គម្រោងសាងសង់ផ្លូវបេតុង ១ខ្សែ ស្ថិតក្នុងឃុំតាអាន ស្រុកក្រឡាញ់ ខេត្តសៀមរាប ត្រូវបានប្រកាសបញ្ចប់ការដេញថ្លៃជាស្ថាពរ នៅព្រឹកថ្ងៃទី១៨ ខែតុលា ឆ្នាំ២០២៣នេះ ក្រោមការចូលរួមពីមន្រ្តីបច្ចេកទេសសាលាខេត្ត គណៈកម្មការលទ្ធកម្មឃុំ និងអ្នកសារព័ត៌មាន រួមទាំងតំណាងក្រុមហ៊ុនដែលបានចូលរួមដេញថ្លៃផងដែរ។
បើតាមលោក ស្គន់ សាគិន ប្រធានគណៈកម្មការលទ្ធកម្មឃុំតាអាន ស្រុកក្រឡាញ់ ខេត្តសៀមរាប បានឲ្យដឹងថា សម្រាប់គម្រោងមូនិធិឃុំឆ្នាំ២០២៣ ឃុំតាអានបានដាក់ដេញថ្លៃគម្រោងសាងសង់ផ្លូវបេតុងចំនួន ១ខ្សែ មានប្រវែង ៤៥ម៉ែត្រ ទទឹង ៥ម៉ែត្រ កម្រាស់ ០,១៥ម៉ែត្រ មានគ្រួសក្រហមស្មាសងខាងផ្លូវ ០,២៥ម៉ែត្រ និងស្លាកគម្រោងចំនួន១។ គម្រោងនេះដែលគឺស្ថិតក្នុងតម្លៃប៉ាន់ស្មាន ២២.៦២៥.៥៦៧រៀល ដោយមានក្រុមហ៊ុនម៉ៅការដាក់សំណើរចំនួន ៣ក្រុមហ៊ុន ជាលទ្ធផលបានទៅលើក្រុមហ៊ុន លាំ សោភ័ណ្ឌ ក្នុងតម្លៃ ២១.៥០០.០០០រៀល។
ក្រោយការដេញថ្លៃ តំណាងក្រុមហ៊ុន លាំ សោភ័ណ្ឌ ដែលទទួលបានការម៉ៅការចំពោះគម្រោងសាងសង់ផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមានចែងនៅក្នុងកិច្ចសន្យាផងដែរ៕
អត្ថបទ និងរូបភាព ស៊ុ គីន
