នៅថ្ងៃទី១៨ ខែតុលា ឆ្នាំ២០២៣ ក្រុមការងារចម្រុះរបស់រដ្ឋបាលខេត្ត បានចុះធ្វើការបើកផ្លូវមួយខ្សែ នៅចំណុចផ្លូវបុស្សទ្រមូង ស្ថិតក្នុងក្រុមទី៤ ភូមិវត្តបូព៌ សង្កាត់សាលាកំរើក ក្រុងសៀមរាប ដែលមានប្រវែងសរុប ៥៣៥ម៉ែត្រ បន្ទាប់ពីមានការស្នើសុំបើកផ្លូវអស់រយៈពេលប្រមាណ ៥ឆ្នាំមកហើយ។
តាមការលើកឡើង របស់ប្រជាពលរដ្ឋនៅក្នុងក្រុមទី៤នេះ បង្ហាញផ្លូវបុស្សទ្រមូងនេះ កន្លងមកមានសភាពតូចចង្អៀត មានព្រៃអមសងខាងផ្លូវ ដែលបង្កឱ្យមានការភ័យខ្លាចដល់ប្រជាពលរដ្ឋក្នុងមូលដ្ឋាន។ ពួកគាត់ ក៏បានថ្លែងអំណរគុណដល់អាជ្ញាធរខេត្ត ក្រុង និងសង្កាត់ ដែលបានគិតគូរពីរបស់សំណើរប្រជាពលរដ្ឋ និងសម្រេចបើកផ្លូវនាពេលនេះ។
លោក សាម ឡន ចៅសង្កាត់សាលាកំរើក បញ្ជាក់ថា ក្នុងសង្កាត់របស់លោក មានការបើកផ្លូវជាច្រើនខ្សែមកហើយ ដែលការអនុវត្តបើកផ្លូវនេះចាប់ផ្ដើមដំណើរការតាំងពីឆ្នាំ២០០៧ ស្របតាមគោលការណ៍របស់រដ្ឋបាលខេត្ត និងគាំទ្រថវិកា ៥០ភាគរយដោយរដ្ឋបាលខេត្ត និង ៥០ភាគរយដោយប្រជាពលរដ្ឋ ក្នុងការអភិវឌ្ឍផ្លូវក្នុងមូលដ្ឋាន។
លោក ចៅសង្កាត់ បន្ថែមថា កន្លងមក និងនៅពេលនេះ ការដោះស្រាយលើការបើកផ្លូវនេះ របស់អាជ្ញាធរសង្កាត់ តែងតែបានធ្វើការសម្របសម្រួលដោយជោគជ័យ ដោយមិនមានវិវាទ ឬសម្រេចបើកផ្លូវដោយមិនមានការឯកភាពពីអ្នកពាក់ព័ន្ធឡើយ។ ទន្ទឹមនោះ លោក ក៏បានថ្លែងអំណរគុណដល់ លោក គឹម សួរ និងក្រុមគ្រួសារ ដែលបានយល់ព្រមបើកផ្លូវតាមសំណើរបស់អាជ្ញាធរ និងបានកាត់ដីរបស់លោកជាពីរ ដើម្បីចូលរួមជាមួយអាជ្ញាធរ ក្នុងកិច្ចអភិវឌ្ឍមូលដ្ឋាន។
អត្ថបទ និងរូបភាព៖ លោក សេង ផល្លី
