ្វះខាត ទាំងវិស័យពុទ្ធចក្រ និងអាណាចក្រ និងគោរពស្រឡាញ់ជឿជាក់លើព្រះពុទ្ឋសាសនា ព្រោះថាព្រះពុទ្ឋសាសនា បានដើរតួនាទីយ៉ាងសំខាន់ ក្នុងការអប់រំ និងចូលរួមចំណែកអភិវឌ្ឍសង្គមជាតិជាមួយរាជរដ្ឋាភិបាលកម្ពុជា ជំរុញឱ្យប្រជាពលរដ្ឋប្រកាន់ភ្ជាប់នូវសីលធម៌ ចរិយាធម៌ និងគុណធម៌ល្អប្រសើរក្នុងការរស់នៅ។
លោកជំទាវមានប្រសាសន៍ថា ក្នុងនាមក្រសួងធម្មការ និងសាសនា ពិតណាស់គឺចង់ឃើញនៅតាមបណ្តាវត្តវ៉ាអារាមនានា លឺតែសម្តេងព្រះធម៌ មានភាពស្ងប់ស្ងាត់ ដែលផ្តល់ភាពត្រជាក់ត្រជុំសម្រាប់ប្រជាពុទ្ឋបរិស័ទជ្រកក្រោមម្លប់ព្រះធម៌ ស្របតាមរដ្ឋធម្មនុញ្ញ ថាព្រះពុទ្ឋសាសនាជាសានារបស់រដ្ឋ ខណៈដែរបច្ចុប្បន្នវិស័យព្រះពុទ្ឋសាសនា កំពុងតែល្បីរន្ទឺនៅក្នុងពិភពលោក។ ស្របពេលជាមួយគ្នានោះ បណ្តាប្រទេសជឿនលឿន និងប្រទេសកំពុងអភិវឌ្ឍ មានភាពជឿជាក់ថាព្រះពុទ្ឋសាសនាធ្វើឱ្យប្រទេសរីចម្រើនជឿនលឿនជាពិសេសនៅកម្ពុជាយើងតែម្តង។ ហើយភាពល្បីល្បាញ និងភាពរីកចម្រើនរបស់ព្រះពុទ្ឋសាសនាអាចប្រព្រឹត្តទៅបាន គឺអាស្រ័យដោយប្រទេសជាតិមានសុខសន្តិភាព បើគ្មានសុខសន្តិភាពទេយើងក៏គ្មានឱកាសអភិវឌ្ឍប្រទេសបានរីកចម្រើនដូចសព្វថ្ងៃនេះឡើយ។
សូមបញ្ជាក់ថា ទេយវត្ថុជាគ្រឿងឧបភោគបរិភោគដែឡបាននាំយកមកប្រគេននាពេលនេះរួមមាន៖ អង្គរ ១៤០ការ៉ុង, មីយើង ១៧៥កេស បានបែងចែក និងប្រគេនដល់វត្តចំនួន៧ និងអាស្រមចំនួន២ រួមនឹងបច្ច័យសម្រាប់វត្ត និងអាស្រមនីមួយៗ ២០ម៉ឺនរៀលផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
