នៅព្រឹកថ្ងៃទី២៧ ខែតុលា ឆ្នាំ២០២៣នេះ រដ្ឋបាលខេត្តសៀមរាប បានបន្តរៀបចំបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០២៣ គោលដៅទី៣ សម្រាប់ស្រុកបន្ទាយស្រី និងស្រុកអង្គរធំ ក្នុងបរិវេណវត្តបន្ទាយស្រី ស្រុកបន្ទាយស្រី ខេត្តសៀមរាប ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក អ៊ឹង គឹមលាងអភិបាលរងខេត្ត រួមនឹងវត្តមានឯកឧត្ដម លោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ-អង្គភាពក្នុងខេត្ត អាជ្ញាធរមូលដ្ឋាន និងប្រជាពលរដ្ឋជាច្រើននាក់ទៀត។
ឯកឧត្តម អ៊ាន ឃុន មានប្រសាសន៍ថា វេទិកាផ្សព្វផ្សាយ និងពិគ្រោះយោបល់នាពេលនេះ ធ្វើឡើងក្នុងគោលបំណង៖ ផ្ដល់ព័ត៌មានជូនប្រជាពលរដ្ឋអំពីសមិទ្ធផល ដែលក្រុមប្រឹក្សាសម្រេចបានកន្លងមក និងបញ្ហាប្រឈមដែលត្រូវដោះស្រាយបន្ត, ទទួលសំណួរ និងសំណូមពររបស់ប្រជាពលរដ្ឋដែលជាបញ្ហា និងក្ដីកង្វល់ ដើម្បីធ្វើការឆ្លើយតប និងដោះស្រាយជូនម្ចាស់សំណួរ សំណូមពរ, បង្កើនភាពជិតស្និតរវាងប្រជាពលរដ្ឋ និងអាជ្ញាធរ ដើម្បីឲ្យការផ្ដល់សេវាសាធារណៈនានា ជូនពលរដ្ឋក្នុងមូលដ្ឋានកាន់តែមានភាពល្អប្រសើរឡើង។ ឯកឧត្តម ក៏សូមលើកទឹកចិត្តដល់បងប្អូនប្រជាពលរដ្ឋអាចលើកឡើងនូវទុក្ខកង្វល់ បញ្ហាប្រឈម និងសំណូមពរនានា ក្នុងវេទិកានេះឱ្យបានច្រើន តាមរយៈការលើកឡើងផ្ទាល់ និងជាសរសេរ ដើម្បីឲ្យក្រុមការងារប្រមូលនូវរាល់មតិយោបល់ បញ្ហាប្រឈម និងសំណូមពរទាំងនោះ មកធ្វើការស្រាយបំភ្លឺ ប្រកបដោយតម្លាភាព នឹងឈានទៅរកការដោះស្រាយជូនបានចំគោលដៅ មានប្រសិទ្ធិភាព និងទាន់ពេលវេលា។
សូមជម្រាបថា សម្រាប់វេទិកាផ្សព្វផ្សាយ និងពិគ្រោះយោបល់នាពេលនេះ ក្រុមការងារបានទទួលនូវសំណួរ-សំណូមពរផ្ទាល់មាត់ចំនួន១៦ និងជាលាយលក្ខ័អក្សរចំនួន១៣ សរុប ២៩សំណួរ-សំណូមពរ។ ក្នុងនោះមន្ត្រីជំនាញ និងអ្នកពាក់ព័ន្ធបានធ្វើការស្រាយ និងឆ្លើយតបជូនដល់បងប្អូនប្រជាពលរដ្ឋ នូវសំណួរផ្ទាល់មាត់ទាំង១៦ ហើយសំណួរ-សំណូមពរជាលាយលក្ខ័អក្សរទាំង ១៣សំណួរ-សំណូមពរដែលមិនទាន់បានបកស្រាយ ក្រុមការងារនឹងទទួលយកទៅពិនិត្យពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជាលាយលក្ខណ៏អក្សរជូនដល់ម្ចាស់សំណួរ សំណូមពរ តាមរយៈក្រុមប្រឹក្សាស្រុក ភូមិ-ឃុំ នាពេលឆាប់ៗខាងមុខ។
ព័ត៌មានជាតិ ថ្មីៗ
មានប្រសាសន៍បិទអង្គវេទិកា ឯកឧត្តមប្រធានក្រុមប្រឹក្សាខេត្ត បានគូសបញ្ជាក់ថា វេទិកាសាធារណៈនេះ ពិតជាមានសារៈសំខាន់ណាស់ ក្នុងការជួយជំរុញដល់ដល់ការអនុវត្តមុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋានឲ្យកាន់តែមានប្រសិទ្ធភាពបន្ថែមទៀត ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណូរ-សំណូមពរបស់ប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋនៅតាមបណ្ដាក្រុង-ស្រុក នៃខេត្តសៀមរាបទាំងមូល។
សូមបញ្ជាក់ថា ជារៀងរាល់ឆ្នាំក្រុមប្រឹក្សាខេត្តសៀមរាប តែងតែរៀបចំបើកវេទិកាផ្សព្វផ្សាយ និងពិគ្រោះយោបល់ទៅតាមគោលដៅទាំង៦ ដែលបានកំណត់ ហើយសម្រាប់ឆ្នាំ២០២២នេះ រួមមាន៖ គោលដៅទី១.ស្រុកក្រឡាញ់ និងស្រុកស្រីស្នំ នៅថ្ងៃទី២៣ ខែតុលា ឆ្នាំ២០២២ ក្នុងបរិវេណវត្តប្រាសាទរតនត្រពាំងក្រសាំង ស្រុកក្រឡាញ់ ,គោលដៅទី២.ស្រុកអង្គរជុំ និងស្រុកវ៉ារិន នៅថ្ងៃទី២៥ ខែតុលា ក្នុងបរិវេណសាលាស្រុកអង្គរជុំ ,គោលដៅទី៣.ស្រុកបន្ទាយស្រី និងស្រុកអង្គរធំ នៅថ្ងៃទី២៧ ខែតុលា ក្នុងបរិវេណវត្តបន្ទាយស្រី ,គោលដៅទី៤.ស្រុកសូទ្រនិគម និងស្រុកប្រាសាទបាគង នៅថ្ងៃទី៣១ ខែតុលា ក្នុងបរិវេណវត្តប្រាសាទបន្ទាយស្រី ស្រុកសូទ្រនិគម ,គោលដៅទី៥.ស្រុកស្វាយលើ និងស្រុកជីក្រែង នៅថ្ងៃទី៨ ខែវិច្ឆិកា ក្នុងបរិវេណវត្តស្វាយលើ ស្រុកស្វាយលើ និងគោលដៅទី៦.ក្រុងសៀមរាប និងស្រុកពួក នៅថ្ងៃទី១០ ខែវិច្ឆិកា ឆ្នាំ២០២៣ ក្នុងបរិវេណសាលាក្រុងសៀមរាប៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
